Diniy idora delegatsiyasi Misrdagi anjumanda ishtirok etdi
Shu yilning 29-30 iyul kunlari Qohira shahrida “Shiddat bilan rivojlanib borayotgan dunyoda fatvo va yuksak axloqni shakllantirish” mavzucidagi xalqaro anjuman bo‘lib o‘tdi. Unda 100 dan ortiq davlatdan kelgan yuqori martabali davlat va jamoat arboblari, yetuk ulamolar, diniy yetakchilar va fatvo idoralari vakillari ishtirok etdi.
Mazkur nufuzli tadbirda Misr muftiysi Shavqiy Ibrohim Allom taklifiga binoan O‘zbekiston musulmonlari idorasi raisining birinchi o‘rinbosari Homidjon domla Ishmatbekov qatnashdi.
Xalqaro anjumanda din ulamolari tomonidan chiqarilgan fatvolar kishilar va jamiyatlarni to‘g‘ri yo‘lga yo‘naltirish va yuksak axloqni shakllantirishda muhim o‘rin tutishi, shiddat bilan rivojlanuvchi dunyoda va texnologiyalar taraqqiy etib borayotgan davrda fatvolar yangi chaqiriqlarga moslashishi hamda dinning asosiy tamoyillariga asoslangan bo‘lishiga alohida e’tibor qaratildi.
Ushbu anjumanda turli mamlakatlardan kelgan olim va soha mutaxassislari mavzu yuzasidan o‘z ma’ruzalari bilan qatnashish barobarida o‘zaro fikr-mulohaza almashdilar.
O‘zbekiston musulmonlari idorasi Matbuot xizmati
Bugungi e’tibor – ertangi natija
Istiqlolimizning 35 yillik bayrami arafasida Farg‘ona viloyati bosh imom-xatibi Ubaydulloh domla Abdullayev ishtirokida Quvasoy shahrida xayriya tadbir o‘tkazildi. Unda 33 ta xonadonga oziq-ovqat mahsulotlari, 43 nafar bolajonga esa o‘quv qurollari va kiyim-kechaklar hadya qilindi.
Tadbirda farzandlar uchun munosib sharoit yaratish ezgulikning eng go‘zal ko‘rinishlaridan biri ekani, bugun yosh avlodning bilimi va kamoli uchun qilingan har bir xayrli amal ertangi kun taraqqiyotiga muhim hissa bo‘lib qo‘shilishi ta’kidlandi.
Bunday tadbirlar, shuningdek, Buvayda tumanidagi «Katta mahalla» masjidi jamoasi tomonidan ham tashkil etildi. Unda ijtimoiy ko‘makka muhtoj hamda boquvchisini yo‘qotgan oilalar farzandlaridan 70 nafariga maktabda ta’lim olishi uchun zarur bo‘lgan o‘quv qurollari tarqatildi. Bolajonlar mustaqillik bayrami hamda boshlanajak yangi o‘quv yili bilan muborakbod etildi.
Ilm va yoshlarni qo‘llab-quvvatlashga qaratilgan bunday ezgu tashabbuslar Farg‘ona shahridagi "Xo‘jamberdiboy", So‘x tumanidagi "Sulton Mahmud" masjidi jamoasi tomonidan ham tashkil etilmoqda.
O‘MI Farg‘ona viloyati vakilligi Matbuot xizmati
