“Qaqir” masjidi yangi binosiga ilk g‘isht qo‘yildi
Shu yil 30 iyul kuni Andijon viloyati bosh imom-xatibi Mirzamaqsud domla Alimov Buloqboshi tumani “Qaqir” jome masjidi uchun qurilayotgan yangi xonaqoh binosiga ilk g‘isht qo‘yish marosimida qatnashdi. Unda, shuningdek, vakillik xodimlari, tuman bosh imom-xatibi nuroniy oqsoqollar, muhandis, quruvchiva mahalliy aholi vakillari ishtirok etdi.
Dastlab Mirzamaqsud domla Alimov qurilish hashariga yig‘ilganlarga bugungi kunda diniy-ma’rifiy sohadagi ulkan o‘zgarishlar, masjid va madrasalar obod bo‘layotgani haqida so‘z yuritib, bunday masjidlar elimizga ma’rifat tarqatish maskani bo‘lib xizmat qilayotganini alohida ta’kidladi.
Shuningdek, tadbirda Qur’on tilovat qilinib, masjid bunyodkorlariga ezgu niyatlar bildirildi, xalqimiz farovonligi va masjid qurilishiga hissa qo‘shayotganlar haqqiga duolar qilinib, Mirzamaqsud domla masjid poydevori uchun ilk g‘ishtni qo‘yib berdi.
Vakillik matbuot xizmati
“Oman Daily”: O‘zbekiston islom sivilizatsiyasi merosini xalqaro maydonda keng targ‘ib qilmoqda
O‘monning “Oman Daily” nashrida Toshkent shahrida bo‘lib o‘tgan “Islom sivilizatsiyasi: yangi nigoh, yangi kashfiyotlar” xalqaro mediaforumiga bag‘ishlangan maqola e’lon qilindi, deb xabar bermoqda “Dunyo” AA.
Nashrda yozilishicha, anjumanda dunyoning 50 dan ortiq davlatidan 300 nafarga yaqin jurnalist, tadqiqotchi, noshir, kinorejissyor va texnologiya sohasi mutaxassislari ishtirok etdi.
Tadbir qatnashchilari Islom sivilizatsiyasining tarixiy-madaniy merosini zamonaviy media vositalari orqali xalqaro auditoriyaga keng targ‘ib qilish masalalarini atroflicha muhokama qildi.
Maqolada O‘zbekistonning Islom sivilizatsiyasi rivojiga qo‘shgan hissasi, xususan, Al-Xorazmiy, Ibn Sino, Imom Buxoriy, Mirzo Ulug‘bek va Amir Temur kabi buyuk tarixiy shaxslarning boy ilmiy va madaniy merosi alohida e’tirof etilgan.
Shuningdek, Toshkent shahrida qad rostlagan Islom sivilizatsiyasi markazining ushbu tarixiy boylikni atroflicha o‘rganish, asrab-avaylash va xalqaro maydonda tizimli targ‘ib qilishdagi strategik ahamiyatiga alohida e’tibor qaratilgan.
Forum doirasida qadimiy Qur’on qo‘lyozmalari, tarixiy xaritalar, hujjatli filmlar hamda innovatsion raqamli loyihalar taqdimoti bo‘lib o‘tdi. Anjuman ishtirokchilari Islom sivilizatsiyasi haqidagi xalqaro media kontentida mavjud bo‘lgan muayyan stereotiplarni bartaraf etish, uning jahon ilm-fani, madaniyati va umuminsoniy taraqqiyotga qo‘shgan bebaho hissasini xolis hamda keng qamrovli yoritish zarurligini bir ovozdan ta’kidladi.
Gazetada O‘zbekistonning madaniy diplomatiya mexanizmlaridan unumli foydalangan holda mamlakatning boy tarixiy merosi va Islom sivilizatsiyasidagi o‘rnini jahon jamoatchiligiga keng yetkazish borasidagi sa’y-harakatlariga yuqori baho berilgan.
O‘zbekiston musulmonlari idorasi Matbuot xizmati
