DINIY TA’LIM MUASSASALARIGA KIRISH IMTIHONLARI BOSHLANDI
Kecha, 1 avgust kuni Qoraqalpog‘iston Respublikasi Nukus shahrida joylashgan “Muhammad ibn Ahmad al-Beruniy” o‘rta maxsus islom ta’lim muassasasida kirish imtihoni boshlandi. Ushbu dargoh oliy va o‘rta maxsus diniy ta’lim muassasalariga 2024-2025 o‘quv yili uchun kirish imtihonlari o‘tkaziladigan 6 ta hududning birinchisi sanaladi.
Erta tongdan mazkur hududga 348 nafar abituriyent imtihon topshirish uchun yetib keldi. Bu yerda abituriyentlar va ularning ota-onalariga barcha zarur sharoitlar qilingan.
Imtihon boshlanish oldi o‘tkazilgan tadbirda O‘zbekiston musulmonlari idorasi Ta’lim va ilmiy-tadqiqot bo‘limi mudiri Salohiddin Sherxonov, Din ishlari bo‘yicha qo‘mitasi mas’ul xodimi Elyor Alimqulov, Qoraqalpog‘iston musulmonlari qoziyoti qozisi Bahramiddin domla Razov, soha vakillari, o‘qituvchi-murabbiylar, ota-onalar va abituriyentlar ishtirok etdi.
Qur’oni karim tilovati bilan boshlangan marosimda so‘zga chiqqanlar yurtimizda diniy ta’lim sohasiga qaratilayotgan e’tibor to‘g‘risida so‘zlash barobarida imtihon haqida abituriyentlarga batafsil tushuncha va tavsiyalar berib o‘tdilar.
Ushbu jarayonni soha mutasaddilari va hamkor tashkilot vakillaridan iborat kuzatuvchilar nazorat qilib bormoqda.
O‘zbekiston musulmonlari idorasi Matbuot xizmati
Muftiy hazrat Saudiya Arabistonidagi nufuzli xalqaro anjumanda ishtirok etmoqdalar
Bugun, 7 sentyabr kuni musulmon dunyosining eng nufuzli ilmiy muassasalaridan biri — Xalqaro Islom fiqhi akademiyasi tomonidan Jidda shahrida xalqaro konferensiya o‘z ishini boshladi.
Ushbu nufuzli anjumanda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari mazkur davlatlararo maqomga ega tashkilot a’zosi sifatida ishtirok etmoqdalar.
Ilmiy-fiqhiy kengashda musulmon olamining ko‘zga ko‘ringan ulamolari, akademiyaga a’zo davlatlarning muftiylari, yetakchi fatvo kengashlari rahbarlari, Al-Azhar singari yirik ilm dargohlarining olimlari hamda nufuzli tadqiqot markazlari professorlari qatnashmoqda.
So‘zga chiqqan notiqlar xotin-qizlarni har qanday shakldagi tazyiq, zo‘ravonlik va kamsitishlardan himoya qilishda din peshvolari hamda ulamolarning o‘rnini oshirish, oilaviy qadriyatlarni mustahkamlash hamda zo‘ravonlikka qarshi murosasiz muhitni shakllantirishda ilmiy-shar’iy manbalarning ahamiyati haqida nutq qilmoqdalar. Shuningdek, Islom dini ayollar huquqlari, sha’ni va qadr-qimmatini yuksak darajada qadrlashini targ‘ib qilishga alohida urg‘u qaratmoqdalar.
Anjuman tafsilotlarini tarmoqlarimizda kuzatib boring.
O‘zbekiston musulmonlari idorasi Matbuot xizmati