Sayt test holatida ishlamoqda!
17 Noyabr, 2026   |   7 Jumadul soni, 1448

Toshkent shahri
Tong
05:51
Quyosh
07:13
Peshin
12:13
Asr
15:21
Shom
17:05
Xufton
18:22
Bismillah
17 Noyabr, 2026, 7 Jumadul soni, 1448

Barzax hayoti

19.08.2024   21634   2 min.
Barzax hayoti

Ruh tanani tark etgach, Barzax hayoti boshlanadi. Bu hayot to qiyomatgacha davom etadi. Barzax hayoti qabrda bo‘lib, u yo jannat bog‘laridan bir bog‘cha yoki do‘zax o‘ralaridan bir o‘radir. Unda odamlar uch holatdan birida bo‘ladi:

Birinchisi: taqvodor mo‘minning holati. Uning oldiga ikkita farishta (Munkar va Nakir) kelib, uni o‘tkazadi va savol bera boshlaydilar: Rabbing kim, dining nima va mana bu sizlarga yuborilgan kishi kim? Mo‘min javob beradi: Rabbim Alloh, dinim Islom, u kishi payg‘ambarimiz Muhammad sallallohu alayhi vasallamdir.

Shundan so‘ng unga do‘zax tomonga bir eshik ochiladi va: agar kofir bo‘lganingda mana bu joy sening do‘zaxdagi o‘rning bo‘lar edi, deyiladi. So‘ngra u eshik yopiladi va abadul abad ochilmaydi. So‘ngra unga jannat tomondan bir eshik ochiladi, undan jannatning xidi kelib turadi. E jannatdagi o‘rnini ko‘rishi bilan: Ey Rabbim, qiyomat qoimni tezlat, qiyomat qoimni tezlat! -deydi. Shu tarzda to qiyomatgacha ne’mat ichida qoladi va oxir-oqibat jannatga doxil bo‘ladi.

Ikkinchisi: kofir yoki munofiqning holati. Qabrida o‘tkaziladi va: Rabbing kim, dining nima, muna bu sizlarga yuborilgan kishi kim? -deb so‘raladi. U esa: aa, aaa, bilmayman, deydi. Shunda unga: bilmaysan ham, o‘qimagansan ham, deyiladi va: boshiga gurzi bilan bir uriladi, og‘rig‘idan qattiq qichqiradi, uning qichqirig‘ini saqalayn (insonlar va jinlar)dan boshqa hamma mavjudot eshitadi.

Shundan keyin unga jannatdan bir eshik ochiladi va: agar mo‘min bo‘lganingda mana bu yer sen uchun edi, deyiladi. So‘ngra u eshik abadul abad ochilmaydigan qilib berkitiladi. Undan keyin do‘zaxdan bir eshik ochiladi va undan do‘zaxning sassiq xidi va qaynoq nafasi kelib turadi. U esa: ey Rabbim, qiyomatni qoim qilma, qiyomatni qoim qilma, deb yolvoradi.

Uchinchisi: osiy va kabira gunohlar qilgan mo‘minning holati. Ularning holatlari turlicha bo‘ladi. Qaysilaridir og‘ir gunohlarga botgan va qaysilaridir unchalik og‘ir gunohlar qilmagan. Shunga qarab ular Allohning mashiati (xohishida) bo‘ladilar. Xohlasa azoblaydi, xohlasa mag‘firat qiladi. Ba’zilari qabrda gunohlariga yarasha ma’lum vaqt azoblangach, so‘ngra to qiyomatgacha qabrda rohatda bo‘ladilar. Ba’zilari esa qabr azobidan tashqari qiyomatdan keyin ham do‘zaxda azoblanadilar. Gunohlariga yarasha azoblanib bo‘lgach, so‘ngra jannatga kiritiladilar.

Allohim sendan jannatingni so‘raymiz, do‘zaxingdan panoh tilamiz.

https://t.me/tuhur

Boshqa maqolalar
Yangiliklar

O‘mon Madaniy mutolaa uyi rahbari: «Markaz nashrlari meni nihoyatda hayratlantirdi»

16.11.2026   16156   3 min.
O‘mon Madaniy mutolaa uyi rahbari: «Markaz nashrlari meni nihoyatda hayratlantirdi»

O‘mon Sultonligining Masqat shahrida o‘tkazilgan O‘zbekistondagi Islom sivilizatsiyasi markazi O‘mon Madaniy mutolaa uyi vakili Markaz nashrlarining badiiy bezaklari va tarixiy mazmunidan katta taassurot olganini bildirib, ikki mamlakat o‘rtasidagi madaniy hamkorlik Mahmudxo‘ja Behbudiy merosiga bag‘ishlangan adabiy uchrashuvlar orqali avvalroq boshlanganini ta’kidladi, xabar bermoqda iccu.uz.

O‘mon Sultonligining Masqat shahrida tashkil etilgan O‘zbekistondagi Islom sivilizatsiyasi markazining taqdimot tadbiri ikki mamlakat o‘rtasidagi madaniy-ma’rifiy hamkorlikning yana bir muloqot maydoniga aylandi.

Tadbir doirasida O‘mon Madaniy mutolaa uyi vakili O‘zbekiston bilan avvaldan yo‘lga qo‘yilgan adabiy aloqalar, mamlakatga amalga oshirilgan madaniy safar va Islom sivilizatsiyasi markazi nashrlari haqidagi taassurotlari bilan o‘rtoqlashdi.

Halima al-Balushiy, O‘mon Sultonligi Madaniy mutolaa uyi («Bayt al-Qiroa as-Saqofiy») rahbari

O‘zbekiston bilan hamkorligimiz bugun boshlangani yo‘q. Avvalroq O‘zbekistonning Masqatdagi elchixonasida Mahmudxo‘ja Behbudiy haqidagi kitoblardan birining muhokamasini tashkil etgan edik. Bu juda mazmunli va samarali muloqot bo‘lgan. Tadbir O‘zbekistonning O‘mondagi elchisi janoblari mezbonligida o‘tkazilgan edi.

Shundan so‘ng ikki mamlakat elchixonalari — O‘zbekistonning Masqatdagi va O‘monning Toshkentdagi diplomatik vakolatxonalari bilan hamkorlik va kelishuv asosida Madaniy mutolaa uyi a’zolarining O‘zbekistonga tashrifini tashkil etishga qaror qildik.

Bu tashrif tashkilotimiz amalga oshirgan eng ajoyib safarlardan biri bo‘ldi. Unda biz O‘zbekistonning boy madaniyati bilan yaqindan tanishdik. Taassurotlarimiz nihoyatda hayratlanarli bo‘ldi. A’zolarimiz Toshkent, Samarqand va Buxoro shaharlarini juda yaxshi ko‘rib qolishdi. Biz uchta shaharda bo‘ldik va ularning har biri bizga avvalgisidan ham go‘zalroq tuyuldi.

Ayrim joylar O‘monning ba’zi shaharlariga juda o‘xshash ekani ham e’tiborimizni tortdi. Ayniqsa, Buxorodagi qadimiy tarixiy maskanlar, tor ko‘chalar, eski uylar, derazalar va an’anaviy me’moriy inshootlar bizga o‘zgacha taassurot bag‘ishladi.

Safar ishtirokchilari O‘zbekistonning ulkan madaniy boyliklarga, qadimiy Islom sivilizatsiyasi va yuksak tarixiy merosga ega mamlakat ekanini chuqur his etdilar. Bu jihatlar ikki mamlakat madaniyati o‘rtasidagi yaqinlik va mushtaraklikni yanada yaqqol namoyon etdi.

Hatto ayrim a’zolarimiz Toshkentdan uy sotib olish istagini ham bildirishdi. Ular O‘zbekistonga tez-tez borib turishni xohlashmoqda. O‘zbek taomlari ularga juda-juda yoqdi. O‘zbekiston bozorlari, uylari, saroylari, tarixiy yodgorliklari, shaharlari va tabiati — mamlakatga xos barcha jihatlar ularni maftun etdi.

Islom sivilizatsiyasi markaziga keladigan bo‘lsak, biz O‘zbekistonga tashrif buyurgan paytimizda Markaz hali ochilmagan edi. Ammo u haqida eshitgan edik va uni ko‘rishni juda istaganmiz. Bizga markaz keyinroq ochilishi haqida ma’lum qilishgan edi.

Mana, bugun esa Islom sivilizatsiyasi markazining ochilishi munosabati bilan ushbu masjidning muhtasham zalida turibmiz. Bizni taklif etishgani va ushbu go‘zal ko‘rgazmani tomosha qilish imkoniyati yaratilganidan juda xursandmiz.

Ochig‘ini aytsam, markaz nashrlari meni nihoyatda hayratlantirdi. Kitob muqovalarining ranglari, ularning bezaklari, kitoblar ichidagi go‘zal manzaralar va tarixiy obidalar tasviri menda katta taassurot qoldirdi.

Masqatdagi taqdimot O‘zbekistondagi Islom sivilizatsiyasi markazining ilmiy-ma’rifiy faoliyati va nashrlarini xorijiy jamoatchilikka tanishtirish bilan bir qatorda, O‘zbekiston va O‘mon o‘rtasida avvaldan shakllangan adabiy-madaniy aloqalarning davomiyligini ham namoyon etdi.

O‘zbekiston musulmonlari idorasi Matbuot xizmati

 

O'zbekiston yangiliklari