Shu yil 19 avgust kuni poytaxtimizning “Hazrati Imom” majmuasidagi “Tilla Shayx” masjidida diniy ta’lim muassasalariga kirish imtihonining yakuniy bosqichi boshlandi.
Shu munosabat bilan o‘tkazilgan tadbirda O‘zbekiston musulmonlari idorasi raisi o‘rinbosari, Toshkent islom instituti rektori, professor Muhammadolim Muhammadsiddiqov, Din ishlari bo‘yicha qo‘mita raisining birinchi o‘rinbosari Davronbek Maxsudov, shuningdek, Diniy idora Ta’lim va ilmiy-tadqiqotlar bo‘limi mudiri Salohiddin Sherxonov, mudir o‘rinbosari Akbar Do‘smatov, “Ko‘kaldosh” madrasasi mudiri Ma’murjon Erkayev, "Xadichai kubro" madrasasi mudiri Maryam Abdullayeva hamda abituriyentlar va ularning ota-onalari ishtirok etdi.
Qur’oni karim tilovati va xayrli duolar ila boshlangan marosimda so‘zga chiqqan notiqlar yurtimizda amalga oshirilayotgan xayrli ishlar qatorida diniy ta’limga bo‘lgan e’tibor katta ahamiyat kasb etayotgani, bunga yangi diniy ta’lim muassasalari ochilayotgani, mavjudlarining faoliyati doimiy ravishda takomillashib borayotganini alohida ta’kidladi. Shuningdek, abituriyentlarga imtihon topshirish tartib-qoidalari tushuntirildi.
Shundan so‘ng abituriyentlar test sinoviga tartib bilan kiritilib, imtihonlar boshlandi. Mazkur jarayon adolatli o‘tishi uchun soha mutaxassislari bilan bir qatorda turli tashkilot vakillari jalb etilgan.
Ma’lumot o‘rnida mazkur oxirgi 6-hududda Toshkent shahrida imtihon topshirishni tanlagan jami 2 524 nafar abituriyent bir necha kun davomida test sinovlarida qatnashadi. Ularning ota-onasi va yaqinlariga imtihon jarayonini kuzatish va kutib turish uchun maxsus sharoitlar, ya’ni soya joylarda katta manitor, stol-stul, suv va shirinliklar hozirlangan.
Alloh taolo imtihonlarning barcha abituriyentlarga manfaatli bo‘lishini nasib aylasin!
Bahriddin Xushboqov,
Davron Tursunov (surat)
O‘zbekiston musulmonlari idorasi Matbuot xizmati
#xabar #qabul #murojaat
O‘zbekiston musulmonlari idorasi rahbariyatining aholi bilan olib borayotgan ochiq va samimiy muloqotlari fuqarolar muammolarini hal etishda muhim ahamiyat kasb etmoqda. Qabullar jarayonida har bir murojaat e’tibor bilan o‘rganilib, aksariyati o‘z vaqtida ijobiy hal etilayotgani quvonarlidir.
Jumladan, bugun 17 dekabr kuni O‘zbekiston musulmonlari idorasi raisining birinchi o‘rinbosari Homidjon domla Ishmatbekov Diniy idoraga kelgan fuqarolarni qabul qilib, ularning murojaat, arz va takliflarini tingladilar. Qabul davomida imom-xatiblar faoliyati, haj va umra masalalari, oilaviy muammolar hamda moddiy yordam bilan bog‘liq masalalar ko‘rib chiqildi.
Xususan, oilaviy masalalar bo‘yicha murojaat qilganlarga muammolar yechimi yuzasidan maslahatlar berildi, shar’iy savollarga atroflicha tushuntirishlar qilindi hamda moddiy yordam so‘raganlarga belgilangan tartibda ko‘mak ko‘rsatildi.
Samimiy qabul va g‘amxo‘rlikdan mamnun bo‘lgan fuqarolar ko‘rsatilgan e’tibor uchun minnatdorlik bildirib, xayrli duolar qilishdi.
Darhaqiqat, inson dardiga sherik bo‘lish va uning tashvishini yengillatish — savobi ulug‘ amaldir. Zero, Rasululloh sollallohu alayhi va sallam: "... Kim birodarining hojatini ravo qilsa, Alloh uning hojatini ravo qiladi. Kim bir musulmonning tashvishni aritsa, Alloh uning Qiyomat kunidagi tashvishlaridan birini aritadi", deb marhamat qilganlar (Imom Buxoriy rivoyati).
Shu kabi qabul jarayonlari O‘zbekiston musulmonlari idorasining hududiy vakilliklari hamda barcha jome masjidlarida haftaning har chorshanba kuni imom-domlalar tomonidan muntazam o‘tkazib kelinmoqda.
O‘zbekiston musulmonlari idorasi
Matbuot xizmati