HASHAR - OBOD ELGA YARASHAR
Mustaqillikning 33 yilligiga sanoqli kunlar qoldi. An’anaga ko‘ra, qutlug‘ ayyom arafasida hasharlar uyushtirilib, obodlikdan dillar yorishadi.
Toshkent shahrida joylashgan masjidlarda ham bugun, 24 avgust kuni umumxalq hashari tashkil etildi. Masjidlar ozoda etilib, qutlug‘ bayramga tayyorgarlik boshlab yuborildi.
Bayram shukuhi xonadonlarga kirib boryapti
Eng ulug‘, eng aziz bayram – Mustaqillik shodiyonalariga sanoqli kunlar qoldi. Ayyom arafasida kam ta’minlangan, boquvchisini yo‘qotgan, o‘zgalar ko‘magiga muhtoj bemorlar, keksalar holidan xabar olinib, ularga bayram tuhfalari yetkazib berilyapti.
Bugun Toshkent shahar bosh imom-xatibi Abduqahhor domla Yunusov boshchiliklarida imom-domlalar, homiylar poytaxtimizning Olmazor tumanidagi "Islomobod" masjidida yig‘ilib, ehtiyojmand oilalar holidan xabar olishdi.
«Vaqf» xayriya jamoat fondi Toshkent shahar filiali hamda homiylar ko‘magida tayyorlangan oziq-ovqatlar jamlanmasi, shirinliklardan iborat ehsonlar bilan xonadonlarga kirib borildi.
Ko‘ngli o‘ksik insonlar bayram tuhfalarini olib, aziz yurtimizda hech kim mehr va e’tibordan chetda emasligiga yana bir karra amin bo‘lishdi.
Alloh taolo ehsonlarni qabul qilsin. Savoblarini ko‘paytirib bersin!
Toshkent shahar vakilligi
Matbuot xizmati
