Hikmat – mo‘minning yo‘qotgani
Solihlar xato qilmaydi deb o‘ylaysizmi? Ular ham xato qilishadi. Ammo boshqalar kabi ayblarini ovoza qilib jar solishmaydi. Balki istig‘for aytib, xatolariga boshqa qaytmaslikka, uning ortidan yaxshiliklarni ko‘paytirishga intilishadi. Zero, Abu Hurayra roziyallohu anhudan rivoyat qilingan hadisi sharifda Rasululloh sollallohu alayhi va sallam bunday marhamat qilganlar: “Ummatimning barchasi – ofiyatda (omonlikda), faqat gunohlarini oshkor qiluvchilar bundan mustasno” (Imom Buxoriy rivoyati).
* * *
“Samolyotda, uni boshqarayotgan uchuvchini tanimasangiz-da, xotirjam bo‘lasiz. Kemada esa, kapitanni tanimasangiz-da, xotirjamsiz. Lekin hayotingizni Alloh boshqarayotganini bilsangiz-da, nega xotirjam bo‘lmaysiz?”
* * *
Yo‘qotaman deb o‘ylamagan narsangizni Alloh olib qo‘ysa, bilingki, yaqinda topaman deb o‘ylamagan narsangizni beradi.
* * *
Allohga, sizga nimadir berishi uchun emas, balki rozi bo‘lishi uchun ibodat qiling! Agar U rozi bo‘lsa, beradigan narsalari bilan sizni lol qoldiradi.
* * *
Agar zolim kimsa mazlumga Alloh qanday ne’matlar tayyorlab qo‘yganini bilganida, mazlumga zulmini ham qizg‘ongan bo‘lar edi.
* * *
O‘zingiz yomon ko‘rgan kimsadan yiroq bo‘ling, yolg‘ondan xushmuomalalik qilmang. Xijolat bo‘lib, har aytganiga muvofiq bo‘lmang. Alloh taolo bu jonni azoblashingiz uchun bermagan.
* * *
Aqlli va fikrli insonlar dinni dinning o‘zidan olishadi, dindorlardan emas.
* * *
Ichingizdan sof, toza niyatli bo‘lsangiz, Alloh taolo o‘zingiz bilmagan tarafdan nur berib qo‘yadi; o‘zingiz bilmagan holda insonlarni sizga muhabbatli qilib qo‘yadi; so‘ragan narsalaringiz o‘ylamagan tarafingizdan kela boshlaydi.
Pok niyat sohibi mustasnolarsiz barchaga yaxshilikni istaydigan kishidir. Unutmang, o‘zgalarning baxtli bo‘lishi sizning baxtingizni tortib olmaydi, boy bo‘lishi sizni faqir qilib qo‘ymaydi, sihat-salomatligi kasalingizni ziyoda qilmaydi.
Faqat pok niyat sohibi bo‘ling, qalbingiz sof-toza bo‘lsin!
Shayx Mutavalliy SHA’ROVIY rahimahulloh
O‘mon Sultonligining Masqat shahrida o‘tkazilgan O‘zbekistondagi Islom sivilizatsiyasi markazi O‘mon Madaniy mutolaa uyi vakili Markaz nashrlarining badiiy bezaklari va tarixiy mazmunidan katta taassurot olganini bildirib, ikki mamlakat o‘rtasidagi madaniy hamkorlik Mahmudxo‘ja Behbudiy merosiga bag‘ishlangan adabiy uchrashuvlar orqali avvalroq boshlanganini ta’kidladi, xabar bermoqda iccu.uz.
O‘mon Sultonligining Masqat shahrida tashkil etilgan O‘zbekistondagi Islom sivilizatsiyasi markazining taqdimot tadbiri ikki mamlakat o‘rtasidagi madaniy-ma’rifiy hamkorlikning yana bir muloqot maydoniga aylandi.
Tadbir doirasida O‘mon Madaniy mutolaa uyi vakili O‘zbekiston bilan avvaldan yo‘lga qo‘yilgan adabiy aloqalar, mamlakatga amalga oshirilgan madaniy safar va Islom sivilizatsiyasi markazi nashrlari haqidagi taassurotlari bilan o‘rtoqlashdi.
Halima al-Balushiy, O‘mon Sultonligi Madaniy mutolaa uyi («Bayt al-Qiroa as-Saqofiy») rahbari
O‘zbekiston bilan hamkorligimiz bugun boshlangani yo‘q. Avvalroq O‘zbekistonning Masqatdagi elchixonasida Mahmudxo‘ja Behbudiy haqidagi kitoblardan birining muhokamasini tashkil etgan edik. Bu juda mazmunli va samarali muloqot bo‘lgan. Tadbir O‘zbekistonning O‘mondagi elchisi janoblari mezbonligida o‘tkazilgan edi.
Shundan so‘ng ikki mamlakat elchixonalari — O‘zbekistonning Masqatdagi va O‘monning Toshkentdagi diplomatik vakolatxonalari bilan hamkorlik va kelishuv asosida Madaniy mutolaa uyi a’zolarining O‘zbekistonga tashrifini tashkil etishga qaror qildik.
Bu tashrif tashkilotimiz amalga oshirgan eng ajoyib safarlardan biri bo‘ldi. Unda biz O‘zbekistonning boy madaniyati bilan yaqindan tanishdik. Taassurotlarimiz nihoyatda hayratlanarli bo‘ldi. A’zolarimiz Toshkent, Samarqand va Buxoro shaharlarini juda yaxshi ko‘rib qolishdi. Biz uchta shaharda bo‘ldik va ularning har biri bizga avvalgisidan ham go‘zalroq tuyuldi.
Ayrim joylar O‘monning ba’zi shaharlariga juda o‘xshash ekani ham e’tiborimizni tortdi. Ayniqsa, Buxorodagi qadimiy tarixiy maskanlar, tor ko‘chalar, eski uylar, derazalar va an’anaviy me’moriy inshootlar bizga o‘zgacha taassurot bag‘ishladi.
Safar ishtirokchilari O‘zbekistonning ulkan madaniy boyliklarga, qadimiy Islom sivilizatsiyasi va yuksak tarixiy merosga ega mamlakat ekanini chuqur his etdilar. Bu jihatlar ikki mamlakat madaniyati o‘rtasidagi yaqinlik va mushtaraklikni yanada yaqqol namoyon etdi.
Hatto ayrim a’zolarimiz Toshkentdan uy sotib olish istagini ham bildirishdi. Ular O‘zbekistonga tez-tez borib turishni xohlashmoqda. O‘zbek taomlari ularga juda-juda yoqdi. O‘zbekiston bozorlari, uylari, saroylari, tarixiy yodgorliklari, shaharlari va tabiati — mamlakatga xos barcha jihatlar ularni maftun etdi.
Islom sivilizatsiyasi markaziga keladigan bo‘lsak, biz O‘zbekistonga tashrif buyurgan paytimizda Markaz hali ochilmagan edi. Ammo u haqida eshitgan edik va uni ko‘rishni juda istaganmiz. Bizga markaz keyinroq ochilishi haqida ma’lum qilishgan edi.
Mana, bugun esa Islom sivilizatsiyasi markazining ochilishi munosabati bilan ushbu masjidning muhtasham zalida turibmiz. Bizni taklif etishgani va ushbu go‘zal ko‘rgazmani tomosha qilish imkoniyati yaratilganidan juda xursandmiz.
Ochig‘ini aytsam, markaz nashrlari meni nihoyatda hayratlantirdi. Kitob muqovalarining ranglari, ularning bezaklari, kitoblar ichidagi go‘zal manzaralar va tarixiy obidalar tasviri menda katta taassurot qoldirdi.
Masqatdagi taqdimot O‘zbekistondagi Islom sivilizatsiyasi markazining ilmiy-ma’rifiy faoliyati va nashrlarini xorijiy jamoatchilikka tanishtirish bilan bir qatorda, O‘zbekiston va O‘mon o‘rtasida avvaldan shakllangan adabiy-madaniy aloqalarning davomiyligini ham namoyon etdi.
O‘zbekiston musulmonlari idorasi Matbuot xizmati