Yangi o‘quv yili 9 sentyabrdan boshlanadi
Mamlakatimiz istiqlol bayramining 33 yilligini munosib kutib olish, talaba yoshlarga qulay shart-sharoit yaratish maqsadida, O‘zbekiston musulmonlari idorasining buyrug‘iga asosan Oliy va o‘rta maxsus islom ta’lim muassasalarida yangi o‘quv yili joriy yilning 9 sentyabr, dushanba kunidan boshlanishi belgilab qo‘yildi.
Diniy ta’lim muassasalarida yangi o‘quv yiliga puxta tayyorgarlik ko‘rilib, auditoriyalar, talabalar turar joylari, oshxona va sport majmualari ta’mirlanib, talabalarni yangi o‘quv yilida ko‘tarinki ruhda qabul qilish uchun shay holatga keltirildi.
E’tiborlisi, bu yilgi qabul imtihonlari yuqori saviyada tashkil etilib, kuni kecha mandat natijalari e’lon qilindi. Yetti mingga yaqin abituriyentlar o‘zlariga qulay bo‘lgan 6 ta hududlardan birida test imtihonlarini topshirdilar. O‘zbekiston musulmonlari idorasi tizimida ilk bor elektron shaklda o‘tkazilgan qabul imtihonlaridan muvaffaqiyatli o‘tgan yoshlar talabalik baxtiga muyassar bo‘ldilar.
Yangi o‘quv yilini boshlash arafasida turgan talabalarning ilmlariga baraka, ta’lim beradigan ustozlariga g‘ayrat ato qilishini Alloh taolo so‘rab qolamiz!
O‘zbekiston musulmonlari idorasi
Matbuot xizmati
Robbingizga tavakkul qilib uyquga yoting
Hayotning bo‘ronli kunlariyu o‘tkir tig‘li hanjarlari unga ozor berishiga qaramay Allohning qadari va irodasiga rozi bo‘lib uyquga ketgan, mahzunlik uning qalbiga kirishga yo‘l topa olmayotgan, ko‘z yoshlar esa ko‘ziga hech o‘rnasha olmayotgan va farzandi, suyukli insonlari, ota-onasi yoki do‘stlarini yo‘qotgan barcha insonlarga aytar gapimiz: Alloh ajringizni ulkan qilib bersin! Darajangizni oliy qilsin! Siniqligingiz o‘rnini O‘zi to‘ldirib bersin! U zot bunday marhamat qiladi:
﴿وَاسْتَعِينُوا بِالصَّبْرِ وَالصَّلَاةِ وَإِنَّهَا لَكَبِيرَةٌ إِلَّا عَلَى الْخَاشِعِينَ﴾
“Sabr va namoz ila yordam so‘rang. Va, albatta, u nafsi siniqlardan boshqalarga juda katta ishdir” (Baqara surasi, 45-oyat).
Hazrati Aliy roziyallohu anhu aytadilar: “Sabrning iymondagi o‘rni boshning jismdagi o‘rni kabidir”. Shuning uchun siz sabringiz evaziga beriladigan mukofot – Firdavs jannatini qo‘lga kiritishingiz sizga xushxabar bo‘lsin! Tez orada siz har qanday holatda ham muvaffaqiyat qozongan inson ekaningizni bilasiz. Chunki Alloh taolo O‘zining Payg‘ambariga bunday deydi:
﴿وَبَشِّرِ الصَّابِرِينَ﴾
“Va sabrlilarga bashorat ber” (Baqara surasi, 155-oyat).
Shu’la: O‘zingizga bo‘lgan ishonch umringiz qanday bo‘lishidan qat’iy nazar sizga yangi g‘oyalar ijod etishingiz va o‘z kasbingizda yangi marralarni zabt etishingizga yordam beradi.
Doktor Oiz al-Qarniyning
"Dunyodagi eng baxtli ayol" kitobidan