Yangi o‘quv yili 9 sentyabrdan boshlanadi
Mamlakatimiz istiqlol bayramining 33 yilligini munosib kutib olish, talaba yoshlarga qulay shart-sharoit yaratish maqsadida, O‘zbekiston musulmonlari idorasining buyrug‘iga asosan Oliy va o‘rta maxsus islom ta’lim muassasalarida yangi o‘quv yili joriy yilning 9 sentyabr, dushanba kunidan boshlanishi belgilab qo‘yildi.
Diniy ta’lim muassasalarida yangi o‘quv yiliga puxta tayyorgarlik ko‘rilib, auditoriyalar, talabalar turar joylari, oshxona va sport majmualari ta’mirlanib, talabalarni yangi o‘quv yilida ko‘tarinki ruhda qabul qilish uchun shay holatga keltirildi.
E’tiborlisi, bu yilgi qabul imtihonlari yuqori saviyada tashkil etilib, kuni kecha mandat natijalari e’lon qilindi. Yetti mingga yaqin abituriyentlar o‘zlariga qulay bo‘lgan 6 ta hududlardan birida test imtihonlarini topshirdilar. O‘zbekiston musulmonlari idorasi tizimida ilk bor elektron shaklda o‘tkazilgan qabul imtihonlaridan muvaffaqiyatli o‘tgan yoshlar talabalik baxtiga muyassar bo‘ldilar.
Yangi o‘quv yilini boshlash arafasida turgan talabalarning ilmlariga baraka, ta’lim beradigan ustozlariga g‘ayrat ato qilishini Alloh taolo so‘rab qolamiz!
O‘zbekiston musulmonlari idorasi
Matbuot xizmati
YUNЕSKO bilan O‘zbekiston mahalla tizimi tajribasini xalqaro darajada targ‘ib qilish masalasi muhokama qilindi
O‘zbekiston va YUNЕSKOning Nomoddiy madaniy merosni muhofaza qilish to‘g‘risidagi konvensiyasi kotibiyati vakillari o‘rtasida onlayn uchrashuv bo‘lib o‘tdi, deb xabar bermoqda “Dunyo” AA.
Mamlakatimizning YUNЕSKO huzuridagi Doimiy vakolatxonasi ko‘magida tashkil etilgan muloqotda mahalla bilan bog‘liq madaniy an’ana va urf-odatlar, ularni xalqaro darajada targ‘ib qilish istiqbollari muhokama qilindi.
YUNЕSKOning Nomoddiy madaniy merosni muhofaza qilish to‘g‘risidagi konvensiyasi kotibi Fumiko Oxinata va Osiyo-Tinch okeani mintaqasi uchun mas’ul dastur mutaxassisi Nikolas Tan mavzu yuzasidan o‘z fikr-mulohazalarini bayon etdi.
O‘zbekiston tomonidan Tashqi ishlar vazirligi, O‘zbekiston mahallalari uyushmasi hamda YUNЕSKO huzuridagi Doimiy vakolatxonasi vakillari mahallaning ko‘p asrlik tarixi, uning jamiyat hayotidagi alohida o‘rni va milliy an’analarni saqlashdagi ahamiyati haqida so‘z yuritdi.
Uchrashuvda mahalla O‘zbekiston xalqi turmush tarzining ajralmas qismi ekani ta’kidlandi. U insonlarni yaxshi qo‘shnichilik, o‘zaro yordam, hamjihatlik va katta avlod vakillariga hurmat tamoyillari asosida birlashtiradi.
YUNЕSKO Kotibiyati vakillari taqdim etilgan materiallarga katta qiziqish bildirdi. Ular O‘zbekistonda mahalla bilan bog‘liq shakllangan jamoat hayoti tartibining o‘ziga xos xususiyatlarini e’tirof etdi.
Suhbat davomida O‘zbekistonning nomoddiy madaniy merosni targ‘ib qilishdagi roli alohida qayd etildi. Shu nuqtayi nazardan, o‘zbek mahalla tizimi tajribasi YUNЕSKO Kotibiyati mutaxassislarida katta qiziqish uyg‘otdi.
O‘zbekiston musulmonlari idorasi Matbuot xizmati