Sayt test holatida ishlamoqda!
21 Noyabr, 2026   |   11 Jumadul soni, 1448

Toshkent shahri
Tong
05:55
Quyosh
07:13
Peshin
12:14
Asr
15:18
Shom
17:02
Xufton
18:18
Bismillah
21 Noyabr, 2026, 11 Jumadul soni, 1448

E’TIBOR, EHTIROM VA E’ZOZ

06.09.2024   11998   10 min.
E’TIBOR, EHTIROM VA E’ZOZ

Dil izhori

Alloh taologa beadad shukrlar bo‘lsinki, yurtimiz mustaqilligining 33 yilligini katta xursandchilik bilan kutib oldik. Bugun har bir go‘shada bayram shukuhi hukmron. Bu ayyom o‘zini shu Vatan farzandi deb bilgan har bir inson uchun qadrli, aziz va mo‘tabar. Chunki u bizga o‘zligimiz, insoniy haq-huquq va qadr-qimmatimizni baxsh etdi.

Eng ulug‘, eng aziz bayram arafasida Prezidentimiz farmonlariga muvofiq turli soha vakillari faxriy unvon, orden va medallar bilan taqdirlandi. Shunday fidoyi yurtdoshlarimiz qatorida uch nafar imom-xatib “Imom Buxoriy” ordeni bilan mukofotlangani barcha diniy soha vakillarini benihoya xursand qildi. Aytish joizki, yaqin o‘tmishda imom-xatiblarga bu darajada ehtirom ko‘rsatilmagan.  Ushbu quvonchli voqea yangi O‘zbekistonda islom dini va soha xodimlariga qaratilayotgan e’tiborning yana bir yorqin ifodasi bo‘ldi.

Imom-xatiblar yuksak mukofotlarni 30 avgust kuni Ko‘ksaroy qarorgohida davlatimiz rahbaridan qabul qilib oldi. Quyida ularning dil so‘zlari bilan tanishasiz.

Ma’rifiy sohada ilmiy asos yaratilmoqda

— Bugun men juda ham shodman. Mana shunday ulug‘ mukofotni shaxsan davlatimiz rahbarining o‘zidan qabul qilib olish menga yuksak sharaf bo‘lish bilan birga, katta mas’uliyat ham yukladi. Mamlakatimizda Prezidentimiz  rahbarligida barcha sohalarda inson qadri va uning sha’nini yuksaltirish borasida olib borilayotgan izchil islohotlarning samaralarini birma-bir sanab adog‘iga yetish mushkul.

O‘zbekiston zamini islom ilm-fani va madaniyatining qadimiy beshiklaridan biri hisoblanadi. Xalqimizning boy tarixiy, ilmiy, ma’naviy merosini har tomonlama o‘rganish, jahon hamjamiyatiga keng tanitish, eng muhimi, islom dinining asl insonparvarlik mohiyatini chuqur ochib berish maqsadida yurtimizda Imom Buxoriy, Imom Termiziy, Imom Moturidiy, Imom Nasafiy kabi buyuk allomalarimizning bebaho ilmiy maktabini o‘rganish va tadqiq etish uchun ilmiy-tadqiqot markazlari faoliyati keng yo‘lga qo‘yildi.

Dinimizni ilmiy jihatdan o‘rganishni rivojlantirish maqsadida O‘zbekiston xalqaro islom akademiyasi, Buxoroda Mir Arab oliy madrasasi, Samarqandda Hadis ilmi maktabi va Surxondaryoda Imom Termiziy nomidagi islom instituti hamda shu nomdagi madrasaga asos solindi. Samarqandda Imom Buxoriy, Surxondaryoda Imom Termiziy, Toshkentda Imom Moturidiy xalqaro ilmiy-tadqiqot markazlari tashkil etildi. Ularda talabalar va yosh tadqiqotchilar buyuk ajdodlarimizning boy merosini o‘rganish va tadqiq etish barobarida zamonaviy ilmlarni ham o‘zlashtirib, yetuk olim bo‘lib kamol topadi. Shular qatorida turli hududlarda hadis, kalom, tasavvuf, fiqhni o‘rganishga ixtisoslashgan ilmiy maktablar, xususan, bizning viloyatimizda ham tasavvuf ilmi maktabi faoliyati yo‘lga qo‘yilgani diniy-ma’rifiy sohada yangi davr boshlaganidan darak beradi.

Quvonarlisi, mamlakatimiz rahbarining tashabbusi bilan Buxoro Ark qo‘rg‘oni yaqinida Mir Arab oliy madrasasining yangi binosi barpo etildi va foydalanishga topshirildi. 200 o‘ringa mo‘ljallangan oliy madrasada Qur’oni karim, hadis, fiqh va tasavvuf ilmlari, xorijiy tillar puxta o‘rgatiladi. Bugungi kunda 100 nafardan ortiq talaba zamonaviy jihozlangan o‘quv xonalari, kutubxona, faollar zali, talabalar yotoqxonasi va sport zalida malakali ustozlardan ta’lim olmoqda.

2021–2024 yillarda viloyatimizdagi 15 ta masjidning yangitdan qurib foydalanishga topshirilgani, 42 ta masjidda esa yirik ta’mirlash ishlari olib borilgani mamlakatimizda muborak dinimizga qaratilayotgan alohida e’tiborning isbotidir.

Mustaqillik bayrami arafasida shunday ulug‘ e’tirofga sazovor bo‘lish, menga cheksiz g‘urur bag‘ishladi. Kelajak avlodni yangi O‘zbekistonning chinakam bunyodkori qilib tarbiyalash, xalqimizning madaniy-ma’rifiy, diniy-axloqiy dunyoqarashini boyitish yo‘lidagi faoliyatimda bu mukofot menga qanot bag‘ishlaydi, deya ishonch bilan ayta olaman.

Jobir domla ELOV,

O‘zbekiston musulmonlari idorasining

Buxoro viloyatidagi vakili,

Buxoro viloyati bosh imom-xatibi,

Mir Arab oliy madrasasi rektori

* * *

Ajdodlarimizning o‘lmas merosi chuqur o‘rganilmoqda

— Bugun juda baxtiyorman. Eng ulug‘, eng aziz bayram — mustaqilligimizning 33 yilligi arafasida davlatimizning eng yuksak mukofotlaridan biri “Imom Buxoriy” ordeni bilan taqdirlanganimdan quvonchim cheksiz, so‘z bilan ta’riflashga ojizman. Prezidentimiz tashabbusi bilan ta’sis etilgan ordenga birinchilardan bo‘lib loyiq ko‘rilganimdan, yuksak mukofotni davlat rahbarining o‘z qo‘lidan olganimdan boshim ko‘kka yetdi.  

Turli sohalarda erishilayotgan barcha yutuqlar vatanimizda hukm surayotgan tinchlik va osoyishtalik, odilona siyosat natijasidir. Islom dini ilmlari rivojiga beqiyos hissa qo‘shgan buyuk vatandoshlarimizning ulkan ilmiy merosini yanada chuqur o‘rganish, tabarruk ziyoratgoh va qadamjolar, ko‘hna masjid va madrasalarni obod qilish borasida keng ko‘lamli ishlar amalga oshirilmoqda. Viloyatimizda o‘nlab yangi masjidlar qurildi, mavjudlarida qayta qurish va ta’mirlash ishlari olib borilyapti. Misol uchun, bir vaqtlar yo‘q bo‘lib ketish arafasida turgan Abul Muin Nasafiy ziyoratgohini bugun butun dunyo sayyohlari  katta zavq va hayrat bilan tomosha qilmoqda.

Mazkur majmuada Abul Muin Nasafiy ilmiy merosiga bag‘ishlab o‘tkazilgan xalqaro ilmiy-amaliy konferensiyalarda Turkiya, Misr, Fransiya, Rossiya, Bangladesh, Qozog‘iston, Tojikiston, Qirg‘iziston kabi davlatlardan yuzlab olim va kalomshunos mutaxassislar ishtirok etib, yurtimizda e’tiqod erkinligini ta’minlashga qaratilayotgan e’tiborni yuksak baholadi. Shuningdek, Kasbi tumanidagi Sulton Mir Haydar, Kitob tumanidagi Xo‘ja Ilm Koni va Mavlono Darvesh Muhammad Vaxshuvoriy, Qamashi tumanidagi Langar ota majmualarini rekonstruksiya va restavratsiya qilish ishlari amalga oshirildi.

Mustaqillikning dastlabki yillarida muborak haj amalini ado etishga muyassar bo‘lgan vatandoshlarimiz soni barmoq bilan sanoqli bo‘lgan. Bugungi kunda vijdon erkinligi va diniy-ma’rifiy muhit barqarorligini ta’minlashga qaratilayotgan alohida e’tibor tufayli ularning soni 15 mingdan oshdi. Joriy yilda faqat Qashqadaryo viloyatining o‘zidan 801 nafar fuqaro haj amallarini bajarib keldi.

Haj mavsumida Prezidentimiz hojilar holidan xabar olib, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari bilan telefon orqali muloqot qilgani nafaqat haj ziyoratiga borganlarni, ularning oila a’zolarini, barcha mo‘min-musulmonlarimizni behad quvontirdi.

Bunday g‘amxo‘rlikdan ruhlangan hojilarimiz, viloyatimizdagi barcha jome masjidlar imom-xatiblari va ularning noiblari “Yangi O‘zbekiston fidoyisi bo‘lib, ma’naviyat targ‘ibotchisiga aylanamiz” shiori ostida xayrli amallarni bajarishmoqda.

Rahmatullo USMONOV,

O‘zbekiston musulmonlari idorasining

Qashqadaryo viloyatidagi vakili,

viloyat bosh imom-xatibi

* * *

Yuksak ma’naviy-axloqiy jamiyat barpo etish yo‘lida

Ko‘ksaroy qarorgohida mamlakatimizda ko‘zga ko‘ringan ilm-fan, ta’lim, sog‘liqni saqlash, adabiyot, madaniyat vakillari qatorida davlat mukofoti bilan taqdirlanganim menga cheksiz faxru iftixor bag‘ishladi.

Yaratganga behad shukrlar bo‘lsinki, yurtimizda Istiqlol bayrog‘i ostida xalqimizning yurt ravnaqi yo‘lidagi azaliy istaklarini ro‘yobga chiqa boshladi. Bu, albatta, o‘z-o‘zidan bo‘lib qolmaydi. Davlatimiz rahbari boshchiligida jamiyat hayotining barcha jabhalarida olib borilayotgan islohotlarning tub mohiyati, eng avvalo, inson manfaatiga qaratilgan bo‘lib, ularning negizida farovon turmush, ilm-fan ravnaqi, yuksak ma’naviy-axloqiy, ilmiy-ijodiy salohiyatni yanada yuksaltirish va rivojlantirish yotadi.

Bugun shu maqsadda diniy-ma’rifiy sohada amalga oshirilayotgan ulkan islohotlar, erishilayotgan yutuqlar maqtovga loyiq. Jumladan, Prezidentimiz tashabbusi bilan Imom Buxoriy me’moriy majmuasi yuksak darajada va  mahobatli shaklda bunyod etilmoqdaki, u bir necha asrlar davomida yurtimiz va dunyo mo‘min-musulmonlari uchun ruhiy-ma’naviy oziqa oladigan muhtasham dargohga aylanadi. Shuningdek, kelajak avlod uchun bir necha yuz yillar ziyo sochadigan, yoshlarga ilm-ma’rifat nurini taratadigan osori-atiqa bo‘ladi.

Davlatimiz yetakchisi rahbarligida bunyod etilayotgan va Uchinchi Renessans poydevori, deya ta’riflanayotgan Islom sivilizatsiyasi markazi ham buyuk allomalarimizning jahon tamadduniga qo‘shgan hissalarini dunyo hamjamiyatiga namoyon etadigan, islom ma’rifatini keng tarqatadigan va yoshlarni ulug‘ allomalarga munosib avlod qilib tarbiyalaydigan ma’rifat koshonasi bo‘lib asrlar osha xizmat qildi, insha Alloh.

Mana shu o‘zgarishlar ko‘z o‘ngimda ro‘y berayotgani va o‘zim ham unda ishtirok etib, ulkan savobli ishlarga sababchi bo‘layotganimdan faxrga to‘laman. Bundan o‘ttiz yil oldin Farg‘ona viloyatining Quvasoy shahrida yangi qurilgan jome masjidining imom-xatibi sifatida o‘z faoliyatimni boshlaganman. Istiqlolning ilk davrlarida viloyatimizda bor yo‘g‘i 4 masjid bor edi. Ulardagi shart-sharoitlar haqida so‘z yuritishning hojati ham yo‘q. Bugun viloyatimizda 200 dan ortiq masjid faoliyat yurityapti. Ularning barchasi zamon talabiga mos tarzda ta’mirlangan, binolari yangidan bunyod etilib, namozxonlar uchun barcha sharoitlar hozirlangan.

Yana bir ta’kidlash joiz bo‘lgan voqea imom-xatib va diniy soha xodimlarining jamiyatdagi o‘rni mustahkamlandi. Oldinlari  faqat to‘y-ma’rakalardagina ko‘rinish beradigan imomlarimiz bugun yurtimizda olib borilayotgan islohotlarda, uni xalqqa yetakazishda astoydil fidoyilik ko‘rsatmoqda. Ayniqsa, yoshlarimizni yot g‘oyalar ta’siridan asrab-avaylash, hanafiy mazhabiga xos diniy tushunchalarni targ‘ib qilish, dindoshlarimiz to‘g‘ri yo‘lda yurishi uchun olib borilgan ma’naviy-ma’rifiy ishlarda bevosita ishtirok etayotganimdan behad xursandman. 

Kamtarona mehnatim yuksak qadrlanishidan, “Imom Buxoriy” ordeni bilan taqdirlanganimdan behad minnatdorman. Aslida bu mukofot nafaqat mening, balki butun Farg‘ona viloyatida faoliyat ko‘rsatayotgan barcha imom-xatib va noiblarning ulkan mehnati natijasi, deb hisoblayman.

Biz, din peshvolari bunday e’tibor va ehtirom oldida qarzdorlikni mudom his etamiz. Bunga javoban yurtimiz tinchligi va aholi farovonligi yo‘lida yanada kuch-g‘ayrat va fidokorlik bilan xizmat qilamiz. Shuningdek, davlatimiz rahbari tomonidan olib borilayotgan islohotlar bardavom bo‘lishini doimo Rabbimizdan so‘raymiz. Zero, Alloh taolo Qur’oni karimda: “Menga duo qiling va sizga ijobat qilurman...”, deb marhamat qilgan.

Alisher NAIMOV,

Farg‘ona viloyati bosh imom-xatibi o‘rinbosari,

Quvasoy shahar bosh imom-xatibi

Boshqa maqolalar

Telefonning ko‘rinmas zanjirlari

12.10.2026   57752   6 min.
Telefonning ko‘rinmas zanjirlari

UYALI TЕLЕFON:

QULAYLIK BILAN BIRGA KЕLADIGAN XAVFLAR.

KO‘RINMAS ZARARLARI.

HAYOTIMIZDAN NIMALARNI TORTIB OLMOQDA?

 

Xorijiy ommaviy axborot vositalari tarqatgan ma’lumotlarga ko‘ra,

zamonaviy olimlar hamda turli soha mutaxassislari

“UYALI TЕLЕFONNING INSON HAYOTI VA SOG‘LIG‘IGA SALBIY TA’SIRLARI” mavzusida qator mamlakatlarda olib borilgan

ilmiy tadqiqotlar, ko‘p yillik kuzatuvlar va amaliy tajribalar

asosida MUHIM ILMIY XULOSALARga keldilar:

 

  1. Texnologiya – yaxshi xizmatkor, ammo yomon xo‘jayin. Agar biz uni boshqarmasak, vaqt o‘tib u bizni boshqara boshlaydi.
  2. Uyali telefon kelajak avlodni yo‘q qilish bosqichida turibti. Agar o‘zimizni nazorat qilmasak, u bizning ruhiyatimizga ham raxna soladi.
  3. U inson hayotidagi o‘nlab vositalarning o‘rnini bosdi, ba’zilarini esa deyarli unuttirdi.
  4. Uning o‘zi emas, balki undan me’yorsiz va ongsiz foydalanish sog‘ligimizga, tafakkurimizga va munosabatlarimizga zarar yetkazishi mumkin.
  5. Eng katta xavf shundaki, agar undan me’yorsiz foydalansa, u asta-sekin insonni aqlini o‘ldiradi.

 


(I)  UYALI TЕLЕFON KO‘P HOLLARDA O‘RNINI QISMAN BOSGAN YOKI

ULARGA BO‘LGAN EHTIYOJNI KAMAYTIRGAN AYRIM NARSALAR:

 

  1. Soat.
  2. Budilnik.
  3. Radio.
  4. Statsionar telefon.
  5. Kalkulyator.
  6. Televizor.
  7. Fonar.
  8. Oyna.
  9. Gazeta.
  10. Jurnal.
  11. Kitob.
  12. Kompas.
  13. Xaritalar.
  14. Cho‘ntak hamyoni.
  15. Stol taqvimi.
  16. Kundalik.
  17. Diktofon.
  18. Fotoapparat.
  19. Videokamera.
  20. Musiqa pleyerlari.
  21. Video o‘yin qurilmalari.
  22. Kompyuter.
  23. Plastik kartalar.
     

 

(II)    UYALI TЕLЕFONDAN MЕ’YORSIZ FOYDALANISH OQIBATIDA

ZARAR KO‘RAYOTGAN QADRIYATLAR:

 

  1. Ko‘plab nikohlarni o‘ldirdi.
  2. Ko‘plab oilalarni o‘ldirdi.
  3. Yoshlarimizning tarbiyasini o‘ldirdi.
  4. Asta-sekin ko‘zlarimiz nurini ham o‘ldirmoqda.
  5. Jonli suhbat madaniyatini o‘ldirmoqda.
  6. Qo‘ni-qo‘shnichilik va mehmonga borish odatini o‘ldirmoqda.
  7. Sabr-toqatni o‘ldirmoqda.
  8. Kitob mutolaasiga bo‘lgan qiziqishni o‘ldirmoqda.
  9. Bolalarning ko‘chada o‘ynashi va jismoniy faolligini o‘ldirmoqda.
  10. Ota-ona bilan farzand o‘rtasidagi samimiy muloqotni o‘ldirmoqda.
  11. Diqqatni jamlash qobiliyatini o‘ldirmoqda.
  12. Vaqtning barakasini o‘ldirmoqda.
  13. Xotirani mashq qilish ehtiyojini o‘ldirmoqda.
  14. Mustaqil fikrlashga ajratiladigan vaqtni o‘ldirmoqda.
  15. Tinchlik va sukunatdan zavqlanishni o‘ldirmoqda.
  16. Tabiat bilan yaqinlikni o‘ldirmoqda.
  17. Insonlarning bir-biriga yuzma-yuz mehr va e’tibor ko‘rsatish odatini o‘ldirmoqda.

     

  (III)   UYALI TЕLЕFON SABAB YO‘QOTILAYOTGAN

ENG MUHIM NЕ’MATLAR:

 

  1. Oilaviy mehr va iliq munosabatlar.
  2. Ayrim oilalarning mustahkamligi.
  3. Farzand tarbiyasiga yetarlicha e’tibor.
  4. Kitob mutolaasiga bo‘lgan qiziqish.
  5. Diqqatni bir nuqtaga jamlash qobiliyati.
  6. Xotirani mashq qilish odati.
  7. Sabr-toqat.
  8. Vaqtning barakasi.
  9. Ko‘z nuri, bo‘yin va umurtqa salomatligi.
  10. To‘g‘ri qaddi-qomat va sog‘lom umurtqa.
  11. Umurtqa pog‘onasi va bo‘yin umurtqa.
  12. Aqliy faollik.
  13. Ruhiy xotirjamlik va ichki sokinlik.
  14. Aqlni ishlatish odati.
  15. Mustaqil fikrlash qobiliyati.
  16. Chuqur mushohada qilish ko‘nikmasi.
  17. Uzoq vaqt davomida diqqat-e’tiborni jamlash qobiliyati.
  18. Vaqtni qadrlash tuyg‘usi.
  19. Sabr bilan izlanish odati.
  20. Yangi bilimni mustaqil izlab topish ko‘nikmasi.
  21. Xotirani mashq qilish ehtiyoji.
  22. Jonli suhbat va samimiy muloqot.
  23. Tinglash madaniyati.
  24. Kitob o‘qishga bo‘lgan mehr.
  25. Tafakkur chuqurligi.
  26. Ijodkorlik.
  27. Xayol surish va orzu qilish uchun vaqt.
  28. Tabiatdan zavqlanish hissi.
  29. Sukunatdan bahra olish odati.
  30. Insonlar o‘rtasidagi mehr-oqibat.
  31. Oila davrasidagi suhbatlar.
  32. Farzand tarbiyasiga ajratiladigan kerakli e’tibor.
  33. Farzandlar bilan birga o‘tkaziladigan sifatli vaqt imkoniyati.
  34. Vijdon bilan o‘z-o‘zini tahlil qilish odati.
  35. Jonli muloqot madaniyati.
  36. Pochta orqali xat yozish odati.
  37. Va eng achinarlisi – insonning o‘z-o‘zi bilan yolg‘iz qolib, fikr yuritish qobiliyati.

     

  (IV)  UYALI TЕLЕFONNING INSON SALOMATLIGIGA AYRIM ZARARLARI:

  1. Ko‘zning toliqishi va ko‘rish qobiliyatining pasayishi.
  2. Quruq ko‘z sindromini keltirib chiqarishi.
  3. Bo‘yin va yelka mushaklarida og‘riqlarni keltirib chiqarishi.
  4. Umurtqa pog‘onasiga ortiqcha bosim tushirishi.
  5. Bilak va barmoq bo‘g‘imlarida og‘riq paydo qilishi.
  6. Bosh og‘rig‘i va ko‘z charchog‘ini kuchaytirishi.
  7. Uyqu sifati va biologik ritmning buzilishi.
  8. Melatonin gormoni ishlab chiqarilishining kamayishi.
  9. Asabiylik va jizzakilikni oshirishi.
  10. Xavotir hissini kuchaytirishi.
  11. Diqqatni jamlash qobiliyatini susaytirishi.
  12. Ko‘rish qobiliyati, bo‘yin va umurtqa salomatligiga jiddiy xavf tug‘dirishi.
  13. Qaddi-qomatning buzilishi va umurtqa salomatligining yomonlashishi.
  14. Umurtqa pog‘onasi va bo‘yin umurtqalarida o‘zgarishlar yuzaga kelishi.
  15. Aqliy faoliyatning kamayishi.
  16. Fikrlash faolligining pasayishi.
  17. Ruhiy xotirjamlik va ichki sokinlikning kamayishi.
  18. Xotira faoliyatiga salbiy ta’sir ko‘rsatishi.
  19. Telefonga qaramlik (addiksiya)ni shakllantirishi.
  20. Jismoniy harakatning kamayishiga sabab bo‘lishi.
  21. Ortiqcha vazn va semirish xavfini oshirishi.
  22. Kamharakatlik tufayli yurak-qon tomir kasalliklari uchun xavf omillarini kuchaytirishi.
  23. Ruhiy charchoq va stressni kuchaytirishi.
  24. Mustaqil fikrlash qobiliyati kamayishi.
  25. Ijtimoiy yakkalanishga olib kelishi.
  26. Bolalar va o‘smirlarda diqqatni jamlash va o‘qish samaradorligini pasaytirishi.
  27. Avtomobil haydash yoki yo‘ldan o‘tish paytida foydalanilsa, baxtsiz hodisalar xavfini bir necha barobar oshirishi.
     

 

  • U L O S A : 

 

  • Telefon – aybdor emas.

 

  • U insoniyatning eng buyuk ixtirolaridan biri.

 

  • Ammo uning quliga emas, egasiga aylanish kerak.

 

  • Ilmiy nuqtayi nazardan, zararlarning ko‘pi telefonning o‘zi emas, balki undan uzoq vaqt va noto‘g‘ri foydalanish bilan bog‘liq.

 

  • Telefonni maqsadli, me’yorli, ongli ravishda va aql bilan ishlatgan inson undan foyda ko‘radi.

 

  • Me’yorsiz foydalangan inson esa vaqti, sog‘ligi, oilasi va xotirjamligidan ayrilishi mumkin.

 

Ibrohimjon domla Inomov.