Bismillahir Rohmanir Rohiym
Bir qancha odamlar Imom Shofe’iy rahmatullohi alayhning huzuriga kelib, undan Alloh taoloning borligi haqida dalil keltirishini so‘radi.
Imom Shofe’iy rahimahulloh: “Buning dalili tut bargidir”, deb javob berdi.
Odamlar javobdan hayratlanib, batafsilroq tushuntirishini so‘rashdi.
Imom Shofe’iy rahmatullohi alayh bunday dedi: “Tut barglari bir xil shakl va ta’mga ega, ammo
• ipak qurti uni yesa, ipak olinadi;
• nektarini asalarilar yig‘sa, asal olinadi;
• kiyik undan iste’mol qilsa, xushbo‘ylik, mushk chiqaradi.
Birgina bargdan shuncha turli narsalarni chiqarishga qaysi Zot qodir ekan!?
Odamlar o‘ylanib, jim bo‘lib qolishganda, Imom Shofe’iy rahimahulloh: “Alloh barcha narsani yaratuvchisidir”, oyatini o‘qidi (Ra’ad surasi, 16-oyat).
Manba: Abdulaziz Rojihiyning “Sharhi Tafsiri Ibn Kasir” kitobidan.
TII Hadis va islom tarixi fanlari kafedrasi
katta o‘qituvchisi Po‘latxon KATTAYEV tayyorladi
Shu kunlarda Ummon Sultonligining Masqat shahridagi "Hilton Muscat Al Bandar" majmuasida "Masqat harakatlar rejasi global forumi" (Muscat Plan Global Forum) bo‘lib o‘tmoqda. Joriy yilning 15-16 noyabr kunlariga mo‘ljallangan ushbu nufuzli anjumanda O‘zbekiston musulmonlari idorasi raisining birinchi o‘rinbosari Homidjon domla Ishmatbekov ham ishtirok etmoqda.
Mazkur xalqaro forum Birlashgan Millatlar Tashkilotining Genotsidning oldini olish va himoya qilish mas’uliyati bo‘yicha boshqarmasi (UNOSAPG), Ummon Sultonligi Vaqf va diniy ishlar hamda Tashqi ishlar vazirliklari, shuningdek, "Din va an’anaviy tinchlikparvarlar tarmog‘i" (The Network for Religious and Traditional Peacemakers) hamkorligida tashkil etilgan.
Tadbirning asosiy maqsadi kamsitish va zo‘ravonlikning oldini olish, shuningdek, o‘zaro muloqot, bag‘rikenglik va tinch-totuvlikni keng targ‘ib qilishda amaliy yondashuvlarni ishlab chiqishdan iborat.
E’tiborlisi, forumning asosiy tadbirlari Birlashgan Millatlar Tashkilotining Xalqaro bag‘rikenglik kuniga (16 noyabr) to‘g‘ri kelgan bo‘lib, bu o‘zaro hurmat va tinch-totuv yashash qadriyatlarini mustahkamlash uchun muhim platforma vazifasini o‘taydi.
Xalqaro tadbirda dunyoning turli davlatlaridan kelgan taniqli ulamolar, diniy va an’anaviy yetakchilar, hukumat vakillari, BMT va boshqa yirik xalqaro tashkilotlar mutasaddilari jam bo‘lgan. Forum dasturi doirasida muhim sessiyalar bo‘lib o‘tmoqda. Jumladan, tinchlik va xavfsizlikni ta’minlashda xalqaro hamkorlik mexanizmlari, nafratli nutqlarga qarshi kurashish hamda bag‘rikenglikni ilgari surishda diniy yetakchilar va ommaviy axborot vositalarining o‘rni kabi mavzularda yuqori darajadagi muhokamalar olib borilmoqda.
O‘zbekiston vakillarining bunday nufuzli xalqaro anjumanlardagi ishtiroki yurtimizda olib borilayotgan diniy-ma’rifiy sohadagi islohotlar, dinlararo bag‘rikenglik va tinchliksevarlik tamoyillarini jahon hamjamiyatiga yetkazishda muhim ahamiyat kasb etadi.
O‘zbekiston musulmonlari idorasi
Matbuot xizmati