Alloh taolo Payg‘ambarimiz sollallohu alayhi va sallamga bir qancha sinovlarni yubordi. Hali dunyoga kelmasidan otalaridan, olti yoshida onalaridan, sakkiz yoshida suyanchig‘i – bobolaridan ayrildilar.
Islom ummat orasida keng yoyilguncha ko‘plab mashaqqatlar chekdilar. Yettita farzandlaridan oltitasini o‘z qo‘llari bilan yerga qo‘ydilar. Payg‘ambarimiz Muhammad alayhissalom bularning barchasiga go‘zal sabr qildilar.
Ulamolar aytadilarki, bu sinovlar bilan Alloh taolo Rasulimizning hayotlaridagi har bir lahzasini qiyomatga qadar keladigan ummatlari uchun dasturilamal bo‘lishini iroda qilgan.
Barcha mo‘minlar xotirjamlik, taqdirdagi yaxshilik ham, yomonlik ham Alloh taolodan ekaniga iymon keltiradi. Payg‘ambarimiz sollallohu alayhi va sallam mana shu iymonni hayotlarida o‘zlari yaqqol ko‘rsatib berganlar.
Abu Bakr Siddiq roziyallohu anhu bilan Makkai mukarramadan Madinaga hijrat qilib ketayotganlarida orqalaridan ularni qatl qilish uchun kelayotganlar bor edi. Abu Bakr bundan qattiq xavotirda ularni ko‘rib: “Yo Rasululloh, yaqinlashib qolyapti-da”, dedi. Payg‘ambarimiz alayhissalom esa: “Xotirjam bo‘ling”, dedilar. Yoki g‘orda Abu Bakr: “Rasululloh hozir sal egilsalar, bizlarni ko‘rib qoladi”, dedi. Rasululloh sollallohu alayhi va sallam: “Qo‘rqma, Alloh biz bilan-ku”, deya Abu Bakrni xotirjam qildilar.
Rasululloh qabristondan o‘tib ketayotganlarida bir ayol dod-faryod bilan sochlarini yulib, yuzlarini tirnab, butun bag‘ri bilan o‘zini yerga urib yotgandi. Payg‘ambar alayhissalom unga: “Sabr qiling”, dedilar. U: “Siz yo‘lingizda ketavering, men bilan nima ishingiz bor?” deya qo‘pollik qildi. Rasululloh: “Sabr qilsangiz yaxshi bo‘ladi”, deya ketdilar. Keyin sahobai kiromlar keldilar: “Ey onaxon, nima qilib qo‘ydingiz, bu kishi kimligini bilasizmi, Payg‘ambarimiz alayhissalom edilar-ku, yaxshi ish qilmadingiz, beodoblik qilib qo‘ydingiz. Siz bir farzandingizdan ayrilgan bo‘lsangiz, bu kishi bir necha farzandlarini yer bag‘riga qo‘yganlar-ku”, deyishganda, boyagi ayol xatosini anglab, so‘ngra Rasulullohdan borib uzr so‘radi. Shunda Payg‘ambarimiz sollallohu alayhi va sallam: “Albatta, sabr (musibatning) birinchi zarbasidadir”, deb marhamat qildilar.
Hayotda har qanday holatda ham sabr qilish, kishi o‘zini xotirjam tutishi Payg‘ambarimizdan bizga berilgan sunnatdir. Unga ergashganlargina ikki dunyoda ham saodat topadilar, inshoalloh.
Zayniddin ESHONQULOV,
O‘zbekiston musulmonlari idorasi
raisi o‘rinbosari
"Hidoyat" jurnalining 7-sonidan
Shu kunlarda Ummon Sultonligining Masqat shahridagi "Hilton Muscat Al Bandar" majmuasida "Masqat harakatlar rejasi global forumi" (Muscat Plan Global Forum) bo‘lib o‘tmoqda. Joriy yilning 15-16 noyabr kunlariga mo‘ljallangan ushbu nufuzli anjumanda O‘zbekiston musulmonlari idorasi raisining birinchi o‘rinbosari Homidjon domla Ishmatbekov ham ishtirok etmoqda.
Mazkur xalqaro forum Birlashgan Millatlar Tashkilotining Genotsidning oldini olish va himoya qilish mas’uliyati bo‘yicha boshqarmasi (UNOSAPG), Ummon Sultonligi Vaqf va diniy ishlar hamda Tashqi ishlar vazirliklari, shuningdek, "Din va an’anaviy tinchlikparvarlar tarmog‘i" (The Network for Religious and Traditional Peacemakers) hamkorligida tashkil etilgan.
Tadbirning asosiy maqsadi kamsitish va zo‘ravonlikning oldini olish, shuningdek, o‘zaro muloqot, bag‘rikenglik va tinch-totuvlikni keng targ‘ib qilishda amaliy yondashuvlarni ishlab chiqishdan iborat.
E’tiborlisi, forumning asosiy tadbirlari Birlashgan Millatlar Tashkilotining Xalqaro bag‘rikenglik kuniga (16 noyabr) to‘g‘ri kelgan bo‘lib, bu o‘zaro hurmat va tinch-totuv yashash qadriyatlarini mustahkamlash uchun muhim platforma vazifasini o‘taydi.
Xalqaro tadbirda dunyoning turli davlatlaridan kelgan taniqli ulamolar, diniy va an’anaviy yetakchilar, hukumat vakillari, BMT va boshqa yirik xalqaro tashkilotlar mutasaddilari jam bo‘lgan. Forum dasturi doirasida muhim sessiyalar bo‘lib o‘tmoqda. Jumladan, tinchlik va xavfsizlikni ta’minlashda xalqaro hamkorlik mexanizmlari, nafratli nutqlarga qarshi kurashish hamda bag‘rikenglikni ilgari surishda diniy yetakchilar va ommaviy axborot vositalarining o‘rni kabi mavzularda yuqori darajadagi muhokamalar olib borilmoqda.
O‘zbekiston vakillarining bunday nufuzli xalqaro anjumanlardagi ishtiroki yurtimizda olib borilayotgan diniy-ma’rifiy sohadagi islohotlar, dinlararo bag‘rikenglik va tinchliksevarlik tamoyillarini jahon hamjamiyatiga yetkazishda muhim ahamiyat kasb etadi.
O‘zbekiston musulmonlari idorasi
Matbuot xizmati