Qozog‘iston bosh masjidi ziyorati va qardosh xalqlarga chiroyli mav’iza
Qozog‘iston safari asnosida O‘zbekiston musulmonlari idorasi raisi, muftiy Shayx Nuriddin Xoliqnazar hazratlari bugungi juma namozini ado etish uchun qardosh muftiylar bilan birga Ostona shahridagi Qozog‘iston bosh masjidiga keldilar. Dastlab martabali mehmonlar mazkur mahobatli masjidda namozxonlarga yaratilgan sharoit va imkoniyatlar bilan yaqindan tanishdilar.
Shundan so‘ng Qozog‘iston bosh muftiysi Navro‘zbay hoji muhtaram mehmonlarni namozxonlarga tanishtirib, Shayx Nuriddin Xoliqnazar hazratlariga so‘z berdi.
O‘zbekiston muftiysi masjidga yig‘ilgan mo‘min-musulmonlarga o‘zlarining salom va iliq tilaklarini bildirgan holda, do‘stu birodarlik fazilati, tinchlik-osoyishtalik ne’mati haqida so‘z qildilar. Qozog‘iston mezbonligidagi Turkiy davlatlar muftiylari kengashi yig‘ilishi va uning doirasidagi tadbirlar yuqori saviyada muvaffaqiyatli o‘tgani, uchrashuv va hamkorlik aloqalari qardosh xalqlar do‘stligiga ulkan hissa qo‘shishini alohida qayd etdilar.
Juma namozi davomida qardosh davlatlar muftiylari minglab namozxonlardan iborat katta jamoat bilan Haq taolodan butun dunyoda tinchlik-osoyishtalik bo‘lishi, dindosh va qondosh xalqlarimiz ahlligi bardavom bo‘lishini so‘rab xayrli duolar qildilar.
O‘zbekiston musulmonlari idorasi
Matbuot xizmati
“Em Insight”: Toshkentdagi xalqaro mediaforum islom sivilizatsiyasining zamonaviy qiyofasini namoyon etdi
Britaniyaning “Em Insight” jurnalida O‘zbekistonda bo‘lib o‘tgan “Islom sivilizatsiyasi: yangi nigoh, yangi kashfiyotlar” mavzusidagi xalqaro mediaforumga bag‘ishlangan maqola e’lon qilindi, deb xabar bermoqda “Dunyo” AA.
Nashrda yozilishicha, O‘zbekiston Islom sivilizatsiyasi markazi tomonidan tashkil etilgan “Islom sivilizatsiyasi: yangi nigoh, yangi kashfiyotlar” xalqaro mediaforumi xorijlik OAVda katta qiziqish uyg‘otgan.
Raqamli platformalar, sun’iy intellekt va axborot xurujlari avj olgan hozirgi zamonda ommaviy axborot vositalarining mamlakatlar, madaniyatlar va sivilizatsiyalar haqidagi tasavvurlarni shakllantirishdagi o‘rni tobora ortib bormoqda.
Maqolada ta’kidlanishicha, Al-Xorazmiy, Ibn Sino, Beruniy, Imom Buxoriy, Imom Termiziy va Mirzo Ulug‘bek kabi jahon ilm-fani rivojiga beqiyos hissa qo‘shgan buyuk mutafakkirlar yurti bo‘lmish O‘zbekiston bu kabi global muhokamalar uchun eng maqbul maydondir.
Qatarning “The Peninsula” gazetasi mas’ul muharriri Muhammad Osmon forumning raqamli axborot asridagi ahamiyatiga to‘xtalib, Imom Buxoriyning hadislarni to‘plash va ularning haqqoniyligini tekshirishdagi qat’iy yondashuvini tilga oldi.
U ushbu metodologiyani manbalarni chuqur o‘rganish va verifikatsiya qilishning o‘chmas namunasi deb atadi va bu tamoyillar feyk xabarlar hamda sun’iy intellekt mahsulotlari ko‘paygan hozirgi davrda juda ahamiyatli ekanini bildirdi.
O‘zbekiston Milliy axborot agentligi muharriri O‘tkir Alimov forumning Mustaqillikning 35 yilligi ostonasida o‘tkazilayotganiga e’tibor qaratgan. U 50 mamlakatdan 300 ga yaqin OAV vakillarining Toshkentda jamlangani O‘zbekistonning sivilizatsiyalar chorrahasi sifatidagi o‘rni ortib borayotganidan dalolat berishini ta’kidladi.
Maqolada Toshkentdagi xalqaro mediaforum jurnalistika mas’uliyati, tarixiy tadqiqotlar chuqurligi va zamonaviy texnologiyalar imkoniyatlarini birlashtirgan holda Islom sivilizatsiyasini yangi, zamonaviy qiyofada dunyoga tanitishga xizmat qilishi bayon etilgan.
O‘zbekiston musulmonlari idorasi Matbuot xizmati