Keksalarni e’zozlash – oliy qadriyat (Fotolavha)
Yoshi ulug‘ insonlarni e’zozlash, ularga hurmat-ehtirom ko‘rsatish ham dinimiz talabi, ham milliy qonunlarimiz in’ikosidir. Zero, Abdulloh ibn Amr roziyallohu anhu rivoyat qilgan hadisda Nabiy alayhissalom: «Kichiklarimizga rahm qilmagan, kattalarimiz haqlariga rioya qilmagan kishi bizdan emas», deb marhamat qilganlar (Imom Abu Dovud rivoyati).
Toshkent shahar bosh imom-xatibi Abduqahhor domla Yunusov poytaxtimizdagi Ijtimoiy qo‘llab-quvvatlash markaziga tashrif buyurib, u yerda doimiy yashayotgan o‘zgalar ko‘magiga muhtoj keksa otaxonu onaxonlar holidan xabar oldilar.
Abduqahhor domlani Farangiz Akramova kutib oldi.
Vazirlar Mahkamasining "Keksalar haftaligi" doirasida o‘tkazilayotgan ushbu tadbir yoshi ulug‘larimizni mamnun etmoqda.
Shundan so‘ng otaxonu onaxonlar e’zozu ehtirom ila maxsus avtobuslarda «Tashkent city» ko‘ngilochar maskaniga olib borilib, sayohat uyushtirildi.
Yoshi ulug‘ insonlar poytaxtimizning qoq markazidagi obod maskanlarni aylanib, tomosha qilib, ko‘ngillari tog‘dek ko‘tarildi. Yurtimizda amalga oshirilayotgan bunyodkorlik va obodlik ishlariga yuksak baho berib, bu ezgu ishlarning boshida turgan aziz insonlarning haqlariga xayrli duolar qildilar.
So‘ngra aziz mehmonlar «Rayhon» milliy taomlari oshxonasida tushlik qilishdi.
Avtobuslarda yoshi ulug‘ insonlar yana o‘z manzillariga yetib olishdi. Ularga Toshkent shahar vakilligi jamoasi tomonidan sovg‘alar, hadyalar ulashildi.
Ha, keksalarimizning holidan xabar olish, ularning xizmatini qilish – katta savob. Chunki bir insonning ko‘nglini ko‘tarish, og‘irini yengil, uzog‘ini yaqin qilishdan banda-ku sevinadi, Yaratgan ham rozi bo‘ladi.
Alloh taolo xayrsevar insonlardan rozi bo‘lsin.
O‘zbekiston musulmonlari idorasi
Matbuot xizmati
Pol Kapur: «Bu yerda tarixni nafaqat ko‘rasiz, balki uni his qilasiz»
AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur O‘zbekistondagi Islom sivilizatsiyasi markaziga tashrif buyurdi, xabar bermoqda iccu.uz.
Islom sivilizatsiyasining ko‘p asrlik tarixi, uning ilm-fan, madaniyat va ma’rifat taraqqiyotiga qo‘shgan ulkan hissasi O‘zbekistondagi Islom sivilizatsiyasi markazi ekspozitsiyalarida yaxlit va ta’sirchan tarzda namoyon etilgan. Tashrif davomida Samir Pol Kapur islomgacha bo‘lgan davr sivilizatsiyalaridan tortib, Yangi O‘zbekiston davriga qadar bo‘lgan tarixiy jarayonlarni aks ettiruvchi galereyalar, buyuk allomalarning ilmiy-ma’rifiy merosi, noyob qo‘lyozmalar, muqaddas yodgorliklar hamda zamonaviy raqamli texnologiyalar asosida yaratilgan interaktiv ekspozitsiyalar bilan yaqindan tanishdi.
Mehmon ekspozitsiyalarning mazmunan izchilligi va tarixiy jarayonlarni bir-biri bilan uzviy bog‘liq holda namoyon etish usuliga alohida e’tibor qaratdi. Uning qayd etishicha, bu yerda muzey eksponatlari orqali o‘tmish haqida ma’lumot olish bilan cheklanib qolmay, tarixiy davrlar ruhini his qilish, ular o‘rtasidagi bog‘liqlikni anglash imkoni ham mavjud.
Samir Pol Kapur o‘z taassurotlarini quyidagicha ifodaladi:
«Bu muhtasham maskan. Islom tarixi va madaniyatining asrlar davomidagi taraqqiyoti bilan yaqindan tanishish men uchun unutilmas tajriba bo‘ldi. Bu yerda tarixni shunchaki kitob sahifalari orqali emas, balki o‘z ko‘zingiz bilan ko‘rasiz, uni his qilasiz va go‘yo o‘sha davrlarning ichida bo‘lasiz. Shu bois ushbu noyob maskanni barpo etishga hissa qo‘shgan barcha insonlarga samimiy minnatdorchilik bildiraman.
Yoshlarga ham bu yerga kelishni albatta tavsiya qilaman. Chunki bu maskan nafaqat tarixni o‘rganish, balki o‘tmish bilan kelajak o‘rtasidagi uzviy bog‘liqlikni anglash imkonini beradi. Men uchun eng esda qolarli lahzalardan biri Qur’oni karimga bag‘ishlangan golografik namoyish bo‘ldi. U menda katta taassurot va hayajon uyg‘otdi.
Menimcha, bu dargoh islom sivilizatsiyasining jahon tamadduniga qo‘shgan ulkan hissasini butun dunyoga namoyon etishga xizmat qiladi. Shuning uchun har bir inson bu yerga tashrif buyurib, ana shu boy va bebaho meros bilan shaxsan tanishishi lozim».
Pol Kapurning fikricha, Markazning ahamiyati uning tarixiy merosni namoyon etish bilangina cheklanmaydi. Ushbu maskan yosh avlod uchun o‘tmish saboqlarini anglash, ilm-fan va ma’rifatning sivilizatsiya taraqqiyotidagi o‘rnini his etish, milliy va umuminsoniy qadriyatlarga hurmat ruhini shakllantirish uchun ham muhim ma’naviy-ma’rifiy maydon vazifasini o‘taydi.
Tashrif yakunida AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur Islom sivilizatsiyasi markazidan olgan taassurotlari yuksak ekanini qayd etib, ushbu maskan boy tarixiy merosni zamonaviy muzey texnologiyalari va ta’sirchan taqdimot usullari orqali jahon jamoatchiligiga yetkazishda muhim ahamiyat kasb etishini ta’kidladi.
O‘zbekiston musulmonlari idorasi Matbuot xizmati