O`zbekiston musulmonlari idorasi

Yangiliklar

"Biz giyohvandlikka qarshimiz" shiori ostida o‘tkazilayotgan targ‘ibot tadbirlarida imom-xatiblar faol ishtirok etmoqda

10.10.2024 8870 1 min.

Keyingi asrlarda butun kurrai zaminga keng tarqalgan bir illat bugungi kunda hammamizga tashvish bo‘lmoqda. Bu illat — giyohvandlik.

Inson uchun eng bebaho boylik — bu sog‘lik-salomatlikdir. Uni asrash esa har birimizga omonat qilib berilgan. Islom dinida ham inson joni, aqli va sihat-salomatligini saqlash, muhofaza etish eng muhim maqsadlardan bo‘lib hisoblanadi.

Giyohvand moddalarni iste’mol qilish inson kamolotiga, imon-e’tiqodiga xavf xatar solish bilan bir qatorda mustaqil mamlakatimiz rivojlanishi va taraqqiyotiga ham o‘ta salbiy ta’sir ko‘rsatadi.

Giyohvandlik nafaqat bu illat bilan shug‘ullanuvchilarga, balki butun jamiyatga tahdid soladi. Farg‘ona viloyatida "Dolzarb oylik" doirasida "Biz giyohvandlikka qarshimiz" shiori ostida targ‘ibot tadbirlari o‘tkazilmoqda. Hududlar bo‘ylab o‘tkazilayotgan shu kabi tadbirlarda imom-xatiblar faol qatnashib, dinimiz ta’limotlarida inson salomatligiga e’tibor, giyohvandlik illatining zarari va keltirib chiqarishi mumkin bo‘lgan oqibatlari xususida aholiga, xususan, yosh avlod vakillariga keng tarzda tushuncha berishmoqda.

Milliy gvardiyaning viloyat boshqarmasida bo‘lib o‘tgan targ‘ibot tadbirida "Xo‘jamberdiboy" masjidi imom-xatibi Husniddin Tursunzoda, Buvayda tumanidagi tadbirda tuman bosh imom-xatibi Ahmadxon domla Nizomov, Qo‘shtepa tumani Kadastr agentligi hamda "Hududgaz"ning tuman bo‘limida o‘tkazilgan tadbirda tuman bosh imom-xatibi Abduxoshim Ahmadaliyevlar ishtirok etdi.

O‘tkazilayotgan targ‘ibot tadbirlaridan asosiy maqsad, asr muammosi va unga qarshi ko‘rilayotgan choralarni jadallashtirish, aholi, ayniqsa, yoshlarni bunday illatlarga berilib qolishining oldini olishdan iboratdir.

Joylarda bu kabi tadbirlar davom etmoqda.

Farg‘ona viloyati vakilligi Matbuot xizmati