Sayt test holatida ishlamoqda!
16 Noyabr, 2026   |   6 Jumadul soni, 1448

Toshkent shahri
Tong
05:50
Quyosh
07:12
Peshin
12:13
Asr
15:22
Shom
17:06
Xufton
18:23
Bismillah
16 Noyabr, 2026, 6 Jumadul soni, 1448

O‘z tabiating bilan muomala qil

10.10.2024   5377   2 min.
O‘z tabiating bilan muomala qil

Bismillahir Rohmanir Rohiym

Keksa bir donishmand daryo bo‘yida o‘tirsa, suvda mushuk oqib kelayotganiga ko‘zi tushdi. Mushuk suvdan chiqishga urunar, ammo uddalay olmas edi. Donishmand mushukni qutqarishga qaror qildi va unga qo‘lini uzatdi. Mushuk esa, donishmandning qo‘lini timdalab oldi.

Donishmandning joni og‘rib, dodlagancha qo‘lini tortib oldi. Birozdan so‘ng yana mushuk tomon qo‘lini uzatdi. Mushuk esa, yana uning qo‘lini timdalab oldi. Bu gal ham qo‘li qattiq og‘rigan donishmand dodlab qo‘lini tortib oldi. Shu yerga yaqinroq joyda boshqa bir kishi donishmandning hatti-harakatini kuzatib turgan ekan.

Donishmand uchinchi bor mushukni suvdan chiqarish uchun qo‘lini cho‘zganda boyagi kishi unga qarab: “Ey mo‘ysafid, birinchi marta ham, ikkinchi marta ham qo‘lingizni timdalab olganidan xulosa qilmay, yana uchinchi marta ham uni qutqarish uchun qo‘lingizni cho‘zyapsizmi?” dedi.

Donishmand esa, uning gapiga e’tibor bermay mushukka qo‘lini cho‘zdi va bu gal uni suvdan chiqarib oldi. Shundan keyin donishmand boyagi kishining oldiga borib, uning yelkasiga qo‘lini qo‘ydi va: “Ey inim, mushukni ishi timdalash, meni ishim esa mehr ko‘rsatish. Nima uchun men uning tabiatidagi narsa uchun o‘z tabiatimdagi narsadan voz kechishim kerak. Sen shuni istaysanmi? Ey inim, sen boshqalarga o‘z tabiating bilan muomala qilgin, ularning tabiati bilan emas, garchi ularning tabiati senga ozor bersada. Yana shuni bilginki, boshqalar sening oliyjanob muomalangga munosib bo‘lmasalarda, ularga o‘shanday muomala qilishingdan seni qaytaradiganlarning chaqirig‘iga quloq solma!”.

Modomiki, sen o‘zgalarni baxtli qilish uchun yashar ekansan, albatta Alloh taolo seni baxtli qiladigan boshqa kishilarni ham chiqarib qo‘yadi. “Yaxshilikning mukofoti faqat yaxshilikdir”. Xulqingni go‘zal qilsang xaloyiq seni yaxshi ko‘radi. Hech qachon boshqalarni baxtli qilgan lahzang uchun nadomat chekma, garchi o‘shalar bu yaxshiliginga arzimasalarda, dedi.

Homidjon domla ISHMATBЕKOV

Boshqa maqolalar
Yangiliklar

«Uchinchi Renessans chorrahasi»: Imom-xatiblar uchun ilm, tarix va ma’rifat muloqoti tashkil etildi

16.11.2026   1125   3 min.
«Uchinchi Renessans chorrahasi»: Imom-xatiblar uchun ilm, tarix va ma’rifat muloqoti tashkil etildi

O‘zbekistondagi Islom sivilizatsiyasi markazida Toshkent shahri va Navoiy viloyatidan tashrif buyurgan imom-xatiblar ishtirokida “Uchinchi Renessans chorrahasi” mavzusi doirasida ma’rifiy tadbir tashkil etildi, xabar bermoqda iccu.uz.

Tashrif avvalida ishtirokchilar uchun mahorat darsi o‘tkazildi. Unda diniy-ma’rifiy faoliyatda zamonaviy yondashuvlar, milliy va diniy qadriyatlarni targ‘ib etish, tarixiy merosni yosh avlodga yetkazish masalalariga e’tibor qaratildi. Shuningdek, mehmonlarga “Men” nomli hujjatli film namoyish etildi.

Shundan so‘ng imom-xatiblar Prezident Shavkat Mirziyoyev tashabbusi bilan barpo etilgan Markazning muzey ekspozitsiyalari bilan tanishdi. Ular yurtimiz hududida shakllangan qadimgi sivilizatsiyalar, islom ilm-fani taraqqiyoti, buyuk allomalar hayoti va ilmiy merosiga oid tarixiy manbalar, noyob eksponatlar hamda zamonaviy multimedia yechimlari bilan yaqindan tanishish imkoniga ega bo‘ldi. Ayniqsa, Qur’oni karim zalida saqlanayotgan Usmon mus'hafi va turli davrlarga oid nodir Qur’on nusxalari ishtirokchilarda katta taassurot qoldirdi.

Tashrifning muhim yo‘nalishlaridan biri Markazning ilmiy-tadqiqot va ma’rifiy faoliyati bilan tanishish bo‘ldi. Jumladan, mehmonlarga kutubxona faoliyati, uning fondidan o‘rin olgan ilmiy adabiyotlar, qo‘lyozmalar, elektron axborot resurslari hamda tadqiqotchilar uchun yaratilgan imkoniyatlar haqida batafsil ma’lumot berildi.

Shuningdek, Markazning ikkinchi qavatida joylashgan xalqaro ilmiy-ma’rifiy platforma faoliyatiga alohida e’tibor qaratildi. Ishtirokchilarga ushbu platformaning asosiy vazifasi — islom sivilizatsiyasi merosini xalqaro miqyosda o‘rganish va targ‘ib etish, jahonning nufuzli ilmiy muassasalari, tadqiqot markazlari, xalqaro tashkilotlar hamda olimlar o‘rtasida samarali hamkorlikni yo‘lga qo‘yish ekani tushuntirildi.

Mazkur platforma xalqaro ilmiy muloqotlar, konferensiyalar, davra suhbatlari va taqdimotlarni tashkil etish, qo‘shma tadqiqotlarni amalga oshirish, ilmiy tajriba almashish uchun zamonaviy maydon vazifasini bajaradi. U orqali Markazda jamlangan tarixiy manbalar va ilmiy izlanishlar natijalarini xalqaro ilmiy hamjamiyatga yetkazish, shuningdek, O‘zbekistonning boy ilmiy-ma’naviy merosini jahonda keng tanitish imkoniyatlari yaratilgan.

Shodlik Boynazarov, Xorazm viloyati Xiva tumanidagi Xon Ismoil Jo‘rjoniy masjidi imom-xatibi:

Bu yerda faqatgina muzey bilan cheklanib qolinmagan. Ilmiy yo‘nalishlar, diniy qadriyatlarimiz, islom dinining shakllanishidan bugungi kungacha bo‘lgan tarixi, buyuk ulamolarimiz hayoti va ularning asarlari bilan tanishish imkoniyati yaratilgan. Bunday markazning barpo etilishi yurtimiz kelajagi, ayniqsa, yosh avlod uchun katta ilmiy va ma’naviy meros hisoblanadi.

Jizzax viloyati Sharof Rashidov tumanidagi Qangli jome masjidi noib imomi esa Markazda yaratilgan zamonaviy imkoniyatlar, xususan, ekspozitsiyalar va ko‘p tilli axborot tizimining ahamiyatiga to‘xtaldi.

Uning ta’kidlashicha, Markaz orqali milliy qadriyatlar, diniy meros va buyuk allomalar hayoti haqida turli tillarda ma’lumot olish, ularni chuqur o‘rganish mumkin. Ayniqsa, Qur’oni karim zalidagi “Alaqa” surasi ilk oyatlaridan boshlanib, “Fotiha” surasi tilovati bilan davom etadigan taqdimot unda katta taassurot qoldirgan.

Normamat Ramazon, Navoiy viloyati Xatirchi tumanidagi “Abu Hanifa” jome masjidi imom-xatibi:

Ulamolarimizning hayoti va ilmiy merosi, qo‘lyozma kitoblar, shuningdek, Qur’oni karim zalidagi Usmon mus'hafi bilan tanishib, juda katta taassurot oldik. Bu yerda har bir tafsilotga alohida e’tibor qaratilgan. Yurtimizda bunday ilmiy-ma’rifiy markazlar tashkil etilayotgani biz, diniy soha vakillari uchun ham katta imkoniyat.

Ta’kidlash joizki, “Uchinchi Renessans chorrahasi” mavzusi doirasidagi bunday uchrashuv va ma’rifiy tashriflar diniy soha vakillarining tarixiy meros, islom ilm-fani va zamonaviy ilmiy tadqiqotlar haqidagi bilimlarini boyitish, shuningdek, milliy va diniy qadriyatlarni keng targ‘ib etishga xizmat qiladi.

O‘zbekiston musulmonlari idorasi Matbuot xizmati

O'zbekiston yangiliklari