O‘zbekiston musulmonlari idorasi Buxoro viloyati vakilligi tashabbusi bilan Buxoro shahridagi «Abu Bakr as-Siddiq» jome masjidida gapirish va eshitishda nuqsoni bo‘lgan fuqarolar uchun navbatdagi ma’naviy-ma’rifiy uchrashuv o‘tkazildi.

Tadbirda imom-xatib Orif domla To‘qsonov «Oxiratning birinchi manzili» mavzusida ta’sirli ma’ruza qilib, inson e’tiqodi va ma’naviyatiga oid muhim tushunchalarni ishtirokchilarga yetkazdi.

Malakali surdo tarjimon ko‘magida o‘tgan ushbu suhbat davomida qatnashchilar aqida, fiqh va ijtimoiy hayotga oid o‘zlarini qiziqtirgan barcha savollarga atroflicha javob oldilar.

Jismoniy imkoniyatidan qat’i nazar, ilmga chanqoq qalblarni birlashtirgan mazkur xayrli uchrashuv yakunida yurtimiz tinchligi va xalqimiz farovonligi so‘rab duolar qilindi.

Alloh taolo ushbu ma’rifiy tashabbuslarni bardavom va manfaatli qilsin.

Naqshband.uz