E’tirof
Bugun O‘zbekistonda muhtaram Prezident Shavkat Mirziyoyev boshchiligida diniy va ma’rifiy sohada, xususan, islom ilmlari sohasida juda katta yangiliklar, yaxshiliklar amalga oshirilmoqda.
Bugungi murakkab dunyoda diniylik va dunyoviylik muvozanatini ushlash juda ham murakkab, biroq mana shu qiyinchilikni qanday chiroyli tarzda yengib o‘tish, amalga oshirish mumkinligini O‘zbekiston misolida yaqqol ko‘rishimiz mumkin.
Albatta, bu siyosatni yuritish oson emas. Lekin mana shu mo‘tadil siyosatni O‘zbekiston Prezidenti yuritayotgani bu barchaga va barcha davlatlarga, albatta, o‘rnak bo‘ladi.
Qadim tarixiy manbalarni tadqiq qilish, undagi ezgu g‘oyalarni nafaqat O‘zbekiston, balki jahon ommasiga yetkazishda bu kabi anjumanlarning o‘rni nihoyatda katta hisoblanadi.
Prof. Ali Muhyiddin Qoradog‘iy
Butunjahon musulmon ulamolari uyushmasi raisi, Doha dinlararo muloqot markazi raisi
Xato – bandaniki
Bir yigit masjidga kelib biroz o‘tirgach, imomga e’tiroz bildirdi:
– Endi masjidga kelib o‘tirmasak ham bo‘larkan...
Imom undan nima uchun bunday deganining sababini so‘radi. Yigit yon-atrofdagi hamma odam telefonga qarab o‘tirgani, ba’zilari o‘zaro gaplashayotgani uchun shu gapni gapirganini aytdi.
Imom biroz o‘ylab turgach, bunday dedi:
– Yaxshi, e’tirozing o‘rinli. Men bu haqda odamlarga eslatib turibman. Lekin sen endi masjidga kelmoqchi bo‘lmasang bir ish qilib ket.
Yigit rozi bo‘ldi. Imom unga bir piyolani to‘ldirib suv berdi va shu suvni bir tmchi ham to‘kmasdan masjidning ichini bir aylanib chiqishini iltimos qildi. Yigit bor diqqat-e’tiborini jamlab, ohista qadamlar bilan, ikki ko‘zini piyoladan uzmagan holda vazifani muvaffaqiyatli ado etdi.
Imom unga dedi:
– Barakalloh! Endi menga ayt-chi, sen shu topshiriqni bajarayotganingda kimlar gapirib o‘tirdi, kimlar telefoniga qaradi?
Yigit javob berdi:
– Men qayerdan bilay, axir butun diqqatim suvni to‘kib qo‘ymaslikda edi.
Imom dedi:
– Ana ko‘rdingmi? Sen topshiriqni bajarayotganingda butun fikru hayolingni bir joyga jamlading. Allohning huzurida turganimizni his qilib, xayolimizni ibodatga, Uning zikriga qaratsak, boshqalarning xatosini ko‘rishga vaqtimiz ham qolmaydi. Albatta, kimdir xato qilsa bu sening hidoyatdan yuz burib ketishingga sabab bo‘lmasligi kerak. Chunki xato dinniki yo masjidniki emas, balki bandaniki...
Yigit o‘ylab ko‘rib, xato qilganini tushundi. Keyingi jamat namozlarida xushu bilan qatnashishda davom etdi.
Akbarshoh RASULOV