Zamonamiz muhaddisi Shayx Muhammad Avvoma hafizahulloh talabalarga quyidagi nasihatni qiladilar:

“Talaba-shogirdlarimga bugungi kunda zamonaviy texnologiyalardan foydalanishni bilish muhim sanalishini ta’kidlayman. Agar ushbu imkoniyatlardan foydalanishda sustkashlikka yo‘l qo‘yilsa, Islom ummatiga foyda berish ham kamayadi. Rasululloh sollallohu alayhi vasallam Alloh taolodan:

اللهُمَّ إِنِّي أَسْأَلُكَ عِلْمًا نَافِعًا

“Allohim, Sendan foydali ilm so‘rayman”, deb duo qilishni o‘rgatganlar.

Manfaatli ilm bu insonning o‘zi va boshqalarga foydasi tegadigan ilmdir. Shu bois, talaba zamon bilan hamnafas bo‘lmasa, zamonaviy texnologiyalardan foydalanishni bilmasa avvalo o‘zi to‘liq ilm ololmaydi va atrofdagilarga ham foydasi kamroq tegadi.

Qolaversa, zamonaviy texnologiyalardan foydalanish ko‘nikmasiga ega bo‘lish va ular orqali ilmni tarqatish talaba uchun nihoyatda zarur qobiliyat hisoblanadi. Natijada talaba olgan ilmini amaliyotda tatbiq etishga ham muvaffaq bo‘ladi.

Alloh taolodan O‘zi yordam berishini iltijo qilib so‘rayman.

Davron NURMUHAMMAD