Rasululloh sollallohu alayhi vasallam haqlarida so‘zlab bering
Bismillahir Rohmanir Rohiym
Rasululloh sollallohu alayhi vasallamning bo‘ylari qanday edi?
U zot sollallohu alayhi vasallam novcha ham emas, pakana ham emas, o‘rta bo‘y edilar.
Hazrat Ali roziyallohu anhu aytadilar: “Rasululloh sollallohu alayhi vasallam novcha ham emas, pakana ham emas edilar...”.
Rasululloh sollallohu alayhi vasallamning muborak tana va yuzlarining rangi qanday edi?
Ranglari oq-qizil, yuzlari bug‘doyrang edi.
Rasululloh sollallohu alayhi vasallamning tana a’zolari qanday edi?
Tana a’zolari bir-biriga mutanosib, xushbichim, badanlari tuksiz edi.
Rasululloh sollallohu alayhi vasallamning muborak peshonalari, kipriklari, qoshlari qanday edi?
Peshonalari keng, kipriklari uzun, qoshlari qo‘shilmagan, egik edi.
Rasululloh sollallohu alayhi vasallamning muborak burunlari va soqollari qanday edi?
Burunlari biroz baland, qirrali, soqollari qalin edi.
Rasululloh sollallohu alayhi vasallamning muborak tishlari qanday edi?
Tishlari mayda, yaltiroq, oldingi tishlari bir-biridan alohida ko‘rinar edi. Agar so‘zlasalar, tishlarining oralaridan go‘yo nur kabi bir narsa chiqardi.
Rasululloh sollallohu alayhi vasallamning qadam tashlari qanday edi?
U zot sollallohu alayhi vasallam oldinga moyil bo‘lib yurardilar.
Abu Tufayl roziyallohu anhudan rivoyat qilinadi: “Rasululloh sollallohu alayhi vasallamni ko‘rdim. U zot xuddi pastlikka tushayotganga o‘xshab yurar edilar”, dedi (Imom Muslim rivoyati).
Rasululloh sollallohu alayhi vasallamning muborak yelkalari, kaftlari, qadamlari qanday edi?
Ikki yelkalarining orasi keng edi. Ikki yelkalari o‘rtasida payg‘ambarlik muhri bor. Muhri nubuvvat kaptar tuxumidek keladigan qizg‘ish go‘sht, usti tukli edi. Kaft va qadamlari to‘la, go‘shtdor edi.
Rasululloh sollallohu alayhi vasallamning muborak boshlari, yuzlari, ko‘zlari qanday edi?
Boshlari katta, yuzlari dumaloqroq, ko‘zlari qora, suyaklarining qo‘shilgan yeri yo‘g‘on edi.
Baro roziyallohu anhudan: “Nabiy sollallohu alayhi vasallamning yuzlari qilichga o‘xsharmidi?” deb so‘rashdi. Shunda Baro roziyallohu anhu: “Yo‘q. To‘lin oyga o‘xshar edi”, deb javob berdi (Imom Buxoriy, Imom Termiziy rivoyati).
Rasululloh sollallohu alayhi vasallamning muborak ko‘kraklari va bilaklari qanday edi?
Ko‘kraklari keng, bilaklari uzun edi.
Rasululloh sollallohu alayhi vasallamning muborak sochlari qanday edi?
Sochlari ikki quloqlarining yarmiga tushardi. Sochlarini tarab, farq ochardilar. Sochga yog‘ surtardilar.
Qatoda roziyallohu anhudan rivoyat qilinadi: Anas roziyallohu anhudan: “Rasululloh sollallohu alayhi vasallamning sochlari qanday edi?” deb so‘radim. U: “Sochlari to‘lqin sifat: juda jingalak ham, juda yumshoq ham emas edi. Ikki quloqlari bilan yelkalari o‘rtasida turardi”, dedi (Imom Buxoriy, Imom Muslim, Imom Termiziy rivoyati).
Allohumma solli ’ala sayyidina Muhammadin ’abdika va nabiyyika va habibika va Rasulikan Nabiyyil ummiyyi va ’ala alihi va sohbihi va sallim.
Davron NURMUHAMMAD
Numan Kurtulmush: Yangi O‘zbekistondagi Uchinchi Renessans turk va islom dunyosining umumiy yutug‘idir
Turkiya Buyuk Millat Majlisi Raisi Numan Kurtulmush O‘zbekiston Mustaqilligining 35 yilligi arafasida “Dunyo” AA orqali O‘zbekiston xalqiga samimiy tabriklari va ezgu tilaklarini yo‘lladi:
Avvalo, Aziz qardosh va do‘st O‘zbekiston xalqiga eng samimiy salomlarimni, hurmat va ehtiromimni izhor etaman.
Turkiya bilan O‘zbekiston o‘rtasidagi geografik masofaga qaramay, qalblarimiz bir-biriga eng yaqin xalqlardanmiz. Mustahkam birodarlik rishtalarimiz mavjud. Umumiy tariximiz, madaniy merosimiz va qadriyatlarimiz bor. O‘zbekiston bizning ota yurtimizdir.
Ayniqsa, keyingi yillarda Prezident Shavkat Mirziyoyev va Prezident Rejep Tayyip Erdog‘an rahbarligida ikki davlat o‘rtasidagi munosabatlar tarixiy darajada mustahkamlanib, izchil rivojlanmoqda.
Bunga misol sifatida joriy yil yanvar oyida Prezident Shavkat Mirziyoyevning keng tarkibdagi delegatsiya bilan Turkiyaga amalga oshirgan tashrifini keltirish mumkin. Ushbu tashrif doirasida Istanbuldagi O‘zbekiston maktabi hamda Hatay viloyatida zilziladan jabr ko‘rgan fuqarolar uchun barpo etilgan “O‘zbekiston mahallasi”ning ochilish marosimlari ikki mamlakat o‘rtasidagi qardoshlik va do‘stlik rishtalarini yanada mustahkamladi.
Hurmatli birodarim – O‘zbekiston Oliy Majlisi Qonunchilik palatasi Spikeri Nuriddin Ismoilov bilan birgalikda Hatay viloyatining Arsuz tumanida joylashgan “O‘zbekiston mahallasi”ga nom berish marosimida ishtirok etdik. Marosim samimiy va do‘stona muhitda o‘tdi.
Fursatdan foydalanib, Turkiyada yuz bergan zilziladan keyin O‘zbekiston xalqi tomonidan ko‘rsatilgan beqiyos qardoshlik yordami uchun yana bir bor samimiy minnatdorchiligimizni bildiraman.
“O‘zbekiston mahallasi” va “O‘zbekiston maktabi” ikki davlat o‘rtasidagi do‘stlik va birodarlikning abadiy ramzlariga aylandi.
So‘nggi yillarda O‘zbekistonda amalga oshirilayotgan ulkan taraqqiyotni biz har bir tashrifimizda o‘z ko‘zimiz bilan ko‘rmoqdamiz. Barcha sohalarda keng qamrovli islohotlar amalga oshirilayotganiga guvoh bo‘lmoqdamiz.
O‘zbekiston nafaqat iqtisodiy taraqqiyot, balki fikr, falsafa, ilm-fan va san’at sohalarida ham Islom sivilizatsiyasining Uchinchi Renessansi sari dadil qadam tashlamoqda.
Bu borada Prezident Shavkat Mirziyoyevning kuchli va samarali rahbarligini alohida e’tirof etaman hamda unga chuqur hurmatimni bildiraman.
Ishonamanki, O‘zbekistonda shakllanayotgan Uchinchi Renessans nafaqat mamlakatning o‘zi, balki butun Islom olami uchun yangi yuksalish davrining boshlanishi bo‘ladi.
Buyuk madaniy merosga ega O‘zbekiston Alisher Navoiy, Ahmad al-Farg‘oniy, Ali Qushchi va Mirzo Ulug‘bek kabi buyuk allomalarni yetishtirgan zamindir. Bu yurt ilm-fan, falsafa, astronomiya va boshqa ko‘plab sohalarda insoniyat sivilizatsiyasiga beqiyos meros qoldirgan.
Shu bilan birga, islom ilmlari sohasida ham O‘zbekiston ulkan ma’naviy boylikka ega. Bahouddin Naqshband va Abdulxoliq G‘ijduvoniy kabi buyuk tasavvuf ulamolarining merosi ushbu zaminning Islom tafakkuridagi yuksak o‘rnini namoyon etadi.
Shuningdek, Imom Buxoriy, Imom Termiziy va Imom Moturidiy kabi buyuk allomalarning ilmiy merosi butun islom olamining bebaho boyligi hisoblanadi.
Umid qilamanki, O‘zbekiston ilm-fan, taraqqiyot va ma’rifat sohasidagi yutuqlari orqali nafaqat o‘zining yanada yuksalishiga, balki Turk dunyosi va butun Islom olamining ravnaqiga ham munosib hissa qo‘shishda davom etadi.
Yana bir bor aziz O‘zbekiston xalqiga eng samimiy salomlarim va ezgu tilaklarimni yo‘llayman.
Muhtaram Prezident Shavkat Mirziyoyevga mamlakat taraqqiyoti va xalqaro maydondagi faoliyatida ulkan muvaffaqiyatlar tilayman. Alloh taolo o‘zlariga sihat-salomatlik, uzoq va barakali umr ato etsin hamda O‘zbekiston xalqi, Turk dunyosi va Islom olami yo‘lida yanada ulkan xizmatlarni amalga oshirish nasib qilsin.
O‘zbekiston musulmonlari idorasi Matbuot xizmati