Bir qizaloq taqinchoq do‘koniga kirib sotuvchiga qarab chiroyli zirak ko‘rsatishini so‘radi. Sotuvchi qizaloqqa hayratlangancha qarab turaverdi. Shunda qizaloq bir zirakni ko‘rsatib: “Mana buni chiroyli qilib o‘rab berolasizmi?!”, dedi. Sotuvchi: “Puling bormi?” deb so‘radi.
Qizaloq cho‘ntagidagi bir nechta tangani chiqarib,:“Bor pulim shu, yetadimi?” deb so‘radi. So‘ngra u: “Bilasizmi, men opamga shu zirakni sovg‘a qilmoqchiman. Chunki u onamiz olamdan o‘tganidan keyin bizga g‘amxo‘rlik qilib kelmoqda. Men opamni xursand qilishni juda xohlardim. Menda bori shu”, dedi pulga ishora qilib.
Bir necha soniyadan so‘ng sotuvchi zirakni chiroyli qutiga solib, qizchaning qo‘liga berdi. U xursand bo‘lganicha uyiga shoshib ketdi.
Bir fursatdan so‘ng do‘konga bir o‘rta yoshli qiz kirib, do‘konchiga o‘sha qizaloq olgan zirakni ko‘rsatib: “Buni sizdan olganmidi?” deb so‘radi. Sotuvchi taqinchoqga qarab: “Ha” deb javob berdi. Qiz taqinchoqni narxi qanchaligini so‘radi. Sotuvchi: “Bu xaridor va mening kelishuvim” deb javob qildi. U: “Singlimda bir necha tanga bor edi. Bu esa judayam qimmatligini bilaman. Bunga pulimiz yetmaydi” deb zirakni qaytarib bermoqchi bo‘ldi.
Shunda sotuvchi: “Singlingiz bor budini berdi. Bu narxni hech kim bera olmaydi”, deya taqinchoqni qizga qaytarib berdi.
Akbarshoh Rasulov tarjimasi
Janubiy Koreyaning yetakchi “The Korea Post” nashrida O‘zbekiston sayyohlik sohasidagi yutuqlariga bag‘ishlangan maqola e’lon qilindi, deb xabar bermoqda “Dunyo” AA.
Maqolada keltirilgan ma’lumotlarga ko‘ra, joriy yilning yanvar-avgust oylarida O‘zbekistonga 9,1 milliondan ortiq xorijiy sayyoh tashrif buyurgan bo‘lib, bu ko‘rsatkich o‘tgan yilning mos davriga nisbatan 21,1 foizga ko‘pdir. Bunda Mustaqil Davlatlar Hamdo‘stligi mamlakatlari bilan hamkorlik muhim o‘rin tutishi ta’kidlanib, xususan, Rossiyadan kelgan sayyohlar oqimi 30,8 foizga (deyarli 868 ming kishi), Ozarbayjondan esa 63,3 foizga (22 ming kishi) oshgani qayd etilgan.
Shuningdek, Moskvadagi “MITT-2026” ko‘rgazmasida o‘tkazilgan B2B uchrashuvlar, “Qozon – Toshkent” aviareysining yo‘lga qo‘yilgani hamda O‘zbekiston va Ozarbayjon tomonidan 2025 yilda Frankfurt, Vena, Syurix, Budapesht, Praga va Barselona shaharlarida tashkil etilgan “Highlights of the Silk Road” yevropacha roud-shoulari alohida tilga olingan.
Nashrda qo‘shni davlatlar bilan hamkorlik masalalariga ham keng o‘rin berilgan. Xususan, O‘zbekiston, Qirg‘iziston va Tojikiston tomonidan 2026–2027 yillarda turizm sohasida hamkorlik dasturi loyihasi tayyorlangani, shuningdek, chegaralardan o‘tishning soddalashtirilgan mexanizmi bir nechta davlat bo‘ylab sayohat qilishni yanada qulaylashtirayotgani yozilgan.
Maqola yakunida Prezident Shavkat Mirziyoyevning Osiyo taraqqiyot banki Boshqaruvchilar kengashining Samarqand shahrida bo‘lib o‘tgan 59-yillik majlisida ilgari surgan “Markaziy Osiyo turistik halqasi”ni yaratish tashabbusi alohida ta’kidlangan.
O‘zbekiston musulmonlari idorasi Matbuot xizmati