Bir qizaloq taqinchoq do‘koniga kirib sotuvchiga qarab chiroyli zirak ko‘rsatishini so‘radi. Sotuvchi qizaloqqa hayratlangancha qarab turaverdi. Shunda qizaloq bir zirakni ko‘rsatib: “Mana buni chiroyli qilib o‘rab berolasizmi?!”, dedi. Sotuvchi: “Puling bormi?” deb so‘radi.
Qizaloq cho‘ntagidagi bir nechta tangani chiqarib,:“Bor pulim shu, yetadimi?” deb so‘radi. So‘ngra u: “Bilasizmi, men opamga shu zirakni sovg‘a qilmoqchiman. Chunki u onamiz olamdan o‘tganidan keyin bizga g‘amxo‘rlik qilib kelmoqda. Men opamni xursand qilishni juda xohlardim. Menda bori shu”, dedi pulga ishora qilib.
Bir necha soniyadan so‘ng sotuvchi zirakni chiroyli qutiga solib, qizchaning qo‘liga berdi. U xursand bo‘lganicha uyiga shoshib ketdi.
Bir fursatdan so‘ng do‘konga bir o‘rta yoshli qiz kirib, do‘konchiga o‘sha qizaloq olgan zirakni ko‘rsatib: “Buni sizdan olganmidi?” deb so‘radi. Sotuvchi taqinchoqga qarab: “Ha” deb javob berdi. Qiz taqinchoqni narxi qanchaligini so‘radi. Sotuvchi: “Bu xaridor va mening kelishuvim” deb javob qildi. U: “Singlimda bir necha tanga bor edi. Bu esa judayam qimmatligini bilaman. Bunga pulimiz yetmaydi” deb zirakni qaytarib bermoqchi bo‘ldi.
Shunda sotuvchi: “Singlingiz bor budini berdi. Bu narxni hech kim bera olmaydi”, deya taqinchoqni qizga qaytarib berdi.
Akbarshoh Rasulov tarjimasi
Bugun Hakim Termiziy majmuasi muzeyida buyuk allomaning 1200 yillik yubileyi munosabati bilan kitoblar ko‘rgazmasi tashkil etildi.
Ko‘rgazmada Imom Termiziy xalqaro ilmiy-tadqiqot markazi tomonidan chop etilgan Hakim Termiziyning ilmiy-ma’naviy merosiga oid kitoblar o‘rin oldi.
Ushbu nashrlar orqali buyuk mutafakkirning ilmiy qarashlari, asarlarining mazmun-mohiyati va bugungi kundagi ahamiyatini keng jamoatchilikka yetkazishga alohida e’tibor qaratildi.
Allomaning boy ilmiy-ma’naviy merosi bugun ham o‘z qiymatini yo‘qotmagan. Unda ilgari surilgan ezgulik, ma’rifat va yuksak axloq g‘oyalari yosh avlodni milliy va umuminsoniy qadriyatlar ruhida tarbiyalashda muhim manba bo‘lib xizmat qiladi.
Tadbir davomida ishtirokchilarga Hakim Termiziyning hayoti, ilmiy faoliyati va ma’naviy merosi haqida hikoya qiluvchi maxsus videolavha ham namoyish etildi.
Mazkur ko‘rgazma allomaning ilmiy merosini keng targ‘ib etish, asarlarini o‘rganishga qiziqishni oshirish hamda ajdodlarimiz qoldirgan bebaho ma’naviy xazinani kelajak avlodlarga yetkazishga xizmat qiladi.
Imom Termiziy xalqaro ilmiy-tadqiqot markazi Matbuot xizmati