O‘zbekistondagi bag‘rikenglik muhiti butun mintaqaga ijobiy ta’sir ko‘rsatmoqda
Mamlakatimizda fuqarolarning diniy e’tiqod va vijdon erkinligini ta’minlash masalasiga katta e’tibor qaratilmoqda. Yurtimiz bo‘ylab muvaffaqiyatli boshlangan “Bag‘rikenglik haftaligi“ tadbirlarida ayni jihatlarga ham alohida e’tirof etilmoqda.
O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita raisining birinchi o‘rinbosari Davronbek Mahsudov bu borada quyidagicha fikr bildirdi:
– Bag‘rikenglik masalasi bugungi kunda dolzarb ahamiyat kasb etmoqda. Dunyodagi ayrim o‘ziga xos kelishmovchiliklar, nizoli, qon to‘kishli holatlarni afsuski, barchamiz ko‘rib turibmiz. Shunday vaziyatda tinchlik, bag‘rikenglik, xotirjamlikning nechog‘li muhim va dolzarb ekani ko‘rinib turibdi.
O‘zbekistonda qadimdan turli millat va diniy konfessiya vakillari inoqlikda istiqomat qilib kelgani tarixdan yaxshi ma’lum. Bu diyor o‘zining bag‘rikengligi, saxovati, mehmondo‘stligi bilan butun dunyoda nom qozongan.
Bugungi kunda O‘zbekistondagi barqaror, tinch va osoyishta muhit butun mintaqaga o‘zining ijobiy ta’sirini o‘tkazib kelayotgani ko‘p e’tirof etilayotgan mavzulardan biridir. Zero, mamlakatimizdagi tinchlik va xotirjamlik, osuda hayot aynan bag‘rikenglik tamoyillari bilan uzviy bog‘liqdir. Chunki inson boshqalarga hurmat va ehtirom bilan munosabatda bo‘lsa, kechirimlilik fazilatiga ega bo‘lsa, unda do‘stona yashash ko‘nikmasi shakllanganidan darak beradi. O‘zbek xalqining qonida shunday fazilatlarning borligi e’tiborga molikdir. Prezidentimizning bugungi olib borayotgan siyosati ham aynan bag‘rikenglik tamoyillariga asoslangani bilan ahamiyatga molikdir.
Davlatimiz rahbari BMTning 72-sessiyasida yuqori minbarlardan turib,“Ma’rifat va diniy bag‘rikenglik” to‘g‘risidagi rezolyutsiyasini qabul qilish bo‘yicha tashabbuslarni ilgari surdilarki, bu tashabbusni 200 ga yaqin davlat yakdillik bilan qabul qildi. Bu O‘zbekistondagi tinchlik, xotirjamlik, bag‘rikenglik masalalari bilan bevosita bog‘liqdir. Ushbu jihatlarni jahondagi barcha davlatlar yuksak e’tirof etayotganini ham albatta, ta’kidlash kerak bo‘ladi.
Mamlakatimizda ko‘plab diniy yo‘nalishdagi ta’lim maskanlari samarali faoliyat ko‘rsatmoqda. Jumladan, hamyurtlarimizning muborak Haj va Umra amallarini emin-erkin ado etishlari uchun davlatimiz rahbari tomonidan barcha sharoitlar to‘liq yaratilgan. Bu yilning o‘zida 15 ming nafardan ortiq fuqarolar Haj va Umra amallarini bajardi. Aslida bag‘rikenglik, o‘zgalarni hurmat qilish, qadrlash borasidagi ezgu ishlar, diniy konfessiyalararo bag‘rikenglikka doir sa’y-harakatlar amaldagi qonunchilikka rioya etilgan holda amalga oshirilmoqda.
Turli dinlarga e’tiqod qiluvchi odamlar O‘zbekistonga bemalol kelib, bu yerdagi tinchlik, osoyishtalik, millatlar va diniy konfessiyalar o‘rtasidagi ahillikni ko‘z qorachig‘idek asrab-avaylash borasidagi ezgu ishlarga juda yuqori baho bermoqdalar. Ayni paytda diniy-ma’rifiy adabiyotlarni chop etish bo‘yicha ham keng qamrovli ishlar olib borilmoqda.
Bag‘rikenglik, o‘zgalarni hurmat qilish va qadrlash borasidagi ezgu ishlar, barcha sa’y-harakatlar qonunchilik doirasida amalga oshirilayotgani e’tiborga molikdir.
Nazokat Usmonova,
O‘zA muxbiri
Matbuot – jamiyat ko‘zgusi
Ommaviy axborot vositasi – jamiyat ko‘zgusi, millatning yuzi. Uning zimmasida keng jamoatchilikni fikrlashga chorlash, tarbiyalash, dunyoqarashni boyitishdek mas’uliyat turadi.
Keyingi yillarda mamlakatimizda huquqiy demokratik davlat va fuqarolik jamiyati barpo etishning muhim sharti bo‘lgan ommaviy axborot vositalarini rivojlantirish, ularning moddiy-texnik bazasi va kadrlar salohiyatini mustahkamlash, so‘z va matbuot erkinligini ta’minlash, soha vakillarini har jihatdan qo‘llab-quvvatlashga bo‘yicha keng ko‘lamli ishlar amalga oshirilmoqda.
Shu munosabat bilan bugun O‘zbekiston xalqaro islomshunoslik akademiyasida "Matbuot – jamiyat ko‘zgusi" mavzusida davra suhbati bo‘lib o‘tdi.
Mazkur tadbir 27 iyun – Matbuot va ommaviy axborot vositalari xodimlari kuni munosabati bilan tashkil etildi. Unda O‘zbekiston xalqaro islomshunoslik akademiyasi rektori Muzaffar Komilov, OAV vakillari, Akademiya o‘qituvchi va xodimlari ishtirok etdi.
So‘zga chiqqanlar so‘nggi yillarda yurtimizda so‘z erkinligiga bo‘lgan e’tibor yangi darajaga ko‘tarilganini qayd etishdi. OAV demokratik qadriyatlarni qaror toptirish, dunyoda va mamlakatimizda sodir bo‘layotgan ijtimoiy-siyosiy jarayonlar, voqea-hodisalar haqida tezkor va haqqoniy ma’lumotlar yetkazish, Yangi O‘zbekistonning demokratik qiyofasini shakllantirishda muhim rol o‘ynayotganini ta’kidlashdi.
Darhaqiqat, davlatimiz rahbari soha vakillarining mehnatini doimo e’tirof etar ekanlar, shunday fikrlarni bildirgan edilar:
"Biz bugun huquqiy demokratik davlat qurayotgan ekanmiz, jurnalistikaning butun dunyoda e’tirof etilgan, o‘zgarmas talab va mezonlariga amal qilishimiz zarur. Bu mezonlarning eng asosiysi – xolislik va haqqoniylikdir. Binobarin, matbuot maydoniga kirgan inson – u jurnalist bo‘ladimi, bloger bo‘ladimi, bundan qat’i nazar – ana shu qoidalarga amal qilishi shart".
Uchrashuv davomida "Yangi O‘zbekiston" va "Pravda Vostoka" gazetalari bosh muharriri Salim Doniyorov, "Jadid" gazetasi bosh muharriri Iqboljon Mirzaaliyev, Adliya vaziri maslahatchisi, bloger Shahnoza Soatova hamda "Ziyo" media markazi direktori Abduhamid Muxtorov so‘zga chiqib, o‘z fikr-mulohazalarini bildirdilar.
Shundan so‘ng yurtimizda diniy-ma’rifiy sohada amalga oshirilayotgan keng ko‘lamli islohotlar hamda yosh avlodning barkamol voyaga yetishi, xalqaro standartlar asosida ta’lim olishi, ilm-fan, kasb-hunar cho‘qqilarini egallashi hamda xalqimiz ma’naviy-ma’rifiy yuksalishi borasidagi yangilanishlarni keng jamoatchilikka samarali yetkazishda Akademiya bilan faol hamkorlik qilib kelgan bir guruh OAV xodimlarni bayram munosabati bilan taqdirlash marosimi o‘tkazildi.
Bir guruh jurnalistlarga tashakkurnoma va esdalik sovg‘alari topshirildi.
O‘zbekiston xalqaro islomshunoslik akademiyasi
Matbuot xizmati
