Marg‘ilon shahridagi "Ijodkorlar maktabi"da "O‘zbekistonda ayollar huquqlariga oid diniy ta’limotlar va islomda ayollar huquqi" mavzusida ko‘rgazmali seminar bo‘lib o‘tdi. Unda Din ishlari bo‘yicha qo‘mita raisining o‘rinbosari M.Kahhorova, "Oqila ayollar harakati" viloyat bo‘limi rahbari Yu.Rahimova, viloyat bosh otinoyisi H.Komilova va hududlarda faoliyat olib borayotgan otinoyilar ishtirok etdi.
Seminarda so‘z olgan notiqlarning xotin-qizlarga yaratilayotgan imkoniyatlar, ayollarning jamiyatdagi o‘rnini ko‘tarishga qaratilayotgan e’tibor, islomda ayollar huquqlari haqida qiziqarli ma’ruzalari tinglandi.
Marg‘ilon shahar otinoyilari tomonidan tayyorlangan "Bir ayol qismati" nomli sahna ko‘rinishi namoyish etildi. Unda ayol-qizlarning ta’lim olishi, kasb-hunar egallashi, oilaviy ajrimlarga sabab bo‘layotgan holatlar, o‘z joniga kasd qilishning salbiy oqibati kabi illatlar ko‘rsatib berildi. Hayotiyligi hamda turmush tarzimizdagi salbiy jihatlarni ochib, ularga ijobiy yechim taqdim qilgan sahna ko‘rinishi ishtirokchilarda katta taassurot qoldirdi.
Farg‘ona viloyati vakilligi
Matbuot xizmati
Kecha, 14 noyabr kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Finlandiya musulmonlari jamiyati imomi Ramil hazrat Belyayev boshchiligidagi delegatsiyani qabul qildilar.
Fin yurtining din peshvolari ayni kunlarda mamlakatimizda keng nishonlanayotgan 16 noyabr – "Xalqaro bag‘rikenglik kuni" munosabati bilan o‘tkazilayotgan tadbirlarda faol ishtirok etmoqdalar.
Muloqotda O‘zbekiston va Finlandiya o‘rtasidagi hamkorlik yildan-yilga rivojlanib borayotgani, o‘tgan oyda Finlyandiya Prezidentining mamlakatimizga rasmiy tashrifi ikki davlat o‘rtasidagi do‘stona aloqalarni yangi bosqichga ko‘targani, ayniqsa, ijtimoiy-iqtisodiy, ta’lim, ilm-fan, madaniyat, turizm sohalarida hamkorlik rivojlanib borayotgani, xususan, o‘tgan yili O‘zbekiston musulmonlari idorasi delegatsiyacining Finlandiyaga safari juda ham samarali kechganiga urg‘u berildi.
Finlandiya delegatsiyasi mamlakatimizda amalga oshirilayotgan diniy-ma’rifiy islohotlar, millatlararo totuvlik va bag‘rikenglik borasidagi ishlarni yuqori baholab, ikki tomonlama hamkorlikni yanada rivojlantirishdan manfaatdor ekanini bildirdi.
Uchrashuv samimiy ruhda o‘tib, tomonlar esdalik sovg‘alari almashdilar.
O‘zbekiston musulmonlari idorasi
Matbuot xizmati