Qorin ochligi
Kunlarning birida Rasululloh sollallohu alayhi vasallam qorinlari nihoyatda och edi. Yotib uxlamoqchi bo‘ldilar ammo uxlashga ham qiynaldilar. Bir muddatdan keyin o‘rinlaridan turib, bir toshni qorinlariga qo‘yib yotmoqchi bo‘ldilar. Bu holatni ko‘rgan Oisha roziyallohu anho onamiz qattiq havotirlandilar.
Oisha roziyallohu anho onamizning ko‘zlariga yosh keldi. “Yo Rasululloh sollallohu alayhi vasallam duo qilsangiz, Siz uchun hamma narsa muhayyo bo‘ladiku”, dedilar. Shunda Rasululloh sollallohu alayhi vasallam: “Mendan oldingi Payg‘ambarlar ham shu holatda ketishdi. Men ham Robbimning huzuriga shunday boraman”, dedilar.
Abu Tolha roziyallohu anhu aytadilar: “Rasululloh sollallohu alayhi vasallamga ochlikdan shikoyat qildik. Qornimizga (bog‘lab olingan) bittadan toshni olib ko‘rsatdik. Shunda Rasululloh sollallohu alayhi vasallam ikkita toshni olib ko‘rsatdilar”.
Bugun uyingizda biror taom tayyorlayotganingizda yoningizdagi qo‘shningizning qorni och bo‘lishi mumkinligini esdan chiqarmang. Hovlingizda tutunini chiqarib tansiq taom pishirsangiz, qo‘shni xonadonda homilador kelin bo‘lsa, ularga ham chiqarishni unutmang. Qaynatma sho‘rva qilsangiz ovqatga ko‘proq suv soling bir kosa qo‘shniga ham berasiz.
Oisha onamiz roziyallohu anho: “Muhammad sollallohu alayhi vasallamning oilasi bir kunda ikki marta yegulik yemagan, yesa ham bittasi xurmo bo‘lgan”, deganlar (Imom Buxoriy rivoyati).
Akbarshoh RASULOV
«HAJ – 2026» MAVSUMIDA FIDOIYLIK KO‘RSATGANLAR TAQDIRLANDI
Allohga hamdlar bo‘lsin, yurtdoshlarimizning bu yilgi haj ibodatlari ham yuqori saviyada, tartibli va muvaffaqiyatli o‘tdi. Shu munosabat bilan mavsum davomida kechani kecha, kunduzni kunduz demay sidqidildan xizmat qilgan ishchi guruhi, malakali shifokorlar hamda mohir oshpazlarni taqdirlashga bag‘ishlangan tadbir o‘tkazildi.
Bir piyola choy ustida tashkil etilgan yig‘in an’anaga muvofiq Qur’oni karim tilovati bilan boshlandi.
Yig‘ilganlarga mavsumning eng hayajonli va fidokorona lahzalari muhrlangan maxsus videorolik namoyish etildi.
Tadbirda dastlab Din ishlari bo‘yicha qo‘mita raisi Sodiqjon Toshboyev so‘zga chiqib, mavsum davomida ko‘rsatilgan fidokorlik uchun ishtirokchilarga minnatdorlik bildirdi.
Haj mavsumi davomida yurtimiz hojilari, ayniqsa, bu yil ilk bor “Prezident hojisi” sifatida borgan joriy etilgan 100 nafar fidoiy yurtdoshlarimiz Davlatimizning bevosita ko‘magi va g‘amxo‘rligini his qilib turganlari, ular uchun barcha shart-sharoitlar muhayyo etilganini alohida qayd etdi.
O‘zbekiston musulmonlari idorasi raisi, muftiy Shayx Nuriddin Xoliqnazar hazratlari o‘z nutqida bu yilgi haj safari Muhtaram Yurtboshimizning bevosita ko‘rsatmalari, mutasaddi tashkilotlarning hamkorlikdagi xizmati evaziga yangi bosqichga ko‘tarilganini e’tirof etdilar. Bu narsa, ayniqsa, Mino, Arafot, Muzdalifa va Jamarot maydonlarida ziyoratchilarning xavfsiz va tartibli harakatlanishi, ibodatlarini xotirjam ado etishlarida kuzatilganini ta’kidladilar. Shuningdek, hamyurtlarimizning haj ibodati ko‘tarinki ruhda o‘tgani Saudiya Arabistoni mutasaddilari tomonidan ham yuqori baholangani qayd etildi.
Shundan so‘ng «Haj-2026» mavsumida jonbozlik ko‘rsatgan Ishchi guruhi a’zolari, shifokorlar jamoasi hamda mohir oshpazlarga tashkilotchilarning tashakkurnomalari, esdalik hadyalari topshirildi.
O‘zbekiston musulmonlari idorasi
Matbuot xizmati
