Masjid binosiga ilk g‘isht qo‘yish, ko‘chat ekish va fuqarolar bilan muloqot
Farg‘ona vakilligi faoliyatidan
Farg‘ona viloyatining Buvayda tumanida 14 ta masjid faoliyat olib bormoqda. Ularda 25 nafar malakali imom-xatib va imom-noiblar xizmat olib bormoqdalar. Masjidlarda obodonchilik ishlari olib borilib, mo‘min-musulmonlar uchun qulay shart-sharoitlar hozirlanmoqda.
Imom-xatiblar va masjidlar faoliyatini o‘rganish maqsadida Farg‘ona viloyati bosh imom-xatibi Ubaydulloh domla Abdullayev Buvaydaga tashrif buyurdi. Tuman bosh imom-xatibi Ahmadxon domla Nizomov boshchiligida tumanda faoliyat olib borayotgan imom-xatib va imom-noiblari hamda "Haj — 2024" mavsumida ziyoratga borgan hojilar ishtirokida muloqot bo‘lib o‘tdi. Ijtimoiy-ma’naviy muhit barqarorligini ta’minlash, aholiga sof islom ta’limotlarini yetkazish, yoshlarni sof aqida asosida, vatanga sadoqatli qilib tarbiyalashda mas’ullar oldida turgan vazifalarga to‘xtalindi.
"Salmoni Forsiy" masjidida fuqarolar qabuli o‘tkazildi. Tumanning Guzar, Buvayda va Ipak yo‘li mahalla fuqarolari yig‘inidan tashrif buyurgan fuqarolar murojaati tinglanib, ularning savollariga javob berish barobarida amaliy ko‘mak berish choralari ko‘rildi.
Masjid hududiga manzarali va gul ko‘chatlari o‘tkazilib, "Yashil makon" umummilliy loyihasining ahamiyati, ko‘chat ekishning foydalari, loyihada faol bo‘lishning manfaati xususida gapirildi.
Shuningdek, "Mansurxonto‘ra" masjidi bir yarim ming namozxon uchun mo‘jallangan, zamonaviy arxitektura talablariga hamohang ravishda ishlangan loyiha asosida qayta qurilmoqda. Namozgohning yangi binosiga g‘isht qo‘yilib, boshlangan ishlar xayrli bo‘lishini tilab duo qilindi.
Farg‘ona viloyati vakilligi
Matbuot xizmati
"Imom Buxoriy" ordeni — yuksak ehtirom ramzi!
Kuni kecha mamlakatimiz mustaqilligining 35 yilligi munosabati bilan muhtaram Prezidentimiz tomonidan yuksak davlat mukofotlariga sazovor bo‘lgan bir guruh vatandoshlarimiz taqdirlandi.
Eng quvonchlisi shuki, tadbirda diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning zahmatli mehnatlari yuksak darajada e’tirof etildi!
Xususan, Diniy idora tizimida uzoq yillardan beri samarali xizmat qilib kelayotgan ustozlardan O‘zbekiston musulmonlari idorasi raisining birinchi o‘rinbosari Homidjon domla Ishmatbekov, O‘zbekiston musulmonlari idorasi Faxriylar kengashi raisi Shayx Abdulaziz Mansur, Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev, Buxoro viloyati Kogon tumani "Bahouddin Naqshband" jome masjidi imom-xatibi Abdug‘ofur domla Razzoqov "Imom Buxoriy" ordenini Davlatimiz Rahbaridan qabul qilib olishdi.
Ustozlarning ilmiy-ma’rifiy faoliyati, xalq ichida ma’rifat ulashishdagi fidoyiliklari davlatimiz tomonidan yuksak qadrlangani butun diniy-ma’rifiy sohada mehnat qilayotganlar uchun katta faxr va sharafdir.
Ushbu voqea Yangi O‘zbekistonda diniy-ma’rifiy sohaga, milliy qadriyatlarimizni avaylab-asrash hamda rivojlantirishga qaratilayotgan izchil va xayrli siyosatning amaliy ifodasidir.
Xalqimizda qadimdan ma’rifat ahlini ulug‘lash, ularning zahmatli mehnatini qadrlash ezgu an’ana sanaladi. Islom ta’limotida ham ilm egalariga alohida maqom va hurmat bilan qaraladi. Zero, Imom Termiziy bobomiz rivoyat qilgan hadisi sharifda: «Ulamolar payg‘ambarlarning merosxo‘rlaridir», deyilgan.
Ulamolarga ko‘rsatilayotgan bunday e’tiborning nechog‘li xayrli ekani quyidagi hikmatda ham o‘z ifodasini topgan. Ulug‘ zotlardan biri Tovus rahmatullohi alayh otasidan quyidagicha rivoyat qilgan: «To‘rt kishini hurmat qilish sunnatdir: olim, yoshi ulug‘ inson, podshoh va ota» (Imom Abdurazzoq rivoyati).
Mazkur yuksak mukofot milliy va diniy qadriyatlarimizni tiklash, Islom ma’rifatini keng targ‘ib etish, jamiyatda bag‘rikenglik va tinchlik-omonlikni bardavom saqlash yo‘lidagi ko‘p yillik xayrli xizmatlarning munosib e’tirofidir.
Davlatimizning bunday e’tibori diniy soha xodimlariga yanada ulkan mas’uliyat yuklaydi, ma’naviy yuksalish yo‘lidagi xayrli xizmatlar ko‘lamini yanada kengaytirishga xizmat qiladi, insha Alloh.
O‘zbekiston musulmonlari idorasi Matbuot xizmati
- «
- »