Diniy soha xodimlari minglab yurtdoshlarimiz ko‘ngliga shodlik ulashdi
Dinimiz ehtiyojmand, bemor, nogironligi bor kishilarga g‘amxo‘rlik qilishga buyurib, buning ajru savoblari ulkan ekanligini ta’kidlaydi. Bunday xayrli amalni diniy soha xodimlari, imom-xatiblar kundalik ishiga aylantirgan desak, xato qilmagan bo‘lamiz. Zero, bugun mahallalarda o‘tkazilayotgan turli diniy-ma’rifiy tadbir bo‘ladimi yoki sayyor uchrashuvlar bo‘lsin, ehtiyojmand va nogironligi bor fuqarolar imom-xatiblar e’tiborida.
“3 dekabr – Xalqaro nogironlar kuni” munosabati bilan bunday ezgu ishlar respublikamizda yanada jonlandi. O‘zbekiston musulmonlari idorasi tizimida foliyat yurituvchi xodimlar, imom-xatiblar, Vaqf fondi vakillari mazkur sana doirasida xayriya ishlarida yanada jonbozlik ko‘rsatishdi.
Xususan, O‘zbekiston musulmonlari idorasi rahbariyati Yashnabod tumandagi 52-sonli alohida yordamga muhtoj bolalar uchun ixtisoslashtirilgan maktab o‘quvchilari holidan xabar oldi. Bolajonlar bilan dildan suhbat qurib, maktab ma’muriyatiga O‘zbekiston musulmonlari idorasi nomidan sovg‘alar taqdim qilishdi.
Toshkent shahar vakilligi xodimlari ham ushbu tadbirlarda faol bo‘lib, 36-sonli jismoniy imkoniyati cheklangan bolalar uyiga tashrif buyurdilar. Murg‘ak qalb egalari bilan samimiy muloqot qilib, ularga jami 20 million so‘mlik kiyim-kechaklar, shirinliklar va turli hil sovg‘a-salomlar ulashdilar. Shuningdek, Olmazor tumani “Mevazor” jome masjidi imom-xatibi tashabbusi bilan homiylarni jalb qilgan holda Olmazor tumanidagi 36-sonli maktabga 40 million so‘mlik sovg‘a salomlar olib berildi.
Toshkent viloyati imom-xatib va imom-noiblari ham homiylarni jalb qilgan holda mahallalardagi 300 ga yaqin nogironligi bo‘lgan shaxslar va ularning oila a’zolari, kam ta’minlangan, boquvchisini yo‘qotlar holidan xabar olib, ularga 121 mln.so‘mlik xayriyalar ulashdilar.
Xuddi shunday Andijon viloyati imom-xatiblari ham Marhamat tumanida nogironligi bo‘lgan shaxslar holidan xabar olinib, sovg‘alar ulashilgan bo‘lsa, Xo‘jaobod tumanida “Nur” tantanalar binosida shunday insonlar uchnu ehson dasturxoni tashkil etildi. Buxoro viloyati imom-xatiblari ham saxovatpesha homiylar bilan birgalikda imkoniyati cheklangan, nogiron fuqarolar holidan xabar olib ularga oziq-ovqat maxsulotlari va xo‘jalik buyumlaridan iborat mahsulotlarni hadya qildilar. Qashqadaryo viloyatida diniy soha xodimlari tomonidan 129 nafar nogironligi bor shaxslar, ehtiyojmand oilalar holidan xabar olinib 15.8 mln.so‘mlik sovg‘a-salom ulashildi. Farg‘ona viloyati imom-xatiblar esa homiylarni jalb qilgan holda 24.750.000 so‘mlik xayriyalar tarqatdi.
Bunday xayrli tashabbuslar Qoraqalpog‘iston Respublikasi, Navoiy, Samarqand, Sirdaryo, Xorazm viloyatilarida ham davom etib, yuzlab ko‘ngli o‘ksik yurtdoshlarimiz qalbiga shodlik ulashildi.
O‘zbekiston musulmonlari idorasi
Matbuot xizmati
"Imom Buxoriy" ordeni — yuksak ehtirom ramzi!
Kuni kecha mamlakatimiz mustaqilligining 35 yilligi munosabati bilan muhtaram Prezidentimiz tomonidan yuksak davlat mukofotlariga sazovor bo‘lgan bir guruh vatandoshlarimiz taqdirlandi.
Eng quvonchlisi shuki, tadbirda diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning zahmatli mehnatlari yuksak darajada e’tirof etildi!
Xususan, Diniy idora tizimida uzoq yillardan beri samarali xizmat qilib kelayotgan ustozlardan O‘zbekiston musulmonlari idorasi raisining birinchi o‘rinbosari Homidjon domla Ishmatbekov, O‘zbekiston musulmonlari idorasi Faxriylar kengashi raisi Shayx Abdulaziz Mansur, Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev, Buxoro viloyati Kogon tumani "Bahouddin Naqshband" jome masjidi imom-xatibi Abdug‘ofur domla Razzoqov "Imom Buxoriy" ordenini Davlatimiz Rahbaridan qabul qilib olishdi.
Ustozlarning ilmiy-ma’rifiy faoliyati, xalq ichida ma’rifat ulashishdagi fidoyiliklari davlatimiz tomonidan yuksak qadrlangani butun diniy-ma’rifiy sohada mehnat qilayotganlar uchun katta faxr va sharafdir.
Ushbu voqea Yangi O‘zbekistonda diniy-ma’rifiy sohaga, milliy qadriyatlarimizni avaylab-asrash hamda rivojlantirishga qaratilayotgan izchil va xayrli siyosatning amaliy ifodasidir.
Xalqimizda qadimdan ma’rifat ahlini ulug‘lash, ularning zahmatli mehnatini qadrlash ezgu an’ana sanaladi. Islom ta’limotida ham ilm egalariga alohida maqom va hurmat bilan qaraladi. Zero, Imom Termiziy bobomiz rivoyat qilgan hadisi sharifda: «Ulamolar payg‘ambarlarning merosxo‘rlaridir», deyilgan.
Ulamolarga ko‘rsatilayotgan bunday e’tiborning nechog‘li xayrli ekani quyidagi hikmatda ham o‘z ifodasini topgan. Ulug‘ zotlardan biri Tovus rahmatullohi alayh otasidan quyidagicha rivoyat qilgan: «To‘rt kishini hurmat qilish sunnatdir: olim, yoshi ulug‘ inson, podshoh va ota» (Imom Abdurazzoq rivoyati).
Mazkur yuksak mukofot milliy va diniy qadriyatlarimizni tiklash, Islom ma’rifatini keng targ‘ib etish, jamiyatda bag‘rikenglik va tinchlik-omonlikni bardavom saqlash yo‘lidagi ko‘p yillik xayrli xizmatlarning munosib e’tirofidir.
Davlatimizning bunday e’tibori diniy soha xodimlariga yanada ulkan mas’uliyat yuklaydi, ma’naviy yuksalish yo‘lidagi xayrli xizmatlar ko‘lamini yanada kengaytirishga xizmat qiladi, insha Alloh.
O‘zbekiston musulmonlari idorasi Matbuot xizmati
- «
- »