Imom va hojilar ezgu ishda hamkor
Insonlar bilan yaqin bo‘lib, ularning muammolarini yechish, kamchiliklarini to‘g‘irlash, ehtiyojmandlarga ko‘makdosh bo‘lish maqsadida Samarqand viloyati vakilligi, shahar va tuman bosh imom-xatiblari va iqtidorli imom-xatiblar hamda 18 nafar xoji otalar Samarqand tumanida yig‘ildi.
Ushbu tumandagi 6 ta masjid imom-xatiblari bilan hamkorlikda 18 ta mahalladagi 60 dan ziyod xonadonga borib, nizoli va muammoli holatlarni mahalla ishtirokida bartaraf etish, ko‘makka muhtoj bo‘lganlarga moddiy yordamlar ko‘rsatish va peshin namozida jamoat bilan diniy-ma’rifiy suhbatlar o‘tkazish reja qilindi.
Mazkur tadbirlar oldidan viloyat vakilligi mas’ul xodimi Hasanxon domla Temirov imom-xatiblar bilan uchrashib, rahbariyatning ko‘rsatma va topshiriqlarini yetkazdi. Shundan so‘ng imom-xatiblar o‘zlari biriktirilgan joylarga tarqaldilar.
Alloh taolo bu xayrli ishlarni bardavom va manfaatli qilsin.
O‘zbekiston musulmonlari idorasi
Matbuot xizmati
Ota-onani hurmatlash odoblari
Ota-onaning roziligini olishga intilish fazilati barcha fazilatlarning negizi, borliqdagi har qanday haq-huquqlarning kelib chiqadigan asosidir.
Ota-onalar, bola tarbiyasi bilan shug‘ullanayotgan tarbiyachilar farzandlarga quyidagi odatlarni singdirishlari maqsadga muvofiq:
Gunohga sabab bo‘lmasa, otaonaning buyurganlarini albatta bajarish; ota-onaga muloyim so‘zlash; uyga kirganlarida, hurmatlari uchun o‘rnidan turish; har tong salom berish, uyqudan oldin xayrli tun tilash; mol-mulklarini saqlash; so‘ragan narsalarini berish; ulardan maslahat so‘rash; ota-ona haqiga duo va istig‘for aytish; ular mehmon kutishsa, yonlarida muntazir bo‘lib turish; ularning aytishlarini kutmay, ularni xursand qiladigan ishlarni bajarish; ularning huzurlarida ovozni baland ko‘tarmaslik; gaplarini bo‘lmaslik; izn berishmagan joyga bormaslik; uxlayotganlarida bezovta qilmaslik; ahli ayoli, farzandlarini ulardan ustun qo‘ymaslik; ota-ona xatoga yo‘l qo‘ysalar, bilmaslikka olish, darhol kechirib, unutish; kulgili gap bo‘lsa ham, ularning huzurlarida o‘zini tutish; ular yaxshi ko‘radigan taomni ilinish; ulardan oldin taomga qo‘l cho‘zmaslik; ularning oldilarida cho‘zilib yotmaslik, oyoq uzatmaslik; uyga ulardan oldin kirmaslik, oldilariga tushib yurmaslik; chaqirganlarida tezlik bilan javob berish; ularning hayotliklarida ham, vafot etganlaridan keyin ham do‘stlarini hurmat qilish; ota-onasining hurmatini qilmaydiganlar bilan do‘stlashmaslik; ularning haqlariga duo qilish; vafotlaridan keyin Allohning quyidagi kalomini ko‘p aytish: «Ey, Rabbim! Meni ular go‘daklik chog‘imda tarbiyalaganlaridek, Sen ham ularga rahm qilgin!» (Isro surasi, 24-oyat).
Ibrohimjon INOMOV tayyorladi.
“Islom nuri” gazetasining 2026 yil 10-sonidan
http://hidoyatuz.taplink.ws
