Ulamolar kengashi yig‘ilishi o‘tkazildi
Bugun, 12 dekabr kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari raisligida Ulamolar Kengashi yig‘ilishi bo‘lib o‘tdi. Unda Qoraqalpog‘iston musulmonlari qoziyoti qozisi, viloyatlar hamda Toshkent shahar bosh imom-xatiblari, tajribali ulamolar va diniy ta’lim muassasalari rahbarlari ishtirok etdi.
Qur’on tilovati bilan boshlangan majlisda 2024 yilgi ish faoliyat natijalari va kelgusidagi rejalar tahlil qilindi. Shuningdek, Adliya vazirligi va uning hududiy boshqarmalari tomonidan taqdim etilgan ma’lumotnomalar muhokama etildi.
Shayx Nuriddin Xoliqnazar hazratlari yig‘ilishda davlatimiz rahbari tashabbusi bilan amalga oshirilayotgan diniy-ma’rifiy islohotlar, yangi ochilgan masjid-madrasalar va qayta qurilgan jomelar, Fatvo markazi savol-javoblari, madrasalarlar ilmiy salohiyatini takomillashtirish, imom-xatiblar kasb-mahoratini oshirish va ehtiyojmand oilalarga yordam ko‘rsatish ishlari to‘g‘risida axborot berdilar.
Yig‘ilishda tizimdagi soha xodimlarining lavozim yo‘riqnomalari, hujjat yuritishi, mehnat qonunchiligi, moliya-xo‘jalik va ustav faoliyatiga oid xato-kamchiliklari tanqid qilindi. Shuningdek, belgilangan tartib-qoidalarga rioya etmaganlarga tegishli choralar ko‘rilgani aytildi.
Muftiy hazratlari yurtimiz aholisi huquqiy davlat va qonun ustuvor bo‘lgan jamiyatda istiqomat qilishini ta’kidlash barobarida soha xodimlariga bunday dedilar: “Jamiyatda kim qanday martaba va maqomda bo‘lishidan qat’i nazar qonun-qoidalarga amal qilishi shart. Qonunga itoat – rahbarga itoat, bu esa dinimiz talabidir”.
Majlisda imom-xatiblar faoliyatini rivojlantirish, mo‘min-musulmonlar ehtiyojini ta’minlash, ijtimoiy-ma’naviy muhitni yaxshilash va bugungi davr talablariga javob berish yuzasidan chora-tadbirlar rejasini ishlab chiqish kabi vazifalar topshirildi.
Shuningdek, imom-xatiblar mas’uliyatini oshirish va mehnat faoliyatini tahlil qilish uchun SPI baholash mezonini joriy etish, kelgusida imom-xatiblarni rag‘batlantirish, lavozimini ko‘tarish yoki ta’sir choralarini ko‘rishda mazkur tizim asos bo‘lishi qayd etildi.
Yig‘ilish yakunida tegishli qarorlar qabul qilindi.
O‘zbekiston musulmonlari idorasi
Matbuot xizmati
Mustaqillik shukuhi — ezgulik va saxovat timsoli
Mustaqilligimizning 35 yilligi munosabati bilan yurtimizda tinchlik, mehr-oqibat, saxovat va insonparvarlik kabi yuksak qadriyatlarni keng targ‘ib etishga qaratilgan xayrli tadbirlar amalga oshirilmoqda.
Jumladan,13 avgust kuni Xorazm viloyati bosh imom-xatibi Xayrulla domla Abdullayev boshchiligida tuman bosh imom-xatiblari, otinoyilar, «Haj–2026» ziyoratidan qaytgan hoji otalar va hoji onalar hamda mahalla faollari ishtirokida Urganch shahridagi «Oxun bobo» jome masjidida sayyor yig‘ilish o‘tkazildi. Tadbirda Xorazm viloyati hokimi o‘rinbosari R.Sobitov ishtirok etdi. Tadbir doirasida «Mustaqillik shukuhi» shiori ostida Urganch shahridagi boquvchisini yo‘qotgan, yetim, nochor va kam ta’minlangan oilalardan 100 nafariga VAQF jamoat fondi viloyat bo‘limi bilan hamkorlikda moddiy yordamlar ko‘rsatildi. Bu xayrli amal orqali ehtiyojmand oilalar holidan xabar olinib, ularga moddiy ko‘mak va samimiy mehr-e’tibor ulashildi.
O‘zbekiston musulmonlari idorasi Xorazm viloyati vakilligi matbuot xizmati