O‘zbekistonda ilk bor islomiy bank faoliyatini amalga oshirish uchun litsenziya berildi. Bu haqda Markaziy bank matbuot xizmati xabar berdi.

Regulyator boshqaruvining 2026 yil 23 oktyabrdagi 28/1-sonli qaroriga muvofiq, Open bank aksiyadorlik jamiyatiga islomiy bank faoliyatini amalga oshirish huquqini beruvchi 1-I-sonli litsenziya berilgan.

Mazkur litsenziya “Banklar va bank faoliyati to‘g‘risida”gi qonunning 5¹-moddasida nazarda tutilgan islomiy moliya operatsiyalarini qamrab oladi.

Markaziy bank fuqarolardan bank xizmatlaridan foydalanishdan avval moliya muassasasining tegishli litsenziyaga ega ekanini regulyatorning rasmiy veb-sayti orqali tekshirishni so‘radi.

Avvalroq O‘zbekistonda islomiy bank faoliyatini tashkil etish va litsenziyalash tartibi belgilangandi. 2026 yil 20 iyuldan kuchga kirgan hujjat bilan yangi islomiy banklar tashkil etish hamda an’anaviy banklarda “islomiy darchalar” ochish uchun huquqiy asoslar yaratilgan.

Unga ko‘ra, islomiy bank faoliyatini yurituvchi tashkilotlarda kamida uch nafar a’zodan iborat islomiy moliya kengashi, tegishli malakaga ega rahbar xodim hamda islomiy moliya standartlariga muvofiqlik siyosati bo‘lishi talab etiladi.