Buxoro imomlarining navbatdagi sayyor yig‘ilishi o‘tkazildi
Shu yil 23 yanvar kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlarining Ulamolar Kengashi yig‘ilishida hojilarning “Yangi O‘zbekistonning fidoyisi bo‘lib, ma’naviyat targ‘ibotchisiga aylanamiz” tashabbusi doirasidagi ko‘rsatmasiga asosan o‘tkazib kelinayotgan namunaviy-amaliy tadbirlarning navbatdagisi Buxoro viloyati Peshko‘ tumanida o‘tkazildi.
Shu kuni Buxoro viloyati bosh imom-xatibi Jobir domla Elov rahbarligida Peshku tumanida faoliyat ko‘rsatayotgan masjidlar imom-xatib, imom-noib, mahalla domlalari, otinoyilar, mutavallilar va nuroniy otaxonlar ishtirokida sayyor yig‘ilish bo‘lib o‘tdi. Unda imomlar mahallalardagi yoshlar tarbiyasiga katta e’tibor qaratish, ilm-ma’rifatga qiziqtirish alohida ta’kidlandi.
Shundan so‘ng 8 ta masjid imom-xatiblari nuroniylar bilan o‘zlariga biriktirilgan 37 ta mahallaga chiqib, 80 dan ortiq xonadon holidan xabar oldi. Jumladan, “Sadr” mahallasida yashovchi yuz yoshni qarshilagan mehnat faxriysi Ibrohim bobo Tohirovni ziyorat qildi. So‘ng “Mustaqillik” mahallasida istiqomat qiluvchi birinchi guruh nogironi, tadbirkor Barchinoy Avezova va boshqa ijtimoiy ko‘makka muhtojlarlar holidan xabar olinib, homiylar ishtirokida moddiy jihatdan ko‘mak berildi.
Shuningdek, tumandagi zamonaviy loyihalar asosida qurilgan 130 o‘rinli “Maxtoboy” maktabgacha ta’lim maskanida jajji bolalar bilan uchrashib, ularga xursandchilik ulashildi.
So‘ngra “Yangi bozor” mahallasida joylashgan “TJS MED” shifoxonsida davolanayotgan bemorlardan ko‘ngil so‘ralib, davolanish va dori-darmon uchun moddiy yordamlar ko‘rsatildi.
Kunning ikkinchi yarmida viloyat bosh imom-xatibi Jobir domla Elov tumandagi Xo‘ja Rushnoi jome masjidida, tuman imom xatiblari o‘zlariga biriktirilgan masjidlarda peshin namozini ado qilib, qavmga muhim mavzularda ma’viza qilish barobarida jamoat bilan el-yurtimiz haqqiga duoi xayrlar qilindi.
O‘zbekiston musulmonlari idorasi
Buxoro viloyati vakilligi
Matbuot xizmati
Pol Kapur: «Bu yerda tarixni nafaqat ko‘rasiz, balki uni his qilasiz»
AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur O‘zbekistondagi Islom sivilizatsiyasi markaziga tashrif buyurdi, xabar bermoqda iccu.uz.
Islom sivilizatsiyasining ko‘p asrlik tarixi, uning ilm-fan, madaniyat va ma’rifat taraqqiyotiga qo‘shgan ulkan hissasi O‘zbekistondagi Islom sivilizatsiyasi markazi ekspozitsiyalarida yaxlit va ta’sirchan tarzda namoyon etilgan. Tashrif davomida Samir Pol Kapur islomgacha bo‘lgan davr sivilizatsiyalaridan tortib, Yangi O‘zbekiston davriga qadar bo‘lgan tarixiy jarayonlarni aks ettiruvchi galereyalar, buyuk allomalarning ilmiy-ma’rifiy merosi, noyob qo‘lyozmalar, muqaddas yodgorliklar hamda zamonaviy raqamli texnologiyalar asosida yaratilgan interaktiv ekspozitsiyalar bilan yaqindan tanishdi.
Mehmon ekspozitsiyalarning mazmunan izchilligi va tarixiy jarayonlarni bir-biri bilan uzviy bog‘liq holda namoyon etish usuliga alohida e’tibor qaratdi. Uning qayd etishicha, bu yerda muzey eksponatlari orqali o‘tmish haqida ma’lumot olish bilan cheklanib qolmay, tarixiy davrlar ruhini his qilish, ular o‘rtasidagi bog‘liqlikni anglash imkoni ham mavjud.
Samir Pol Kapur o‘z taassurotlarini quyidagicha ifodaladi:
«Bu muhtasham maskan. Islom tarixi va madaniyatining asrlar davomidagi taraqqiyoti bilan yaqindan tanishish men uchun unutilmas tajriba bo‘ldi. Bu yerda tarixni shunchaki kitob sahifalari orqali emas, balki o‘z ko‘zingiz bilan ko‘rasiz, uni his qilasiz va go‘yo o‘sha davrlarning ichida bo‘lasiz. Shu bois ushbu noyob maskanni barpo etishga hissa qo‘shgan barcha insonlarga samimiy minnatdorchilik bildiraman.
Yoshlarga ham bu yerga kelishni albatta tavsiya qilaman. Chunki bu maskan nafaqat tarixni o‘rganish, balki o‘tmish bilan kelajak o‘rtasidagi uzviy bog‘liqlikni anglash imkonini beradi. Men uchun eng esda qolarli lahzalardan biri Qur’oni karimga bag‘ishlangan golografik namoyish bo‘ldi. U menda katta taassurot va hayajon uyg‘otdi.
Menimcha, bu dargoh islom sivilizatsiyasining jahon tamadduniga qo‘shgan ulkan hissasini butun dunyoga namoyon etishga xizmat qiladi. Shuning uchun har bir inson bu yerga tashrif buyurib, ana shu boy va bebaho meros bilan shaxsan tanishishi lozim».
Pol Kapurning fikricha, Markazning ahamiyati uning tarixiy merosni namoyon etish bilangina cheklanmaydi. Ushbu maskan yosh avlod uchun o‘tmish saboqlarini anglash, ilm-fan va ma’rifatning sivilizatsiya taraqqiyotidagi o‘rnini his etish, milliy va umuminsoniy qadriyatlarga hurmat ruhini shakllantirish uchun ham muhim ma’naviy-ma’rifiy maydon vazifasini o‘taydi.
Tashrif yakunida AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur Islom sivilizatsiyasi markazidan olgan taassurotlari yuksak ekanini qayd etib, ushbu maskan boy tarixiy merosni zamonaviy muzey texnologiyalari va ta’sirchan taqdimot usullari orqali jahon jamoatchiligiga yetkazishda muhim ahamiyat kasb etishini ta’kidladi.
O‘zbekiston musulmonlari idorasi Matbuot xizmati
