Xayriya karvoni 500 oilaga xursandchilik ulashadi
Shu yilning 24 yanvar kuni “Vaqf” xayriya jamoat fondi tomonidan oziq-ovqat, kiyim-kechak, o‘quv qurollari, ma’rifiy kitoblar va maishiy texnikalar ortilgan xayriya karvonlari 500 dan ziyod kam ta’minlangan, ehtiyojmand oilalar xursandchilik ulashishni boshladi.
Shu munosabat bilan mazkur mehr-muruvvat karvonini kuzatish marosimida O‘zbekiston musulmonlari idorasi raisining birinchi o‘rinbosari Homidjon domla Ishmatbekov, “Vaqf” fondi rahbari Isaxon Abdullayev, mutasaddi vakillar va OAVlari xodimlari ishtirok etdi.
Tadbirda yurtimizda davlatimiz Rahbari tashabbuslari bilan ijtimoiy himoyaga muhtoj bo‘lgan aholi qatlamini qo‘llab-quvvatlanayotgani, nogironligi bo‘lganlar, kambag‘al oilalarga doimiy g‘amxo‘rlik ko‘rsatib kelinayotgani e’tirof etilib, dinimizda muhtojlarga yordam berish, nogironligi bor insonlarga mehr-muruvvat ko‘rsatish, miskin va bechoralar holidan xabar olish xayrli amallardan sanalishi bayon qilindi.
Fond rahbari xayriya karvoni doirasida kam ta’minlangan oilalar, yetim-miskinlar, nogironi bor oilalarga oziq-ovqat mahsulotlari, kiyim-kechak, poyabzallar, velosiped, kitoblar, ko‘mir, isitish moslamalari, maishiy texnikalar topshirilishi, uch kun davomida Fond vakillari 500 dan ziyod ehtiyojmand oilalarga xursandchilik ulashishi haqida ma’lumot berdi.
O‘zbekiston musulmonlari idorasi Matbuot xizmati
O‘zbekiston Islom sivilizatsiyasi markazi noyob Qur’oni karim nusxasini yaratish bo‘yicha jahon xattotlar tanlovini e’lon qildi
26 avgust kuni O‘zbekistondagi Islom sivilizatsiyasi markazida “Islom sivilizatsiyasi: yangi nigoh, yangi kashfiyotlar” xalqaro mediaforumning “Asrlarni birlashtiruvchi meros. Islom sivilizatsiyasining ma’naviy mazmun-mohiyati” mavzusidagi uchinchi yalpi sessiyasi bo‘lib o‘tdi, deb xabar qilmoqda “Dunyo” AA.
Sessiya doirasida Qur’oni karim merosi, qadimiy qo‘lyozmalar, islom xattotligi, hujjatli kino hamda tarixiy manbalarni o‘rganishda sun’iy intellektdan foydalanishga bag‘ishlangan xalqaro loyihalar taqdim etildi.
Xususan, “114 Qur’on: islom olami xattotligining 114 durdonasi”, “Katta Langar Qur’oni: haqiqat va afsonalar”, “Allohning 99 ismi: Uning go‘zal ismlari orqali Yaratganni anglash”, “Sun’iy intellekt – qadimiy qo‘lyozmalarni o‘qishning raqamli kaliti” loyihalari hamda “Yagona tarixiy meros sahifalari” loyihasi doirasida yaratilgan “Masjid” hujjatli filmi namoyish etildi.
Xalqaro muhokamalarda Islom hamkorlik tashkiloti, shuningdek, Jazoir, O‘mon, Pokiston, Saudiya Arabistoni, Iroq, Mali va O‘zbekistonning yetakchi ommaviy axborot vositalari vakillari ishtirok etib, islomofobiya va mavjud stereotiplarni bartaraf etishda medianing o‘rni haqida fikr almashdi.
Sessiya yakunida turli mamlakatlar va xattotlik maktablarining an’analarini birlashtiruvchi noyob Qur’oni karim nusxasini yaratish bo‘yicha Xattotlar umumjahon tanlovi e’lon qilindi.
Eslatib o‘tamiz, mazkur xalqaro mediaforumning asosiy tadbirlari O‘zbekiston Islom sivilizatsiyasi markazida o‘tkazilib, unda qariyb 50 mamlakatdan media va ekspert hamjamiyatining 300 nafarga yaqin vakili — media kompaniyalar, axborot agentliklari va telekanallar rahbarlari, jurnalistlar, prodyuserlar, olimlar hamda kreativ industriya mutaxassislari ishtirok etmoqda.
O‘zbekiston musulmonlari idorasi Matbuot xizmati
