Payg‘ambarimiz alayhissalom Jabroil alayhissalomni asl holida ko‘rganmilar?
Cavol: Payg‘ambarimiz alayhissalom Jabroil alayhissalomni asl suratida ko‘rganmilar?
Javob: Bismillahir Rohmanir Rohiym. Ha ko‘rganlar. Rasuli akram sollallohu alayhi vasallam Jabroil alayhissalomni asl suratlarida ikki marta ko‘rganlar. Imom Buxoriy rahimahulloh Oisha roziyallohu anho onamizdan rivoyat qilgan uzun hadisda bunday deganlar: “Lekin u zot Jabroil alayhissalomni ikki marta o‘z suratida ko‘rganlar”.
Ko‘plab ulamolar ikki martaning bir martasi Rasululloh sollallohu alayhi vasallam yerda, Jabroil alayhissalom ufqda bo‘lgan holatda, ikkinchisi Isro va me’roj kechasi Rasululloh sollallohu alayhi vasallam osmonga ko‘tarilganlarida Sidratul muntaho oldida Jabroil alayhissalomni ko‘rganlar, deyishgan (“Umdatul qoriy” kitobi). Vallohu a’lam.
O‘zbekiston musulmonlari idorasi
Fatvo markazi.
Namozim buzildimi?
Savol: Masjiddagi jamoatda ba’zan oldingi safdagi odamning kiyimi kalta bo‘lgani uchun sajdada orqasi qisman ochilib qoladi va bexosdan unga ko‘zimiz tushib qoladi. Shu holatda tahorat yoki namozimiz buzilmaydimi?
Javob: Bismillahir Rohmanir Rohiym. Ulamolar tahorat va namozni buzuvchi omillarni birma-bir sanaganlar. Ular ichida birovning avratiga ko‘z tushib qolish sababli buziladi, degan gap yo‘q. Birovning, xoh ayolning, xoh erkakning avratiga qarash sababli bavl yoki biror suyuqlik chiqmasa, tahorat sinmaydi. Ammo bu degani qarash, nazar solish mumkin ekan, deb tushunmaslik kerak. Chunki bunday ishlar aslo mumkin emas.
Bir narsani yodda tutish lozimki, namoz o‘qish uchun tayyorlanayotgan inson namoz o‘qish asnosida avratlari ochilib qolmasligining chorasini ko‘rishi kerak bo‘ladi. Chunki bir rukn (farz amali) miqdoricha avratining to‘rtdan biri ochilib tursa, uning namozi buziladi. Vallohu a’lam.
O‘zbekiston musulmonlari idorasi
Fatvo markazi
- «
- »