Saudiya Arabistoni xorijiy fuqarolarga Makka va Madinada ko‘chmas mulkka sarmoya kiritishga ruxsat bergani haqida “Al-Arabiya” sayti xabar qildi.

Kapital bozorlari boshqarmasi ta’kidlashicha, ushbu qadam mamlakat iqtisodiyotiga xorijiy sarmoyalarni jalb qilish va islomning muqaddas shaharlarida infratuzilmani rivojlantirish uchun mablag‘ oqimini ta’minlash maqsadida amalga oshirilgan.

“IslamNews” ma’lumotiga ko‘ra, Saudiya Arabistoni 2030 yilgacha haj va umra ibodatlarini bajarish uchun taxminan 30 million ziyoratchini qabul qilishga umid bildirmoqda. 2019 yilda mamlakat hukumati ziyorat ishlaridan 12 milliard AQSH dollari miqdorida daromad olgan. Haj va umra mamlakat iqtisodiyotining muhim sektori hisoblanadi va Saudiya Arabistoni bu sohani yanada kengaytirishga intilayotganini qayd etdi.

Makka va Madinada ko‘chmas mulkka sarmoya kiritish bo‘yicha qaror e’lon qilinganidan so‘ng Makkadagi qurilish kompaniyalari aksiyalari narxi 10 foizga oshdi. Shunga qaramay ko‘chmas mulk sotib olishda ba’zi cheklovlar bo‘ladi. Saudiya Arabistoni fuqaroligini olmagan shaxslar ko‘chmas mulk obyektlarining 49 foizidan ortig‘ini o‘z mulki sifatida egallay olmaydi.

O‘zbekiston musulmonlari idorasi
Matbuot xizmati