Afg‘oniston poytaxti Kobul shahrida O‘zbekiston elchixonasi bilan hamkorlikda Alisher Navoiy hamda Zahiriddin Muhammad Boburning ilmiy va madaniy merosiga bag‘ishlangan tadbir o‘tkazildi, deya xabar bergan mahalliy "Bakhtarnews" axborot agentligi.

Anjumanda ushbu qo‘shni davlatning axborot, madaniyat va san’at vaziri Mulaviy Atiqulloh Aziziy, mamlakatimizning Kobuldagi elchisi Oybek Usmonov, shuningdek ko‘plab adiblar, yoshlar ishtirok etdi.

Ishtirokchilar Afg‘oniston va O‘zbekiston o‘rtasidagi boy, teran va mushtarak madaniy merosni asrab-avaylash, ilm-fan, adabiyot, falsafa va san’at sohasidagi hamkorlikni kuchaytirish borasida hamkorlikda faol ish olib borilayotganini ta’kidladilar.

Ziyolilar, shoir-yozuvchilar ikki betakror siymoning ijodiy, ilmiy va madaniy faoliyatiga oid fikr-mulohazalari bilan  o‘rtoqlashdi.

Muharrama Pirmatova, O‘zA