Buyuklarning onalari: Xonzodabegimning matonati
Qadim va ko‘hna Buxoro – avliyolar, Islom olamiga munosib hissa qo‘shgan ulamolar maskani, butun dunyodan sayyohlar ziyorat uchun keladigan sharif shahar. Uni sharaflantirib turgan ajdodlarimiz orasida Abdulxoliq G‘ijduvoniy hazratlari alohida o‘rin tutadi.
Abdulxoliq G‘ijduvoniy nomini tilga olar ekanmiz, har safar: “Ust-boshingizni mehnatingiz bilan bezang”, “Ko‘ngil firog‘ini muhabbat olovi bilan yoqing” kabi go‘zal vasiyatlari qulog‘imiz ostida jaranglaydi.
1103 yili asli rumlik Shayx Abduljamil va Malatiya podshohining qizi Xonzodabegimning nikohidan “Abdulxoliq” ismli pok o‘g‘il dunyoga keldi. Baqo eshigidan kirguniga qadar faqat Alloh zikrida bo‘lgan valiy zot Abdulxoliq G‘ijduvoniy hazratlari “Xojai Jahon” nomiga musharraf bo‘lgan.
Barcha ulug‘ zotlarning ortida mushtipar ayol – taqvodor va fidoyi onalar turadi. Abdulxoliq G‘ijduvoniyning onasi Xonzodabegim ham Shayx Abduljamil bilan besh yilcha birga hayot kechirgan. Xonzodabegim yigirma bir yoshida beva qolib, umrini shu birgina farzandining ilm olishi va tarbiyasiga bag‘ishladi. Podshohning qiziman, demasdan hayotning past-balandliklarini shukr va sabr bilan yengib o‘tdi. Mehnatkashligi, qat’iyatliligi yosh Abdulxoliqning kelgusi hayotida butun umriga tatigulik darajada o‘z ta’sirini o‘tkazdi.
Har doim Allohga iltijo qildi. Boshqalarga borib arz qilmadi, otasining yurtiga qaytib ketmadi, yaxshi gumonda bo‘lib, buni bir xayrli taqdirga yo‘yib, chiroyli sabr qildi...
Ona farzandini o‘zidan uzib biror yerga yuborish u yoqda tursin, bir necha soatga bo‘lsa-da, boshqaga berib ketolmaydi. Balki shundan bo‘lsa kerak, Payg‘ambar alayhissalom: “Jannat onalar oyog‘i ostidadir”, deganlar (Imom Quzo’iy rivoyati). Xonzodabegim ham yo‘qotsa-da, ayollik iffatiyu or-nomusini va ma’naviyatini yo‘qotmadi. Butun umrini, ilmini, kuch-quvvatini farzandining kamoloti yo‘lida sarfladi. Olis yurti, ota-ona sog‘inchi qalbini qancha o‘rtamasin, farzandining yonida qoldi.
Ona nomini pok saqlay olgan ayollarimiz bor ekan, hayot munavvar. Buning uchun har bir muslima o‘zining asosiy burchi ilm va tarbiyani mahkam tutmog‘i lozim. Zero, qo‘liga kitob tutgan xalqni, millatni avvalo ayol tarbiyalaydi. Sizu bizning zimmamizdagi vazifalar yuki og‘ir bo‘lsa ham, sharafi yuksakdir. Shunday ekan, olimu ulamolarning merosxo‘rlari sifatida ularga munosib farzand bo‘laylik!
Norbibi MARDONOVA,
G‘ijduvon tumani bosh otinoyisi
"Mo‘minalar" jurnali 2-sonidan
Tailanddagi xalqaro halol mahsulotlar ko‘rgazmasida O‘zbekiston milliy paviloni tashkil etildi
O‘zbekiston Bosh konsulxonasi vakillari Tailandning Shahzoda Songkxla universitetida bo‘lib o‘tayotgan 15-Butunjahon halol mahsulotlar ko‘rgazmasi va “World HAPEX 2026” xalqaro anjumanida ishtirok etmoqda, deb xabar beradi “Dunyo” AA.
Tadbirda Tailand, Saudiya Arabistoni, Bahrayn, Malayziya, Pokiston, Bangladesh va Xitoyning davlat idoralari, biznes, ilmiy doiralar hamda sanoat vakillari qatnashmoqda.
Panel muhokamasida so‘zga chiqqan O‘zbekiston bosh konsuli Faxriddin Sultonov mamlakatimiz 2019 yildan buyon Islom mamlakatlari standartlar va metrologiya instituti (SMIIC) a’zosi ekanini qayd etib, Prezident Shavkat Mirziyoyev rahbarligida islom dunyosi davlatlari bilan ochiq, pragmatik va o‘zaro manfaatli hamkorlik izchil rivojlantirilayotganini ta’kidladi.
Shuningdek, ko‘rgazma doirasida Bosh konsulxona tomonidan mamlakatimizning turistik salohiyati, boy milliy madaniyati va an’analariga bag‘ishlangan milliy pavilon tashkil etildi. Unda Amir Temur, Alisher Navoiy, Zahiriddin Muhammad Bobur, Abu Ali ibn Sino, Abu Rayhon Beruniy va Imom Buxoriy kabi buyuk allomalar merosi, shuningdek, Toshkent shahridagi Islom sivilizatsiyasi markazi haqidagi kitoblar va videomateriallar namoyish etilmoqda.
Mazkur ko‘rgazma 30 iyuldan 2 avgustga qadar davom etadi.
O‘zbekiston musulmonlari idorasi Matbuot xizmati
