Yaxshi amal qilish fikri Allohning “mehmoni”dir
Hakimul ummat, Mavlono Ashraf Ali Tahonaviy quddisa sirruh bunday deydilar: “Qalbga, biron yaxshi amalni qilib olayin, degan uy kelishi so‘fiylar istilohida “vorid” deyiladi. Ya’ni, men shu savob ishni qilayin, namoz o‘qib olayin, tahajjudga turayin, sadaqa berayin, birodarimga yordam qilayin, do‘stimning g‘amini ketkazayin, degan kabi o‘ylar kelishini “vorid” deydilar.
“Vorid” Alloh taolo tarafidan kelgan mehmondir. Agar sen bu mehmonni biroz bo‘lsa ham izzat qilsang, mehmonnavozlik ko‘rsatsang, u holda u yana keladi. Qaysi yaxshi amalni qilish fikri qalbingga kelsa, o‘sha zahoti uni bajarish mehmonnavozlikdir. Agar sen bir martta mehmonnavozlik qilmasang, u mehmon juda hurmatga sazovor bo‘lgani sababli huzuringa boshqa kelmay qo‘yadi. Uning qaytib kelmay qolishidan panoh so‘ragin. U mehmon qaytib kelmay qolishi, degani, endi qalbga yaxshi amal qilish fikri kelmaydi deganidir. Alloh taolo saqlasin. Qalbga muhr bosilsa, zang qoplasa, ana o‘shanda yaxshi amal qilish fikri kelmay qoladi".
“Nasihatlar guldastasi”dan.
Saxovatpesha yurtdoshlarimiz masjidlar kommunal to‘lovlarini qo‘llab-quvvatladi
2026 yilning iyun–iyul oylari davomida yurtdoshlarimiz tomonidan DOMO mobil ilovasi orqali masjidlarning kommunal xarajatlarini qoplashga qaratilgan xayrli tashabbus faol qo‘llab-quvvatlandi.
Ushbu davr mobaynida 650 ta masjid uchun jami 254,7 million so‘m xayriya mablag‘lari yig‘ilib, po‘latday shaffoflik bilan to‘lovlarga yo‘naltirildi.
Sarflangan mablag‘lar taqsimoti:
-
225,9 mln so‘m (88,7%) — elektr energiyasi to‘lovlariga;
-
28,8 mln so‘m (11,3%) — tabiiy gaz xarajatlarini qoplashga.
Eng ko‘p xayriya qilingan hududlar:
-
Toshkent shahri — 103,6 mln so‘m;
-
Toshkent viloyati — 29,3 mln so‘m;
-
Qoraqalpog‘iston Respublikasi — 27,4 mln so‘m;
-
Farg‘ona viloyati — 24,9 mln so‘m.
Bu kabi xayrli ehsonlar masjidlarimizning uzluksiz faoliyatini ta’minlash va namozxonlar uchun munosib sharoit yaratishga xizmat qilmoqda.
Barcha saxovatpesha hamyurtlarimizga samimiy minnatdorlik bildirib, qilinayotgan ezgu amallarga Haq taolodan baraka tilaydi.
O‘zbekiston musulmonlari idorasi
Matbuot xizmati