Laylatul qadr duosi
Muoviya ibn Abu Sufyon roziyallohu anhudan rivoyat qilinadi. Nabiy sollallohu alayhi vasallam: “Laylatul Qadr yigirma yettinchi kechadir”, dedilar (Abu Dovud va Ahmad rivoyat qilishgan).
Oisha roziyallohu anhodan rivoyat qilinadi: “Yo Allohning Rasuli! Ayting-chi, agar qadr kechasi qaysi kecha ekanini bilsam, unda nima deyman?” dedim. U zot alayhissalom: “Allohim! Albatta Sen afv qiluvchisan. Afvni yaxshi ko‘rasan. Bas, meni afv qilgin”, degin, dedilar (Imom Termiziy, Nasoiy va Ibn Moja rivoyati).
Allohumma innaka ’afuvvun, tuhibbul ’afva, fa’fu ’anniy...
Allohim, Sen afv qiluvchisan, afv etishni yaxshi ko‘rasan. Meni afv et. Mening ahlim va zurriyotimni ham afv et.
Allohim, Sen afv qiluvchisan, afv etishni yaxshi ko‘rasan. Meni onamni, otamni va ularning ota-onalarini, ota-onalarining ota-onalarini ham afv etgin.
Allohim, Sen afv qiluvchisan, afv etishni yaxshi ko‘rasan. Mening og‘a-inilarim, birodarlarim va ularning zurriyotlarini ham afv etgin.
Allohim, Sen afv qiluvchisan, afv etishni yaxshi ko‘rasan. Mening tog‘alarim, xolalarim va ularning zurriyotlarini ham afv etgin.
Allohim, Sen afv qiluvchisan, afv etishni yaxshi ko‘rasan. Mening amakilarim, ammalarim va ularning zurriyotlarini ham afv etgin.
Allohim, Sen afv qiluvchisan, afv etishni yaxshi ko‘rasan. Mening do‘stlarim, hamkasblarim, qo‘shnilarim, meni sevgan va men ularni sevganlarimni afv etgin...
Allohim, Sen afv qiluvchisan, afv etishni yaxshi ko‘rasan. Meni haqqimga ortimdan g‘oibona duo qilganlarni va meni duo qilishga undaganlarni ham afv et.
Allohim, Sen afv qiluvchisan, afv etishni yaxshi ko‘rasan. Bizni zimmamizda g‘amxo‘rlik qilishimiz va ado etishimiz lozim haqlari bo‘lgan va biz ular xususida sustkashlik qilganlarimizni afv et.
Allohim, Sen afv qiluvchisan, afv etishni yaxshi ko‘rasan. Bizning vafot etgan marhumlarimizni va musulmonlarning marhumlarini afv etgin.
Allohim, Sen afv qiluvchisan, afv etishni yaxshi ko‘rasan. Barcha ushbu duoimni o‘qib “omiyn” deb turganlari afv etgin.
Omiyn, omiyn, omiyn.
Tarixni buzib ko‘rsatmaslik uchun
Vazirlar Mahkamasi huzuridagi Imom Buxoriy xalqaro ilmiy-tadqiqot markazida "Islom ma’rifati, hadis ilmi va Imom Buxoriy merosi" o‘quv kursi o‘tkazildi. Mutaxassislar tomonidan yodgorlik majmuasi gid-ekskursovodlari uchun o‘tkazilgan mashg‘ulotlar doirasida ekskursiya faoliyati bilan bog‘liq huquqiy, nazariy va amaliy masalalar ko‘rib chiqildi, xabar bermoqda “Samarkandskiy vestnik” nashri.
- Bu yerga tashrif buyurgan har bir ziyoratchi faqat ibodat qilish uchun emas, balki ma’naviy "oziq" olish uchun ham borishi kerak, - deydi Imom Buxoriy xalqaro ilmiy-tadqiqot markazi direktori Sh.Ziyodov. - Bu yerda faoliyat yuritayotgan gidlarning malakasini oshirish tizimini yo‘lga qo‘yar ekanmiz, ularga Imom Buxoriyning bizga qoldirgan merosini, bu merosning tarixiy manbalarini chuqur o‘rgatishimiz shart.
Kurs doirasida majmuaga birinchi marta tashrif buyurgan mehmonlar bilan muloqotning o‘ziga xos xususiyatlari muhokama qilindi. Xorijlik ziyoratchilarga nafaqat Imom al-Buxoriy hayotidagi faktlar va diniy qadriyatlarimizni yetkazish, balki boy madaniy merosimizni asrab-avaylash va yetkazish kabi dolzarb masalalar ko‘tarildi.
Gid-ekskursovodlar ham o‘z tajribalari bilan o‘rtoqlashib, kelgusidagi ishlarni tashkil etish bo‘yicha takliflar berdilar. Bu bevosita ekskursiyalarni o‘tkazish paytida yuzaga keladigan masalalarni muhokama qilish imkonini berdi.
Kurs O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mita, Diniy ta’lim sohasida kadrlar malakasini oshirish va qayta tayyorlash instituti, Imom Buxoriy xalqaro ilmiy-tadqiqot markazi, viloyat hokimligi hamda Imom Buxoriy yodgorlik majmuasini saqlash va uning atrofini obodonlashtirish departamenti tomonidan tashkil etildi.
Tarixiy obidalar va ziyoratgohlar turizm salohiyatining muhim qismi bo‘lgan Samarqand viloyati uchun malakali mutaxassislarni tayyorlash alohida ahamiyatga ega. Mehmonga tashrif buyuriladigan joyning tarixi qanchalik to‘liq va tushunarli ochib berilishi gidning professionalligiga bog‘liq. Shuning uchun ham gid-ekskursovodlarning malakasini muntazam oshirib borish, ularning kasbiy bilim va ko‘nikmalarini takomillashtirish hamda zamonaviy xizmat ko‘rsatish standartlarini joriy etish Samarqandda turizm xizmatlari sifatini oshirishda ustuvor yo‘nalishlardan biri bo‘lib qolmoqda.
O‘zbekiston musulmonlari idorasi Matbuot xizmati