Odatda odam bir natija ko‘rsatsa, nimagadir erishsa bunda o‘zining kuch va imkoniyatlari, harakatlarini birlamchi sanay boshlaydi va shunda xatoga yo‘l qo‘yadi. Holbuki, Allohning fazlisiz hech kim hech bir narsaga ega bo‘la olmaydi.

UFC chempioni Joze Aldo 10 yil mobaynida hecham yengilmagan. Lekin Ligada yangi jangchi bilan urushganida esa 13 sekundda nokautga uchragan.

Krishtianu Ronaldo eng cho‘qqiga chiqqan edi. Lekin Liga chempionatida gol ura olmadi.

Yugurish bo‘yicha rekordchi Useyn Bolt finalda oyog‘i qayrilib, finishga yetib bora olmagan.

Mashhur Mixael Shumaxer esa oyog‘ini sindirib olib, chempionatni o‘tkazib yuborgan.

Afsonaviy shaxmatchi Robert Fisher hayotidagi eng muhim o‘yinda yosh bola qiladigan xatoga yo‘l qo‘yib, yutqazgan...

Demak, hayotda nima bo‘lishidan qat’iy nazar esda tuting: nasibada borini olasiz. Harakat va urinishlar sabablar, xolos.

Shunday ekan, har ishga siqilmang. Allohga suyaning. Hammasini Uning amridan, deb biling! Adashib, uloqib ketishdan panoh tilang. Zotan, inson baribir ojizdir.

Alloh taolo Haj surasining 73-oyatida bunday misol keltiradi: “...bir pashshani yarata olmaslar, agar pashsha ulardan biror narsani tortib olsa, uni undan ayirib ololmaslar”. Rostdan ham, bir pashsha chaqsa, uni tutishga, bizdan olganini qaytarib olishga qodir emasmiz. Bas, Rabbimizga tayanib, o‘zimizni, ishlarimizni havola qilib yashaylik, azizlar! Ishoning, bu eng ulug‘ saodatdir.

Akbarshoh Rasulov