Bir odamning qorni ochdi. U garchi iqtisodiy ahvoli yaxshi bo‘lmasa-da, bir tamaddixonaga kirib, taom buyurtma qildi. Buyurtma tayyor bo‘lgunga qadar derazadan tashqariga qarab o‘tirarkan, ellik yoshlardagi odam tez-tez tamaddixonaga qarab qo‘yayotgani, kirishga jazm qilolmay turganiga ko‘zi tushdi. O‘tgan ketganlar unga e’tibor bermas, u esa aftidan juda och qolgan edi.
Shu payt buyurtma berilgan taom olib kelindi. U esa hech o‘ylanmasdan ovqatni olib, o‘zi och bo‘lsa-da, ko‘chadagi odamga olib chiqib berdi. So‘ng ortiga qaytib, hisobni berishlarini so‘radi. Holatni zimdan kuzatib turgan tamaddixona rahbari xizmatchiga bir qog‘oz berdi. Unda bunday so‘zlar yozilgan edi:
“Insoniylik bebahodir, sizday oliyjanob inson bizning tamaddixonaga kelganidan baxtiyormiz. Ruxsat bersangiz, siz bir miskinni mehmon qilganingiz kabi biz ham sizni mehmon qilsak”.
Xulosa shuki, Alloh taolo hech bir amalni zoye qilmas, bandasini bandasidan qarzdor holda qoldirmas, ehsonga ehson bilan javob qaytarar ekan.
Shunday ekan, imkonimiz borida boshqalarga yaxshilik qilib qolaylik.
Akbarshoh Rasulov
Bugun, 12 yanvar kuni O‘zbekiston musulmonlari idorasi raisining birinchi o‘rinbosari Homidjon domla Ishmatbekov Rossiya Federatsiyasining Mordoviya Respublikasi muftiysi Rail hazrat Asainovni qabul qildi.
Samimiy ruhda o‘tgan uchrashuvda Homidjon domla martabali mehmonga Diniy idora faoliyati, keyingi paytlarda yo‘lga qo‘yilgan Fatvo markazi faoliyati, bo‘limlar, nashriyot, hazrati Imom dahasida joylashgan tarixiy va zamonaviy obidalar haqida so‘zlab berdi.
O‘z navbatida, Rail hazrat Asainov do‘stona qabuldan mamnun bo‘lganini izhor etib, O‘zbekistonga bo‘lgan ehtiromi bo‘lakcha ekani, bu yurtni nafaqat Imom Buxoriyning vatani, balki ilmiy noyob asarlar makoni sifatida qadrlashini aytib o‘tdi.
Tomonlar ilm-ma’rifat va Islom ravnaqi yo‘lida hamkorlik qilishda hamfikr ekanini bildirib, bundan keyingi xalqaro ilmiy-amaliy anjumanlarda yanada yaqin aloqalar o‘rnatish borasida so‘z yuritishdi.
Uchrashuv yakunida Rail hazrat Asainovga O‘zbekiston musulmonlari idorasining esdalik hadyasi topshirildi.
Ma’lumot o‘rnida, Mordoviya Respublikasi musulmonlari Diniy boshqarmasi 2000 yilda tashkil etilgan. Tashkilot Rossiya Federatsiyasi musulmonlari diniy boshqarmasi markazlashgan diniy tashkiloti tarkibida faoliyat yuritadi. Boshqarma tarkibiga Mordoviya Respublikasi hududida joylashgan 30 ta mahalliy diniy tashkilot kiradi. Rail hazrat Asainov ushbu tashkilotga 2023 yildan beri rahbarlik qilib kelmoqda.
O‘zbekiston musulmonlari idorasi
Matbuot xizmati