Bugun, 9 oktyabr kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari juma namozini Shayxontohur tumanidagi "Koh ota" jome masjidida ado etdilar.

Muftiy hazratlari namozdan oldin jamoatga Islom dinida insonlarga manfaat yetkazish, jamiyat va elni obod qilishning ahamiyati hamda saxovat va xayr-ehsonning ma’naviy fazilatlari haqida ta’sirli suhbat qilib berdilar.

Ma’ruzada aytilganidek, insonga berilgan imkoniyatlar Alloh taoloning in’omi. Odamlarga ezgulik va manfaat yetkazish esa ulug‘ amallar sirasidan. Masalan, ta’lim maskanlari, shifoxona, yo‘l yoki ko‘priklarni ta’mirlab bergan kishiga shu joylardan qancha foydalanilsa, shuncha savob yoziladi.

Suhbat davomida bunga Abu Hurayra roziyallohu anhudan rivoyat qilingan muborak hadis keltirildi:

Rasululloh sollallohu alayhi va sallam: “Inson vafot etsa, uning amallari uziladi, faqat uchta narsadan: sadaqai joriyadan, foydalaniladigan ilmdan va uning haqiga duo qilib turadigan solih farzanddan tashqari”, deganlar (Imom Muslim rivoyati).

Muftiy hazratlari ushbu hadisga tayanib, jamiyatga foydasi tegadigan xayrli ishlarni qoldirish har bir mo‘min uchun abadiy savob manbai – sadaqai joriya bo‘lishini tahlil qilib berdilar.

Shuningdek, jamiyatda saxovat va oqibat muhitini mustahkamlash, yoshlarni ilm-ma’rifatli va vatanparvar etib tarbiyalash masalalariga ham to‘xtalib o‘tildi.

Yakunda yurtimiz tinchligi, xalqimiz farovonligi hamda el manfaati yo‘lida xizmat qilayotgan barcha fidoyi va saxovatpesha yurtdoshlarimiz haqiga xayrli duolar qilindi.

O‘zbekiston musulmonlari idorasi Matbuot xizmati