O‘zbekiston tashqi ishlar vaziri o‘rinbosari Olimjon Abdullayev boshchiligidagi delegatsiya 23 avgust kuni Rossiyaning Janubiy federal okrugiga amaliy tashrifi doirasida Rostov viloyatida bo‘ldi, deb xabar bermoqda "Dunyo" AA muxbiri. 
 

Ish safari davomida viloyat rahbariyati bilan uchrashuvlar o‘tkazilib, unda O‘zbekiston fuqarolari huquqlarini himoya qilish masalalari, iqtisodiy va madaniy-gumanitar sohalardagi ikki tomonlama hamkorlik istiqbollari muhokama qilindi.

Migrantlar huquqlari, ularni ijtimoiy himoyalash, mehnat faoliyatini qonuniylashtirish masalalariga alohida e’tibor qaratildi. Delegatsiya Don davlat texnika universitetiga (DDTU) tashrif buyurib, u yerda muzokaralar o‘tkazdi, ta’lim va fan sohasidagi ilg‘or tajribalar bilan tanishdi.

Eng yirik mashinasozlik korxonasi – "Rostselmash" korxonasi faoliyati o‘rganildi, "YugStroyInvest" va "Avakon" qurilish obyektlarida mehnat qilayotgan O‘zbekiston fuqarolari bilan profilaktik suhbatlar o‘tkazildi, yashash va dam olish sharoitlari o‘rganildi.

Ishchi tashrif yakunlari bo‘yicha migrantlar huquqlarini himoya qilish, o‘zaro tajriba almashish va madaniy aloqalarni kengaytirish sohasida hamkorlikni yanada rivojlantirish bo‘yicha kelishuvga erishildi.

O‘zbekiston va Rostov viloyati o‘rtasidagi strategik sheriklikni mustahkamlash bo‘yicha tashabbuslarni amalga oshirish va "yo‘l xaritalari"ni tayyorlash bo‘yicha qo‘shma ishchi guruhlar tuzish to‘g‘risida qaror qabul qilindi.

O‘zbekiston Musulmonlari idorasi vakili masjidlarda O‘zbekiston fuqarolari bilan juma namozida ishtirok etdi. Jamoatchilik bilan ma’naviy-ma’rifiy tarbiya va diniy bag‘rikenglik masalalari yuzasidan suhbatlar o‘tkazildi. O‘zbekiston fuqarolarini qiziqtirgan savollarga tegishli javoblar berildi.

Mustaqillik bayrami munosabati bilan tashkil etilgan ishchi tashrifi doirasida Rostov shahrida mehnat qilayotgan fuqarolar uchun bayram tadbiri tashkil etildi. Tadbirda O‘zbekiston Musulmonlari idorasi raisi o‘rinbosari Zayniddin Eshonqulov tomonidan fuqarolarning ekstremistik tashkilotlar faoliyatiga kirib ketishining oldini olishga qaratilgan profilaktik suhbatlar o‘tkazildi.

O‘zbekiston delegatsiyasi Rossiya Ichki ishlar vazirligining Rostov viloyati boshqarmasi rahbariyati bilan ham uchrashuv o‘tkazdi va unda migratsiya siyosati, huquqbuzarliklarning oldini olish, viloyatda istiqomat qilayotgan mamlakatimiz fuqarolarining huquqiy holatini qonuniylashtirish masalalari muhokama qilindi. O‘zaro hamkorlikni kuchaytirish, xorijiy fuqarolarning xavfsiz va qonuniy yashashi uchun shart-sharoit yaratishga alohida e’tibor qaratildi. 

O‘zbekiston musulmonlari idorasi
Matbuot xizmati