Xabar berganimizdek, yaxshi niyat ila yurtimizdan umra safariga otlangan navbatdagi guruh ziyoratchilari eson-omon Jidda shahriga yetib keldi. Bu yerda ularni mutasaddilar kutib olib, zamonaviy avtobuslarlarga o‘tkazib, Madinai munavvaraga kuzatishdi.
Ziyoratchilarimiz Payg‘ambarimiz alayhissalom shaharlariga borgunga qadar Saudiya Arabistonining mashhur tansiq taomlaridan biri – Albaykni tanovvul qilib, chanqoqbosdi salqin ichimliklarni ichish bilan birga tajribali ellikboshilardan ma’ruzalar tinglab, duoyu zikrlar ila ruhiy ozuqa oldilar.
Madinai munavvarada ham yurtdoshlarimiz munosib kutib olindi. So‘ngra mehmonxona oshxonasida tushlik qilib, o‘zlarining shinam xonalariga joylashdilar.
Ikkinchi kuni erta tongdan ziyoratchilarimiz Masjidun Nabaviyda bomdod namozini ado etib, Ravzai sharif ziyorati, muborak shahardagi Uhud tog‘i, Qubo masjidi ziyoratiga bordilar, Xurmo bog‘larida sayr qilib, yangi xurmo mevalaridan yedilar.
Islom tarixida katta o‘ringa ega bo‘lgan bu makonlarni o‘z ko‘zlari bilan ko‘rgan, guruhboshilaridan ular haqidagi voqealarni tinglagan ziyoratchilar go‘yoki o‘zlarini Saodat asriga tushib qolgandek his qilib, bir olam taassurot, ilmu ixloslari ziyoda bo‘lgan holda mehmonxonaga qaytdi.
Ayni paytda hamyurtlarimiz shavqu zavq ila ibodat va ziyoratlarni davom ettirmoqda.
O‘zbekiston musulmonlari idorasi Matbuot xizmati
Muqaddas Ramazon oyi munosabati bilan O‘zbekistonning Rossiyadagi elchixonasi tashabbusi bilan Moskva shahridagi “Antek” MCHJ qurilish kompaniyasida mehnat qilayotgan vatandoshlarimiz uchun iftorlik tadbiri tashkil etildi. Ushbu ma’naviy tadbirda elchixona diplomatlari bilan bir qatorda, yurtimizdan maxsus tashrif buyurgan Buxoro shahridagi “Xalifa Xudoydod” jome masjidi imom-xatibi Odiljon Sadilloyev ishtirok etdi.
Tadbir davomida so‘zga chiqqanlar yurtdoshlarimizni muborak oy bilan qutlab, davlatimiz rahbariyatining samimiy tabriklarini yetkazdilar. Musofirchilikda turli qiyinchiliklarni sabr bilan yengib, halol mehnat orqali oilasiga rizq ulashayotgan hamyurtlarimizga alohida minnatdorlik bildirildi. Shuningdek, Prezidentimiz tashabbusi bilan mamlakatimizda Ramazon oyini munosib o‘tkazish va ehtiyojmandlarni qo‘llab-quvvatlash bo‘yicha qilinayotgan xayrli ishlar haqida so‘z yuritildi.
Shu bilan birga, iftorlik asnosida ma’rifiy suhbat o‘tkazilib, fuqarolarimizning yot va buzg‘unchi g‘oyalar ta’siriga tushib qolmasligi, yoshlarni turli diniy oqimlardan asrash va doimo ogoh bo‘lish zarurligi alohida ta’kidlandi. Ishtirokchilar o‘z navbatida, ko‘rsatilayotgan bunday yuksak e’tibor va g‘amxo‘rlik uchun minnatdorlik bildirib, ushbu uchrashuv vatandoshlar o‘rtasidagi o‘zaro ishonch va hamjihatlikni mustahkamlashga xizmat qilishini e’tirof etdilar.
O‘zbekiston musulmonlari idorasi
Matbuot xizmati