Mavlid oyidagi Madina ziyorati hamyurtlarimizda unutilmas taassurotlarga boy bo‘lmoqda!
Xabar berganimizdek, yaxshi niyat ila yurtimizdan umra safariga otlangan navbatdagi guruh ziyoratchilari eson-omon Jidda shahriga yetib keldi. Bu yerda ularni mutasaddilar kutib olib, zamonaviy avtobuslarlarga o‘tkazib, Madinai munavvaraga kuzatishdi.
Ziyoratchilarimiz Payg‘ambarimiz alayhissalom shaharlariga borgunga qadar Saudiya Arabistonining mashhur tansiq taomlaridan biri – Albaykni tanovvul qilib, chanqoqbosdi salqin ichimliklarni ichish bilan birga tajribali ellikboshilardan ma’ruzalar tinglab, duoyu zikrlar ila ruhiy ozuqa oldilar.
Madinai munavvarada ham yurtdoshlarimiz munosib kutib olindi. So‘ngra mehmonxona oshxonasida tushlik qilib, o‘zlarining shinam xonalariga joylashdilar.
Ikkinchi kuni erta tongdan ziyoratchilarimiz Masjidun Nabaviyda bomdod namozini ado etib, Ravzai sharif ziyorati, muborak shahardagi Uhud tog‘i, Qubo masjidi ziyoratiga bordilar, Xurmo bog‘larida sayr qilib, yangi xurmo mevalaridan yedilar.
Islom tarixida katta o‘ringa ega bo‘lgan bu makonlarni o‘z ko‘zlari bilan ko‘rgan, guruhboshilaridan ular haqidagi voqealarni tinglagan ziyoratchilar go‘yoki o‘zlarini Saodat asriga tushib qolgandek his qilib, bir olam taassurot, ilmu ixloslari ziyoda bo‘lgan holda mehmonxonaga qaytdi.
Ayni paytda hamyurtlarimiz shavqu zavq ila ibodat va ziyoratlarni davom ettirmoqda.
O‘zbekiston musulmonlari idorasi Matbuot xizmati
“Orta Lectura”: O‘zbekiston xavfsiz sayyohlik yo‘nalishi sifatida o‘z mavqeini mustahkamlamoqda
Ispaniyaning “Orta Lectura” nashrida O‘zbekistonda turizm sohasida amalga oshirilayotgan islohotlarga bag‘ishlangan maqola e’lon qilindi, deb xabar bermoqda “Dunyo” AA.
Maqolada qayd etilishicha, so‘nggi yillarda O‘zbekiston turli nufuzli xalqaro reytinglarda hamda xorijiy davlatlarning sayyohlar uchun tavsiyalarida yuqori xavfsizlik darajasiga ega mamlakatlardan biri sifatida e’tirof etilmoqda.
World Justice Project (WJP) tomonidan e’lon qilingan “Rule of Law Index 2025” natijalariga ko‘ra, O‘zbekiston “Tartib va xavfsizlik” ko‘rsatkichi bo‘yicha 143 ta mamlakat orasida 17-o‘rinni, Sharqiy Yevropa va Markaziy Osiyodagi 15 ta mamlakat orasida esa 1-o‘rinni egalladi.
WJP indeksi 215 mingdan ortiq fuqarolar hamda 4 ming 100 nafardan ziyod huquqshunos va ekspertlar o‘rtasida o‘tkazilgan so‘rovnomalarga asoslangani bilan ahamiyatlidir.
“Gallup” kompaniyasining “2025 Global Safety Report” ma’ruzasida ta’kidlanishicha, O‘zbekiston aholisining 86 foizi kechasi yolg‘iz yurganda o‘zini to‘liq xavfsiz his qiladi. Bu ko‘rsatkich dunyo bo‘yicha o‘rtacha 73 foizlik darajadan sezilarli darajada yuqoridir. Shu bilan birga, “Law and Order Index”ning kengroq ko‘rsatkichi bo‘yicha mamlakatimiz 100 dan 91 ball to‘pladi.
Institute for Economics & Peace tomonidan tuziladigan “Global Peace Index 2026” natijalariga ko‘ra, O‘zbekiston o‘z pozitsiyasini 30 pog‘onaga yaxshilab, 163 ta mamlakat orasida 1,726 ko‘rsatkich bilan 37-o‘ringa ko‘tarildi. 2026 yilgi rasmiy hisobotda mamlakatimiz tinchlik ko‘rsatkichlari eng yuqori sur’atda yaxshilangan davlatlar qatoriga kiritildi.
AQSH Davlat departamenti “Travel Advisories” tizimida O‘zbekistonga “Level 1 – Exercise Normal Precautions” darajasini, ya’ni “Odatiy ehtiyot choralariga rioya qilish” tavsiyasini bergan. 2026 yil yanvarda yangilangan tavsiyanomada xavf darajasi oshirilmadi. Bu AQSH Davlat departamenti tomonidan xalqaro sayohatlar uchun belgilanadigan eng past xavf darajasi hisoblanadi.
O‘zbekiston musulmonlari idorasi Matbuot xizmati