Allohga hamd bo'lsinki, uyda katta kutubxonamiz bor. O'zim ko'pincha uydagi vaqtimni o'sha erda o'tkazaman. Kutubxonamiz 7 yoshdan 70 yoshgacha kishilar o'qishi uchun mo'ljallangan turli mavzulardagi kitoblar bilan to'la. Qo'plari otamdan qolgan. Yana ancha-munchasini o'zim olib kelib kutubxonani to'ldirganman.
Bolalarimga o'qishni targ'ib qilishning yaxshi yo'lini o'ylab topdim. Bolalarga atalgan kitoblarni farzandlarimning qo'llari etadigan pastki tokchalarga joylashtirib, har bir kitobning ustiga "Bu kitobni o'qigan odamga falon ming so'm mukofot" bor deb yozib chiqdim. Mukofot miqdorini yozishda kitobning hajmi va ahamiyatiga alohida e'tibor berdim.
Ko'p o'tmay hamma farzandlarim vaqtlarini men bilan birga kutubxonada o'tkazadigan bo'lib qolishdi. Deyarli har hafta bir farzandim “Dada, men mana bu kitobni tugatdim” deb bir kitobni qo'limga tutqazadigan bo'ldi. Tabiiyki, men mukoftotni berishdan oldin kitobni olib 5-10 daqiqa savol javob qilardim. Bolamdan kitob haqidagi taassurotlarini, kitob yoqqan- yoqmaganini so'rardim. Gohida bu savol-javobga boshqa farzandlarim ham qo'shilib ketib, kutubxonamiz katta kitobxonlar suhbati bo'layotgandek bahs-munozalar maydoniga aylanib ketardi.
Qo'llagan tadbirim orqali barcha bolalarim kitobxonlarga aylanishdi. Yoshlari ulg'aygach, o'qigan kitoblariga pul ham so'ramay qo'yishdi. Qaytanga farzandlarimning kattalari kichiklarini menga qo'shilib rag'batlantiradigan bo'lishdi.
Doktor Abdulloh Muhammad Abdulmu'tining
"Farzand tarbiyasida 700 ta saboq" kitobidan
G'iyosiddin Habibulloh, Kamronbek Islom tarjimasi.
Bugun, 20 noyabr kuni Termiz shahrida o‘tkazilgan «Hakim Termiziy ilmiy-ma’naviy merosining bugungi kundagi ahamiyati» mavzusidagi xalqaro konferensiya ishtirokchilari buyuk mutafakkir majmuasida bo‘ldilar.
Xorijiy davlatlardan tashrif buyurgan muftiylar, taniqli ulamo va islomshunos olimlar hamda mahalliy soha vakillari muqaddas qadamjoda Qur’oni karim tilovat qilib, ulug‘ muhaddis va mutasavvif haqlariga duoi fotiha o‘qidilar. Butun dunyoda tinchlik-osoyishtalik barqaror bo‘lishi, yurtimiz yanada obodlashib, ajdodlarga munosib avlodlar yetishib chiqishini so‘rab xayrli duolar qilindi.
Mehmonlar mahobatli maqbara, serfayz hovli hamda majmuada amalga oshirilgan keng ko‘lamli bunyodkorlik ishlari bilan yaqindan tanishdilar.
Ular O‘zbekistonda diniy-ma’rifiy sohadagi islohotlar va allomalar merosiga ko‘rsatilayotgan yuksak ehtiromga yuqori baho berdilar.
O‘zbekiston musulmonlari idorasi Matbuot xizmati