Toshkent islom institutida “Sentyabr – Islom tarixi va siyrat fan oyligi” doirasida institutning 3-kurs talabalari o‘rtasida "Hidoyat mayog‘i” nomli siyrat musobaqasi bo‘lib o‘tdi.
Tadbirda O‘zbekiston musulmonlari idorasi Ichki nazorat bo‘limi yetakchi mutaxassisi, TII “Ijtimoiy fanlar” kafedrasi o‘qituvchisi Umidjon Xodjayev, institut rektori Uyg‘un G‘afurov, Ilmiy ishlar va fan bo‘yicha prorektori Soatmurod Primov, shuningdek, "Hadis va islom tarixi fanlari" kafedrasi ustozlaridan iborat hakamlar guruhi ishtirok etdi.
Musobaqa an’anaga muvofiq Qur’on tilovati va xayrli duolar ila boshlandi. Tadbirni institut rektori Uyg‘un domla G‘afurov kirish so‘zi bilan ochib berdi. Musobaqada 3-kurs talabalaridan iborat Ibn Kasir, Ibn Hajar Asqaloniy va Imom Zahabiy jamoalari o‘rtasida qiziqarli bahslar bo‘lib o‘tdi.
Yakunda birinchi o‘rin Ibn Kasir jamoasiga, ikkita ikkinchi o‘rin Imom Zahabiy va Ibn Hajar Asqaloniy jamoalariga nasib etdi. G‘oliblar esdalik sovg‘alari bilan taqdirlanishdi.
Shuningdek, Payg‘ambar alayhissalom siyratlariga bag‘ishlangan ana shunday tadbirlar "Sayyid Muhyiddin maxdum" o‘rta-maxsus islom ta’lim muassasasi, Imom Termiziy nomidagi islom instituti hamda “Imom Termiziy” o‘rta maxsus islom ta’lim muassasasida ham o‘tkazildi.
O‘zbekiston musulmonlari idorasi
Matbuot xizmati
Namangan viloyati bosh imom-xatibi Musoxon domla Abbosiddinov raisligida O‘zbekiston musulmonlari idorasi Namangan viloyat vakilligining majlislar zalida viloyatdagi imom-xatiblar ishtirokida yig‘ilish o‘tkazildi.
Yig‘ilishda Namangan viloyati hokimining o‘rinbosari Xatamov Jamshed Muxtorovich ishtirok etdi. Unda 2025 yilda amalga oshirilgan ishlar muhokama qilinib, kelgusi yilda amalga oshirilishi lozim bo‘lgan ishlar kelishib olindi.
Yig‘ilishda imomlik sharafli va mas’uliyatli vazifa ekani, bugungi kun imomi zamonga ziyraklik, teran fikr bilan qarashi, o‘z ustida muntazam ishlashi va mo‘min-musulmonlarning ma’naviy-ma’rifiy sohadagi ehtiyojlarini qondirish uchun tinimsiz izlanib, xizmat qilishlari zarur ekani alohida qayd etildi.
Bundan tashqari, imomlar hududlardagi MFYlar bilan muntazam aloqada bo‘lib, hojilar bilan birgalikda yoshlar tarbiyasiga alohida e’tibor qaratish, ilm-ma’rifatga qiziqtirish va yosh avlod kelajagi uchun mustahkam poydevor yaratish, oilalarni tinch-totuv yashashi, farzandlarni bevaqt tirik yetim bo‘lmasligi uchun ajrimlarning oldini olish, keksalarni hurmat qilish, qo‘shnichilik odoblariga rioya qilish, yurt tinchligi va osoyishtaligi uchun barcha birdek mas’ulligi kabilarga alohida e’tibor qaratish ta’kidlandi.









O‘zbekiston musulmonlari idorasi
Namangan viloyati vakilligi
Matbuot xizmati