Faxriy ustozlar ziyorat qilindi
O‘qituvchi va murabbiylar kuni munosabati bilan O‘zbekiston musulmonlari idorasi raisi o‘rinbosari Zayniddin domla Eshonqulov boshchiligida bir guruh xodimlar tizimda uzoq yillar davomida ishlagan faxriy ustozlar va ilm-ma’rifat yo‘liga umrini bag‘ishlagan ahli ilmlarni yo‘qlab borishdi.
Jumladan, shayx Abdulaziz Mansur hazratlari, Rahmatulloh qori Obidov, Jaloliddin hoji Nuriddinov, Ahmadjon domla Bobomurodzoda, Abdulhakim qori Matqulov kabi fazilatli ustozlar diydoriga musharraf bo‘lindi.
Tashriflar davomida ustozlarning foydali suhbat va nasihatlari tinglandi. Ustozlarning jamiyat hayotidagi o‘rni, yoshlar tarbiyasi va ma’naviy-ma’rifiy soha rivojiga qo‘shgan hissalari e’tirof etildi. Ularga esdalik hadyalar taqdim etildi.
Faxriy ustozlar bunday e’tibor va ehtiromdan mamnun bo‘lganlarini bildirib, yurtimiz, yurtboshimiz, muftiy hazratlari va boshqalar haqlariga duolar qilishdi.
O‘zbekiston musulmonlari idorasi
Matbuot xizmati
To‘rtko‘lda obodonlashtirish va mehr-saxovat tadbirlari bo‘lib o‘tdi
O‘zbekiston musulmonlari idorasi va Din ishlari bo‘yicha qo‘mita hamkorligidagi “Ezgulik va ma’rifat targ‘ibotchilari” tashabbusi doirasida To‘rtko‘l tumanida amaliy tadbir bo‘lib o‘tdi. Jarayonlarni Qoraqalpog‘iston musulmonlari qoziyoti qozisi Bahramatdin Razov boshqarib bordi.
Tumandagi “Mulla Jumaboy” jome masjidida o‘tkazilgan tashkiliy yig‘ilishda qoziyot mas’ullari, bosh imom-xatiblar, hojilar va mahalla raislari jam bo‘ldi.
Davlatimiz rahbari tashabbusi bilan iyul oyining “Obodonlashtirish va mehr-saxovat oyligi” deb e’lon qilinishi munosabati bilan tumanda keng ko‘lamli ishlar amalga oshirildi. Xususan, imom-xatiblar va masjid qavmi boshchiligida ko‘chalar, masjid atroflari tozalandi. Shuningdek, imkoniyati cheklangan va nogironligi bo‘lgan fuqarolarning hovli-joylarida hashar yo‘li bilan obodonlashtirish ishlari olib borildi.
Ishchi guruh a’zolari To‘rtko‘l tumanidagi 10 ta masjid va 20 ta mahallaga biriktirilib, quyidagi xayrli amallar bajarildi:
-
Hojilarni jalb etgan holda mahallalardagi muammoli oilalar holidan xabar olindi;
-
Homiylar ko‘magida 120 ta ehtiyojmand xonadonga moddiy va ma’naviy yordam ko‘rsatildi;
-
Ko‘makka muhtoj oilalarning farzandlariga yangi o‘quv yili uchun maktab formalari tarqatildi;
-
Imom-xatiblarning faoliyati o‘rganilib, masjid boshqaruvi va ma’rifiy ishlarni yanada rivojlantirish bo‘yicha amaliy tavsiyalar berildi.
Tadbir yakunida amalga oshirilgan ishlar tahlil qilinib, hududda diniy-ma’rifiy muhitni sog‘lomlashtirish va aholini ijtimoiy qo‘llab-quvvatlash bo‘yicha kelgusidagi vazifalar belgilab olindi.
Qoraqalpog‘iston musulmonlari qoziyoti
Matbuot xizmati
