Shu yilning 11 aprel kuni Buxoro shahridagi Mir Arab o‘rta maxsus islom ta’lim muassasasiga Qirg‘iziston musulmonlari idorasi raisi, muftiy Abdulaziz qori Zokirov boshchiligidagi delegatsiya tashrif buyurdi.

Martabali mehmonlar tashrif davomida ta’lim muassasasining faoliyati, o‘quv jarayonlari va talabalar uchun yaratilgan shart-sharoitlar bilan yaqindan tanishdi. Besh asrlik boy tarixga ega bo‘lgan Mir Arab madrasasining islom olamidagi o‘rni, bu yerdan yetishib chiqqan zabardast ulamolar va majmuaning noyob me’moriy yechimi mehmonlarda katta taassurot qoldirdi.

Muloqot davomida mazkur ta’lim dargohida tahsil olgan qirg‘izistonlik mashhur din va davlat arboblari, allomalar haqidagi ma’lumotlar alohida yodga olindi. Bu kabi tarixiy rishtalar ikki qardosh xalq o‘rtasidagi diniy-ma’rifiy aloqalarni yanada mustahkamlashda muhim poydevor bo‘lib xizmat qilishi ta’kidlandi.

Ta’lim muassasasi
Matbuot xizmati