Masjidlarda kuz-qish mavsumiga tayyorgarlik yakunlanmoqda
Mamlakatimizdagi masjidlarda kuz-qish mavsumiga tayyorgarlik ishlari nihoyasiga yetmoqda. Mavsumni betalafot o‘tkazish maqsadida kommunal sohaga daxldor xizmatlarning ish sifati va belgilangan talablarga to‘la javob berishi bo‘yicha zarur choralar ko‘rildi.
Ma’lumki, O‘zbekiston musulmonlari idorasi tomonidan mo‘min-musulmonlar emin-erkin ibodat qilishi uchun qulay va xavfsiz sharoitlar yaratish uchun rejali ishlar amalga oshirib kelinadi. Ayniqsa, kuz-qish mavsumi arafasida tegishli ko‘rsatma va buyruqlar asosida, masjid xonaqohlari, qo‘shimcha binolar, yer to‘la, dudbo‘ronlar, tahoratxonalar, qozonxonalar va tutash bo‘lgan inshootlarda har jihatdan xavfsizlikni ta’minlashga katta urg‘u qaratildi. Yong‘in xavfsizligiga mas’ul shaxslar tayinlandi.
Yaqin kunlarda havo haroratining pasayishi kutilayotgani e’tiboridan, masjidlarning texnik va yong‘in xavfsizligi talablariga muvofiqligi, issiq suv hamda issiqlik energiyasi bilan ta’minlash tizimlarini navbatdagi nazoratdan o‘tkazish ishlari yakunlanmoqda. Ushbu tadbirlarga Favqylodda vaziyatlar vazirligi, Qurilish va uy-joy kommunal xo‘jaligi vazirligining hududiy boshqarmalari va kommunal xizmat ko‘rsatuvchi korxonalar mutaxassislari jalb etildi.
O‘rganishlar davomida belgilangan talablarga javob bermaydigan ayrim masjidlardagi issiq suv hamda issiqlik energiyasi bilan ta’minlashdagi kamchiliklar qisqa muddatlarda bartaraf etildi. Shuningdek, isitish tizimida quyosh panellari, geokollektorlar, muqobil energiya manbalaridan unumli foydalanish va sharoitga qarab, ko‘mir zahiralarini tayyorlash kabi chora-tadbirlar ko‘rildi.
Mana shunday keng ko‘lamli chora-tadbirlardan asosiy maqsad fuqarolarimiz xotirjam, emin-erkin ibodat qilishi uchun qulay va xavfsiz sharoitlar yaratishdir.
O‘zbekiston musulmonlari idorasi Matbuot xizmati
“Em Insight”: Toshkentdagi xalqaro mediaforum islom sivilizatsiyasining zamonaviy qiyofasini namoyon etdi
Britaniyaning “Em Insight” jurnalida O‘zbekistonda bo‘lib o‘tgan “Islom sivilizatsiyasi: yangi nigoh, yangi kashfiyotlar” mavzusidagi xalqaro mediaforumga bag‘ishlangan maqola e’lon qilindi, deb xabar bermoqda “Dunyo” AA.
Nashrda yozilishicha, O‘zbekiston Islom sivilizatsiyasi markazi tomonidan tashkil etilgan “Islom sivilizatsiyasi: yangi nigoh, yangi kashfiyotlar” xalqaro mediaforumi xorijlik OAVda katta qiziqish uyg‘otgan.
Raqamli platformalar, sun’iy intellekt va axborot xurujlari avj olgan hozirgi zamonda ommaviy axborot vositalarining mamlakatlar, madaniyatlar va sivilizatsiyalar haqidagi tasavvurlarni shakllantirishdagi o‘rni tobora ortib bormoqda.
Maqolada ta’kidlanishicha, Al-Xorazmiy, Ibn Sino, Beruniy, Imom Buxoriy, Imom Termiziy va Mirzo Ulug‘bek kabi jahon ilm-fani rivojiga beqiyos hissa qo‘shgan buyuk mutafakkirlar yurti bo‘lmish O‘zbekiston bu kabi global muhokamalar uchun eng maqbul maydondir.
Qatarning “The Peninsula” gazetasi mas’ul muharriri Muhammad Osmon forumning raqamli axborot asridagi ahamiyatiga to‘xtalib, Imom Buxoriyning hadislarni to‘plash va ularning haqqoniyligini tekshirishdagi qat’iy yondashuvini tilga oldi.
U ushbu metodologiyani manbalarni chuqur o‘rganish va verifikatsiya qilishning o‘chmas namunasi deb atadi va bu tamoyillar feyk xabarlar hamda sun’iy intellekt mahsulotlari ko‘paygan hozirgi davrda juda ahamiyatli ekanini bildirdi.
O‘zbekiston Milliy axborot agentligi muharriri O‘tkir Alimov forumning Mustaqillikning 35 yilligi ostonasida o‘tkazilayotganiga e’tibor qaratgan. U 50 mamlakatdan 300 ga yaqin OAV vakillarining Toshkentda jamlangani O‘zbekistonning sivilizatsiyalar chorrahasi sifatidagi o‘rni ortib borayotganidan dalolat berishini ta’kidladi.
Maqolada Toshkentdagi xalqaro mediaforum jurnalistika mas’uliyati, tarixiy tadqiqotlar chuqurligi va zamonaviy texnologiyalar imkoniyatlarini birlashtirgan holda Islom sivilizatsiyasini yangi, zamonaviy qiyofada dunyoga tanitishga xizmat qilishi bayon etilgan.
O‘zbekiston musulmonlari idorasi Matbuot xizmati
