Umra ziyoratchisi: “Safarimiz nihoyatda huzur-halovatli o‘tdi”
Joriy yilning 23 oktyabridan 2 noyabriga qadar Haj va umra markazi tomonidan umra safariga borib kelgan ziyoratchilar safar davomida o‘zlariga ko‘rsatilgan xizmatlardan juda mamnun bo‘lishdi.
Madinai munavvarada Ravzai sharifga kirish, Uhud tog‘i, Qubo masjidi ziyoratlaridan bir olam tassurotlar olib, ehrom bog‘lab Makkai mukarramaga kelgan ziyoratchilarning hammasi ibodatlarini ado etishdi.
Ka’batulloh tavofi, besh vaqt va nafl namozlar bilan bir qatorda Arafot, Nur, Savr tog‘lari hamda Mino, Muzdalifa vodiylari kabi muborak qadamjolarga uyushtirilgan ziyoratlardan dillarda farah jo‘sh urdi.
Qizil dengizga qilingan sayohat ularning kayfiyatlarini yanada chog‘ etdi.
– Keksayib qolganim uchun, garchi kuyovim va qizim bilan uzoq safarga chiqqan bo‘lsam ham, xavotirim bor edi, – dedi surxondaryolik 76 yoshli Osiyo ona Toshmuhammedova. – Xalqona til bilan aytganda, egali ekanmiz. Ishchi guruhi, ellikboshilar, shifokorlar doim xizmatga shay turishdi. Ibodatlarni birma-bir, yetaklab yurib o‘rgatishdi. Biror joyda yeb-ichishning, mehmonxonaning yo ulovning tashvishini qilmadik. Allohga behisob shukrki, safarimiz nihoyatda huzur-halovatli o‘tdi.
Ziyoratchilarni O‘zbekistondan muborak diyorga kuzatishdan tortib, to ona Vatanga qaytishlarigacha bosh-qosh bo‘lganlar haqiga duolar qilindi.
O‘zbekiston musulmonlari idorasi
Matbuot xizmati
Bir guruh diniy-ma’rifiy soha fidoyilariga "O‘zbekiston Respublikasi mustaqilligining 35 yilligi" esdalik nishonlari topshirildi
27 avgust kuni O‘zbekiston Respublikasi mustaqilligining 35 yilligi munosabati bilan diniy-ma’rifiy sohada samarali mehnat qilib kelayotgan fidoyi yurtdoshlarimizni taqdirlashga bag‘ishlangan tantanali tadbir bo‘lib o‘tdi.
Tadbirda O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov kirish so‘zi bilan ishtirok etdi.
Kirish nutqida mamlakatimizda mustaqillik yillarida, ayniqsa, so‘nggi yillarda diniy-ma’rifiy sohani rivojlantirish, jamiyatda tinchlik-totuvlik, millatlararo hamjihatlik va diniy bag‘rikenglikni mustahkamlash borasida amalga oshirilayotgan islohotlar, shuningdek, sohada faoliyat yuritayotgan ulamolar, imom-xatiblar, mudarrislar va fidoyi xodimlarning munosib hissasi haqida alohida ta’kidlandi.
Tantanali tadbir davomida diniy-ma’rifiy sohada ko‘p yillardan buyon samarali mehnat qilib, yurtimizda ma’naviy barqarorlikni ta’minlash, yosh avlodni milliy va umuminsoniy qadriyatlar ruhida tarbiyalash, aholi o‘rtasida ma’rifiy tushuntirish ishlarini olib borishga munosib hissa qo‘shib kelayotgan bir guruh fidoyi yurtdoshlarga "O‘zbekiston Respublikasi mustaqilligining 35 yilligi" esdalik nishonlari tantanali ravishda topshirildi.
Esdalik nishonlarini topshirish marosimida O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev, O‘zbekiston musulmonlari idorasi raisi, muftiy Shayx Nuriddin Xoliqnazar hazratlari, O‘zbekistondagi Islom sivilizatsiyasi markazi direktori Firdavs Abduhalikov, O‘zbekiston Respublikasi Vazirlar Mahkamasi mas’ul xodimi Orifxon Zokirovlar ishtirok etdilar.
Taqdirlash marosimida ta’kidlanganidek, mazkur esdalik nishoni mamlakatimiz taraqqiyotiga, uning tinchligi va barqarorligiga, jamiyatda millatlararo totuvlik va diniy bag‘rikenglik muhitini mustahkamlashga, yosh avlodni milliy va umuminsoniy qadriyatlar ruhida tarbiyalashga munosib hissa qo‘shayotgan fidoyi insonlarga bildirilgan yuksak ehtirom va e’tirof ramzidir.
Tadbir yakunida taqdirlanganlar o‘zlariga bildirilgan yuksak ishonch va e’tibor uchun minnatdorlik bildirib, mamlakatimiz tinchligi va ravnaqi yo‘lidagi ezgu faoliyatlarini yanada sidqidildan davom ettirishlarini ta’kidladilar.
Barcha mukofot sohiblarini samimiy muborakbod etamiz!
Mustaqilligimizning 35 yilligi muborak bo‘lsin!
O‘zbekiston musulmonlari idorasi Matbuot xizmati